इफिसीयो 1 - नाहाली

अभिवादन

¹ पौलुसा फायरीन जो बोगवानान ईछा से यीशु मसीहान प्रेरित हि ता पवित्र एने मसीह यीशु माय विश्वासी माणहान नावी जें इफिसुस माय हि:

² आमारो आबोक बोगवान एने प्रभु यीशु मसीहा फायरीन कृपा एने शान्ति जुडती रेय.

मसीह माय आत्मिक आशीष

³ आमारो प्रभु यीशु मसीहान बोगवान एने पितान धन्यवाद एय कि तान आमूह मसीहा माय स्वर्गीय स्थानामाय आखा प्रकारची आत्मिक आशीर्वाद किरील हि.

⁴ जीही तो आमूह जगान उत्पतीन पेल्ला तामाय निवाडीन लीईल कि आमु तान एने प्रेमामाय पवित्र एने निर्दोष एय.

⁵ एने आपणी प्रेम से हाजो आज्ञापुररीन आमूह आपणे केरता पेलरीन ठेरायेल का यीशु मसीहान द्वारे आमु तान दत्तक सोरो एज्यु,

⁶ का तान ता कृपा मायरीन महिमान वाहवा, एने जुवी केरीन ता ताह आमूह ता प्रिय जनामाय आपील.

⁷ आमूह तामाय तान रक्तान द्वारा सुटकारा, म्हणजे अपराधान क्षमा, तान ता कृपान धनान होस जुडील हि.

⁸ तान ताह आखा ज्ञान एने समाजहेर्यो आमऱ्येफायरीन विपुलतेने किरील.

⁹ काहाकाय कि तान आपणी ईच्छान भेद ता हाजो संकल्पानुसार आमूह कियील, तान ताह आपुहू स्वताह ठाणून लीईल एता.

¹⁰ कि बोगवानान योजनान होस समयान पूर्ती एने पुर जो काय स्वर्गामाय एने पृथ्वीपोर जो हि, तो आखा काही मसीहा माय एक्ठाच केरणू.

¹¹ तामाय ज्यामाय आमु पुण तामाय संकल्पनाने जो आपणो इच्छेकेरिन मनापुररीन आखा काही करने, पेल्लारीन ठेरायेल जाइन वतनदार बना.

¹² कि आमु तान केरता पेल्लारीन मसीहा पोर आशा मिलील एती, तान महिमाची वाहवा काहाकाय ओहलो.

¹³ एने ज्यामाय तुमपूर पुण, ताहेरया तास सत्याचे वचन होमलील, जे तुमरो उद्धाराची सुवार्ता हि एने ज्यापूर तुमूह विश्वास किरील, प्रतिज्ञा किरील पवित्र आत्मान शिक्का लागाडया.

¹⁴ तो ताह वेचातो लेद्लू सुट्टीकेरिन आमरा हिसाचे बोणाविल हि, कि तिया महिमाची वाहवा ओहलो.

पौलुसान प्रार्थना

¹⁵ ओहलो कारण मी भी ता विश्वासान सुवार्ता होमलील जो तुमरा माणहामाय प्रभु यीशुपुर हि एने आखा पवित्र माणहापूर प्रेम प्रगट किरील हि,

¹⁶ तुमरे केरता बोगवानान धन्यवाद केरणेन सोडित नाहं, एने आपणी प्रार्थनामाय मी तुमूह एर केरते रेणे.

¹⁷ का आपणा प्रभु यीशु मसीहान बोगवान जो महिमान आबोक हि, तुमूह आपणी ओलखाती माय ज्ञान एने उजालान आत्मा आपी.

¹⁸ एने तुमरो मोनान डोला उजालो ओहलो का तुमूह ओलखिन ली का तिया बलवंत आशा काय हि, एने पवित्र माणहामाय तान वाटे महिमान धन कोहलो हि.

¹⁹ एने तान सामर्थ्य आमरा माय जे विश्वास केरणू, कोलाक महान हि, तान शक्तीचे प्रभावाच्या ता कामान केरता.

²⁰ जो तो मसीहा माय किरील हि कि ताह मोरील मायरीन जीवतालू केरीन स्वर्गीय स्थानामाय आपणो जेवडी उगे,

²¹ आखा प्रकारान प्रधानामाय, एने अधिकार, एने सामर्थ्य एने प्रभु तान, एने उंजू प्रत्येक नावान उपेर, जे केवळ ता माणहांपोर आवणारे माणहामाय पुण लीईल जाह बोहाडील.

²² एने आखा काही तान पाया बुंदे केरीन आपील; एने ताह आखा बिडारापूर बारी ठेरिनीन कलीसिया माय आपील,

²³ ते तान शरीर हि, एने तान परिपूर्णता हि जो आखामाय आखा काही पुरो करने.