इफिसीयो 2 - नाहाली

मोतरीन जीवाना उखेर

¹ तो तुमु भी जीवतालू किरील, तो आपणो अपराधान एने पापान कारणाम मोरील एतो.

² ज्यामाय तुमूह देखील आवो जगाच्या रीतीपूर, एने आकाशामाय अधिकारी म्हणजे ता आत्मानुसार चालतो एतो, जे ऐवी भी आज्ञा केरनारामाय कार्य केरणू.

³ याम आमु पुण आखा च्या आखा पेल्ला आपणो शरीरान वासना माय चालतो एता, एने शरीर एने मोनान ईच्छा पुरो केरतीन एता, एने दिहरा माहुहूस स्वभावाइहि क्रोधाचे सोरा एता.

⁴ पुण बोगवानान जो दयेचा धनी हि, आपणो ता प्रेमान मोठली कारणाने ताहेरी तास आमुपूर प्रेम किरील.

⁵ ताहेरया आमु अपराधान कारणाने मुरील एता तर आमु ऐवी मसीहासोबत जीवतालू (कृपा मायुच तुमरो उद्धार एनो हि),

⁶ एने मसीह यीशु माय तान हेरी उठाडील गीया हि, एने स्वर्गीय स्थानामाय ताहे-यो बोहाडया.

⁷ कि तो आपणो कृपान जो मसीह यीशु माय आमरा उपेर हि, आवणारा टाईमामाय आपणो कृपेने उपेर संपती देखाडील.

⁸ कारण कि विश्वासान द्वारे कृपा मायुच तुमरो उद्धार एनो हि, एने हे तुमरेफायरीन नाहं, तर हे बोगवानान दान हि.

⁹ एने नाहं कर्मकेरणार कारणाने, इही होवो कि कूण खत केरूह.

¹⁰ कारण कि आमु तान बोणाविल हेते, एने मसीह यीशु माय ता हाजो कामान केरता बोणाविल गेलेले चिन्ह बोगवानान पेल्ला तारीन आमरा केरणेन केरता तियार किरील.

मसीह माय एक

¹¹ आवो कारणाने एर केरू कि तुमु जे शरीरान रीतीमाय दिहरी जातीन ओहलो एने जे माणहे आखठा माय वाला आथा किरील खतनारहित केणु.

¹² तुमु आखा माणहे ता टाइमाह मसीहा फायरीन आलेग, एने इस्राएलान प्रजान पोदान केरीन आलेग किरील हेते, एने वाचान प्रतिज्ञान भागीदार नाह एता, एने आशाहीन एने जगामाय ईश्वरबिना एता

¹³ पुण ऐवी मसीह माय तुमु जा पेल शेटे एता, मसीहान रक्तान द्वारे आहने आव गीयाह.

¹⁴ कारण कि तोच आमारो मेल हि तान केरता दुईजानाह एक्ठाच केरीन लीईल एने आलेग करणारी जी माय भितडो एती ती पाडीन टाकील,

¹⁵ एने आपणो शरीर माय वाला व्यवस्था वाईट म्हणजे ती परिस्थिती ज्यान आज्ञा विधीन रीतीपूर एती, निवरीगियो केरीन आपील कि दुयुन आपणो माय एक नोवालो माणुह उत्पन्न केरीन मेलावीन आपील.

¹⁶ एने क्रुस पोर निवरीगोयो केरीन ज्यान द्वारे दुईजानाह एक शरीर बोनाडीन बोगवाना हेर्यो मिलावणु.

¹⁷ तान आवीन आपु ज्यो सेटो एता, एने ज्यो आहने एता, दुई जाणाह मेल ने सुवार्ता होमलावीन.

¹⁸ कारण कि ताउगेरीन आपणो दुयुन एक आत्मा माय आबुक आहने प्रवेश एता.

¹⁹ ज्यांकेरता तुमु ऐवी विदेशी एने पार्के नाहं रेणा, पुण पवित्र माणहान हेरी बोगवानान एईन गीया.

²⁰ एने प्रेरित एने भविष्यवक्तान पायापोर, ज्यान कुणीन दिगुड मसीह यीशु खुदेन हि, लेन बोनाईल गीयो हि.

²¹ ज्यामाय आखा रचनेम एक्ठाच मिलिन प्रभु माय एक पवित्र मंदिर बोण जाथी.

²² ज्यामाय तुमु पुण आत्मान द्वारे बोगवानान निवास तीजागेन एणेन केरता एक्ठाच बोणावणेन जात हि.