कुलुसी 1 - नाहाली

¹ पौलुसान उखेर रीन, जो बोगवानान ईच्छा नुसार यीशु मसीहान प्रेरित एतो ज्ञान, तोहोलोच आमारो बाहाक तीमुथियुसा फायरीन,

² मसीहा माय पवित्र स्थिर कुलुस्से माय रेणार आखा विश्वासु बायाक एने भक्तांन नावे: आमारो आबोक बोगवान ज्यारीन तुमु कृपा एने शान्ति जुळी.

धन्यवादान प्रार्थना

³ आमु तुमरीकेरता नित प्रार्थना केरीन आपणो प्रभु यीशु मसीहान आबुक म्हणजे बोगवान ज्यान धन्यवाद केरतेह,

⁴ काहाकाय आमु होमलील मसीह यीशु माय तुमरो विश्वास, तोहोलोच आखा पवित्र भक्तांन प्रत्येकी प्रेमाबदल होमलील हि;

⁵ हे ता आशा माय एय गीयो हि जी ओहला सुरक्षित स्वर्गाम हि, एने ज्या विषयी तुमूह पेलूच खेरो सुवार्ता म्हणजे वचन द्वारे होमलील हि,

⁶ सुवार्ता आखा जगाम सफळ एता, होयते सफळ एता हि कि जोहलो तुमरो माय हे तीवाआदेखुहु सफळता एता, हि ताहेरया तुमूह बोगवानान कृपा विषयी होमलील एता एने खेरीच ताह सोमोजनो एता.

⁷ आमरा प्रिय हेरी दास इपफ्रास फायरीन, जो आमरे केरता मसीह यीशु माय विश्वासु दास हेते तुमूह सुवार्ताचे शिक्षण लीईल हि.

⁸ आत्मा द्वारे उत्तेजित तुमरो प्रेमामाय पुण तान आमूह कियील हि.

⁹ जानकेरता का दिहरान जो होमलील हि, आमु भी तुमरे केरता जीह प्रार्थना केरणे एने विनंती केरणे केरीन नाह चुकणु नाह का तुमु आखा आत्मिक ज्ञान एने बुद्धी हेर्यो बोगवानान इच्षान ओलखाती माय परिपूर्ण एय जाऊ,

¹⁰ जानकेरता का ता प्रकारे वागणो सेकह जोहलो प्रभु होमेलने, प्रत्येक प्रकारे तुमूह प्रभुह दाडीन संतोष केरू, तुमरो आखा कामे सतत सफळता प्राप्त व्हावेतुमच्या जीवनेनकेरिन हाजो कामान फोल, लागावेतुम्ही प्रभु बोगवानान ज्ञानात वोळतेच रीवू,

¹¹ तो तुमूह आपणो महिमाच्या शक्ती केरी सद्रुड बोणावूह रिजी, जानकेरता कि विपत्तीच्या काळी आनंदने एने मोठला धैऱ्याने ते सहन केरूह सेकुह,

¹² ता आबाकने धन्यवाद केरते रीवू, जो आमु ज्या योग्य बोणावीन बोगवानान उजाला माय पवित्र माणहा विरासत माय एखठा रीवू.

¹³ बोगवानान आंधारामाय शक्तीमरीन सोडविल एने आपणो प्रिय सोरो ज्यान राज्यातम आमारो प्रवेश केरीन आपील,

¹⁴ जामाय आम्हु सुटका म्हणजे आपणा पापान क्षमा जुडील हि.

मसीह ने माहानता एने तान कामे

¹⁵ तो अदृश्य बोगवानान रूप दृश्य रूप हि तो आखा सृष्टीतील जेष्ठ हि.

¹⁶ काहाकाय जे काही स्वर्गाम हि, एने पृथ्वीपोर हि तान शक्ती केरी निर्माण एय गीयो हि, काही पुण ओहलो डोलाकेरिन देखानारो या नाह देखानारो ओहलो, सिंहास ओहलो कि राज्य, जर कूण शासक ओहलो वा जर अधिकारी, आखा काही तान द्वारे निर्माण किरील हि एने तान केरता निर्माण एय गीयो हि.

¹⁷ आखामाय देखील ताणुच अस्तित्व एता, ताणुच शक्ती केरी आखा वस्तु बोणावीन रेतेह.

¹⁸ तोज शरीर, म्हणजे कलीसियान मुंड हि; तोज पेल्लो एता, एने मोरना मायरीन जीवतालू उठणे आखामारीन मोठो अधिकारी पुण तोच हि जानकेरता प्रत्येक वातून पेल्लो ताजागेन ताहुच जूळनू.

¹⁹ काहाकाय आपणो सामग्रीहेर्यो बोगवानान ताम वास केरणे,

²⁰ एने तान क्रुस पोर वोयतालो रक्तान वजेसे मेल मिलाप केरीन, सोब वस्तून तान वजेसे आपणे मेल केरली, जुवी पृथ्वीपोर वाली एय काय स्वर्गा वाली एय.

²¹ एक टाइम एतो ताहेरया तुमूह आपणो विचार केरीन एने वाईट कामांन बोगवानान केरता एजानल्यो एने तान विरोधी एता;

²² पुण ऐवी ताहेरया मसीह आपणो शरीर माय एतो तेवी मसीहान मृत्यूद्वारे स्वयं स्वताहा लीन मेल जानकेरता तुमूह स्वताहा पवित्र एने निष्कलंक, एने निर्दोष बोनाडीन प्रस्तुत केरीह.

²³ जर तुमूह विश्वासाम मसीहा माय अटल बोणीन रेवू, एने सुवार्तान आशा जीह तुमु होमेल चुकील हेते तीह मां सुडहू, जान पोरचार आकाशामाय बुंबोगवानानाली आखी सृष्टीमाय केराय जाईल हि, एने मी, पौलुस, ताणुच दास बोणील हि.

कलीसियान दास-पौलुस

²⁴ ऐवी देखू मी तुमरीकेरता जे मेहनत केरतीन हि, तामाय आनदान अनुभव केरतीन हि, एने मसीहान देह म्हणजेच कलीसियान केरता, मसीहान क्लेशाने जे काही थोडो रेणा एता, ताह आपणो शरीराकेरिन पुरो केरीन हि.

²⁵ बोगवानान तुमरो फायदान केरता माहु जो आदेश आपील हि ताफाय मी तान दास एनो हि, जानकेरता का मी बोगवानान वचन पुरो रीतीमाय पोरचार केरू सेकहु.

²⁶ हे रहस्य पुरो खेरो हि का, जो पेल्लो काळी आखांन मोनाम एतो पुण ऐवी ज्या बोगवानान द्वारे पवित्र माणहा प्रकट एनो हि.

²⁷ जो बोगवान प्रकट केरणेन ईच्छा एती, का तांह मालूम जोवी का दिहरी जातीमाय ती वातीन मोल काय हि, एने तो ज्यो हि, का मसीहान जी महिमान आशा हि तुमु माय रेणें,

²⁸ जान पोरचार केरीन आमु आखा माणहा ताणुच शिक्षण आपथु तोहोलोच आपणो आखा बुद्धीसी प्रत्येक माणहा ताणुच शिक्षण आपतेन असतो, जानकेरता कि प्रत्येक माणहा मसीहा माय बोणावीन बोगवानान ओगाण उबरीयेल किरील जाणे.

²⁹ मी ज्याह प्रयोजनान मसीहान शक्ती केरी जो कुणबी शेक्तीसे काम केरतीन हि, संघर्ष केरीन कठोर मेहनत केरतीन हि.