कुलुसी 3 - नाहाली

¹ काहाकाय जर तुमु मसीहाहे-या मोरणामायरीन जीवताला किरील हि, तर ता स्वर्गीय वस्तु पुर रीवू, जो स्वर्गाम हेते जाहारी बोगवानान जेवडीउगी बाजूमाय मसीह विराजमान हि.

² पृथ्वी वस्तूबद्दल विचार केरतीन रीवू मा पुण स्वर्गीय वस्तु पोर मोन लागाडू,

³ काहाकाय तुमूह आखान जुनो व्यक्तिमत्व मोराना हि एने तुमरो जीवन मसीहाहेर्यो बोगवानामाय लिकाईल हि.

⁴ जेवी मसीह, जे आमरा जीवन पोशो प्रकट एय, तर तुमूह पुण ताहेऱ्यो तान महिमा प्रकट एय.

पेहलो जीवन एने नोवीन जीवन

⁵ जानकेरता कि तुम्रेमाय जे काही जगान हेते, तान शेवेट केरीन दया व्यभिचार, अशुद्धता, वासना, वाईट ईच्छा, एने लोभीपण जे मूर्ती पूजान एक प्रकार हि.

⁶ ज्याह वातू बोगवानान राग प्रकट एता असतो.

⁷ एने तुमु भी, एक टाइम एती ताहेरया तुमूह पुण इही कार्य केरतीन तामाय वालो जीवन जगत एता.

⁸ पुण ऐवी तुमु आखी वातून राग, झुंजलाहट, शत्रुता, निंदा भाव एने मुया केरीन जुलुणु ज्या आखा वातू सोड बोगवानानू.

⁹ आपणेहे-या ठेगणे बोलहू मा, काहाकाय तुमूह आपणा जुनो जीवन व्यक्तित्व तान कामाहेरी टाकीन आपील हि.

¹⁰ एने नोवालो व्यक्तित्व पेरील हि, जो आपणो निर्माणकर्तान स्वरूपाम स्थिर एय बोगवानान आखा ज्ञानाम कायम नोवालो एता जातेह.

¹¹ परिणाम स्वरूप ताजागेन यहूदी, एने यूनानी, ज्यामाय काही गालो रेणू नाहं कूण खतना युक्त, एने खतनाहित, माय असभ्य, एने बर्बर, माय दास एने एक स्वातंत्र: माणहामाय काही तेभी अंतर हि मसीह आखा काही हि एने आखा विश्वासी माणहामाय ताणुच निवास हि.

¹² काहाकाय तुमूह बोगवानान निवाडील गीया हि जानकेरता पवित्र एने प्रिय हि सहानुभूती दया, नम्रता, कोमलता एने धीरज देरावीन रीवू,

¹³ तुमूह आपनेमायवाला ताहेरया केध्दीह कुणान काही मेहनत रेंय तर एक दिहीराह सहन केरीन लिवू एने परस्पर एक दिहीराह क्षमा केरू; जोहलो बोगवान तुमु क्षमा किरील हि, तोहोलोच तुमु भी केरू.

¹⁴ आवो वातू व्यातीरिक्त प्रेमामाय पुण रीवू प्रेम हि कि आखान आपनेमाय बांधीन मेकील एने परिपूर्ण करने.

¹⁵ तुमरो मोनापुर मसीहा फायरीन ह्नारो शान्तिन अधिकार, ओहलो ज्याह केरता तुमूह ताणुच एक शरीर हादील हि, कायम तुमरा ह्रदय मा राज्य केरी; एने धन्यवाद केरतीन रीवू.

¹⁶ यीशु मसीहान वचनाह आपणा मोना माय हाजो केरीन बोहाड लिवू, एने सिद्ध ज्ञानाहेर्यो एक दिहराह हिकाडू, एने चीन्तान, एने आपणा-आपणा मोना माय अनुग्रहा हेर्यो बोगवानान केरता भजन एने आत्मिक गीते गावू.

¹⁷ वचनान केरीन ज्या कामाह केरीन जो काय भी केरू सोब प्रभु यीशुन नावामाय केरू, एने तान उगीरीन बोगवान पितान धन्यवाद केरू.

नोवाला जीवनान पारिवारिक नियम

¹⁸ एय बायकू, जीही बोगवानामाय हाजो हि, आपणा आपणा एदम्यान अधीन रीवू,

¹⁹ एय एदम्या, आपणी बायकू पोर प्रेम केरू, तान केरता कठोर एहू मा.

²⁰ एय सोरा, आखा वातीमाय आपणा आपणा आहाक आबाकने आज्ञा पालन केरू, कारण ज्या केरीन बोगवान संतोष एने.

²¹ एय आबाहा, आप आपणाह सोराह आयडणार मा लीनआवनु तर ते दुखी एय.

²² एय दासांनो, आपणो संसारान मालक्यू केणे एक फक्त माणहाह प्रसन्न केरणे केरता तान टायीमा नाहं, ताहेरया ते देखणे पुण खेरा मोनान तान होमलू कारण तुमूह प्रभुन आदर केरणू.

²³ तुमूह जे काही मुडोपुर आपणो आखा मोनान ज्यानहोस नाहं कि तुमूह ता माणहा केरता केरणू पुण प्रभु केरता केरणू ज्यानहोस केरू;

²⁴ ज्यानहोस इआवीह मेलू कि तुमूह प्रभु पासून वतन रूप प्रतिफोल जुडी; आपणो मालिक मसीह ज्ञान सेवा केरतीन रीवू.

²⁵ काहाकाय जो वाईट काम केरुहू ताह तान फोल जुडी, एने तान केरता काही पक्षपात निह एय.