इफिसीयो 3 - नाहाली

अन्य जातीमाय पौलुसान सेवा

¹ आवो कारण से मी पौलुस जो तुमरो दिहरी जातीन केरता मसीह यीशुन बंदी हि.

² जर तुमु बोगवानान ता कृपान तीन व्यवस्था विषयी होमलील हि, जो तुमरे केरता माहु आपील हि,

³ म्हणजे हे का ते भेद तुमरे पोर प्रगटीकरणा द्वारे प्राप्त एनो, जाणे मी पेलूच थोडोक लिखील हि,

⁴ ज्याही तुमु वाचीन होमजू शकता का मी मसीहान ते भेद काहरीवूर होमजाती.

⁵ जे दिहरा टाईमामाय माणहान सोराह ओहलाच किथी गीयो एतो, इही कि आत्मान द्वारे ऐवी तान पवित्र प्रेरित एने भविष्यवक्तानवर प्रगट किरील गीया एता.

⁶ म्हणजे हे कि मसीह यीशु माय सुवार्ताच्या द्वारे दिहरी जातीन माणहे मीरामाय गवाही, एने एकुच शरीरान एने प्रतिज्ञान भेलाईल हि.

⁷ मी बोगवानान कृपान ता दाणा नुसार, ज्यो सामर्थ्यान करने नुसार, जो तान समर्थान करने नुसार माहु आपील गीयो, ता सुवार्तान दास बोणील.

⁸ मारपुर जे आखा पवित्र माणहामाय भी आत्या हि, हि कृपा एनी का मी दिहरी जातीन मसीहान अगाध संपतीई सुवार्ता होमलावणार,

⁹ एने आखापूर जीवात उजालो केरूह का ता रहस्यान व्यवस्था काय हि, ज्यो आखान सूजमहार बोगवानानामाय पेल तारीन लिकाडील एता.

¹⁰ म्हणजे ऐवी कलीसियान द्वारे, बोगवानान बहूविध ज्यापूर ता अधिकारी एने अधिकार्यापुर जे स्वर्गामाय हि, प्रगट किरील जाणे.

¹¹ ता पिडीन पिडी माणहान अनुसार जो तान आमारो प्रभु मसीह यीशु माय केरील एती.

¹² ज्यामाय आमूह तापोर विश्वास केरणेन धेर्य एने विश्वास पुण आवो हेरी बोगवानान आहने आवणेन अधिकार हि.

¹³ तान केरता मी विनंती करने कि जे क्लेश तुमरीकेरता माहु एता हि, तान कारण से खुचू मा, कारण तामायरीन तुमरो महिमा हि.

मसीहान प्रेम

¹⁴ मी याकारनावजेसें ता पित्या सुमोर मांडा टेकविलो,

¹⁵ ज्यान स्वर्ग एने पृथ्वी एने पृथ्वीपोर, प्रत्येक वंशनाव मिलील जातेह,

¹⁶ कि ते आपणो महिमाच्या धन नुसार तुमु हे दान आपील कि तुमु तान आत्मा माय आपणो माय वाला माणहान सामर्थ मेलावीन बलवान एता जाणे;

¹⁷ एने विश्वासान द्वारे मसीह तुमरो हृदय बोह्ना कि तुमु प्रेमामाय मुळ देरावीन एने पाया पेरनीह,

¹⁸ आखा पवित्र माणहान हेरी हाजो वाईट होमजील शेक्ती मिलीजावू कि तान लांबी, एने रुदी, एने उचु, एने उंडो कोलाक हि,

¹⁹ एने मसीहान ता प्रेमाला होमजू शकणार जे ज्ञानाणी प्रार्थना हि कि तुमु बोगवानान आखा पूर्णतेह्तके परिपूर्ण एने जुवी.

²⁰ ऐवी ज्यो ओहलो सामर्थ हि का आमरी विनंती एने होमजील काही जादा काम केरूह शकते, ता सामर्थ्यान व्यवस्था जी आमरा माय कार्य केरुहू,

²¹ कलीसिया माय एने मसीह यीशु माय तान महिमा पिढ्यान पीडा ताहवोर पिडीन पिडी एता रिजी. आमेन.