प्रेरितान काम 9 - नाहाली

पौलुसन ह्रदय परिवर्त

¹ शाऊल जो ऐवी वूर प्रभुन चेलाह धोमकाडणे एने मार टाकणेन धूंन माय इतू, तो महायाजकाफाय गीयो.

² एने ताफायरीन दमिष्कान आराधनालय नावापुर मांग केरीन अधिकार पत्र पासाणरीन लीईल तान ताजागेन कूण ज्याह पंथानेन कूण चेला मिलील ओवतो तो माणहे काय बायकू, तेभी तो ताह अटक केरीन ताह तो बांधीन यरूशलेम माय लीन जाणे.

³ ताहे-या तो चालणे तो दमिष्क शहरान आहनी पोचना, तेवी उचकाहूस तान आजुबाजू आकाशा मायरीन उजालो पोसारना,

⁴ एने तो जोमनि पोर पोडील एने तान एक आवाज होमलील तामाय तो कियील, “शाऊल, ओ शाऊल, तू मारो त्रास काहा करने?”

⁵ पौलुस ने फुसील, “प्रभु तू कूण हीच? मी यीशु हि, ज्यान तू त्रास देणे.

⁶ पुण ऐवी तू उबरील रीवू, एने नगरामाय जा, ताजागेन तुवाह केणेम आवी कि तुवाह काय केरुहू हि.”

⁷ जे माणहे ताहेऱ्यो प्रिनास केरतीन एता, ते ठावको उबरीयेल एता; तास आवाज तर होमलील पुण कूण देखील नाहं.

⁸ तेवी तो शाऊल जोमनिपुरीन उबरील रेणू पुण ताहे-या तान आपणा डोला उघाडील तेवी तो काय भी देखहुं शकील नाहं, तेवी ते तान आथ देरावीन ते ताह दमिष्कात लीन गीया.

⁹ ती दिह ताहवोर तो काय भी देखहुं शकील नाहं, एने काय भी खादो नाहं, एने काय भी पियली नाहं.

¹⁰ दमिष्कामाय हनन्याह नावान एक चेलो एतो, प्रभुने केयेल दर्शन आपील कियील, “हनन्याह, तेवी तो प्रभुह बोल्णु, प्रभु मी न्या हि.”

¹¹ प्रभुन ताह कियील, “उबरील रीवू एने हास केरीन नावान वाटी पुर जाव यहूदान गिर तार्शीस शाऊल नावान माणहान होदणे केर काहाकाय प्रार्थना केरतीन हि.”

¹² एने ता होपनामाय देखील हि का हनन्याह नावान एक व्यक्तीने गिर आवीन तापोर आथ मेलील हि ज्यानकेरता का ताह नेजेर प्राप्त एनु,

¹³ हनन्याह ने उत्तर आपील, “हे प्रभु, मी ज्याह व्यक्तीनबाराम जुलुम माणहा फायरीन होमलील हि, यरूशलेम माय तारो संताहे-यो तान वाईट काम किरील हि ता आखा मी होमलील हि;

¹⁴ एने न्या पुण हा मुख्य याजक फायरीन तारो नावापुर, विश्वास केरणाहारा अटक केरणेन अधिकार लीन आवा हि.”

¹⁵ पुण प्रभु ताह कियील, “तू जातरी; काहाकाय ज्यो ते, दिहरी जातीन, राजा, एने इस्राएल माणाहान ओगांण मार नाव प्रकट केरणे केरता एक निवाडील पात्र हि.

¹⁶ मी स्वता: ताह हे आखा केनार हि जे ताह मारो नावान सहन केरणू लागणार हि.”

¹⁷ तेवी हनन्याह जाहू लागिल एने ता घेरान आहने पोचना, एने शाऊलपुर तान आथ मेलील एने कियील, “बाहाक, शाऊल, प्रभु यीशु माहु मोकलील हि जो तारो मार्गाम प्रकट एनो एतो तान केरता का तुवाह दृष्टी प्राप्त एनु एने पवित्र आत्मा माय पुरो एने जुवी.

¹⁸ ओवतो चालूच तान डोलामरीन निवरनु सारखी वस्तु पुडील एने ताह पोशो देखणे लागिल तो उबरील रेणू एने तान बाप्तिस्मा लियेल;

¹⁹ ओवतो तान जारिक जेवण केरील तां बाद तान आपणी शेक्ती पोशो प्राप्त केरील.” तो दमिष्काम चेला हेऱ्यो काही टायमाउर रेणू.

दमिष्काम पौलुसान पोरचार

²⁰ ओवतो तो हेल्लीच यहूदी धर्म आराधनालय माय गीयो एने यीशुन पोरचार केरूह लागिल, तो बोल्णु, “हा यीशु बोगवानान सोरो हि.”

²¹ तान केरता कूण तान हे होमलील, चक्कित एय गीयो एने केया, “काय हा तोच नाहं, जो यरूशलेमाय यीशुन नावाम विश्वास केरणाहारा तो नष्ट केरतीन एतो, एने काय हा न्या देरणे केरता, एने मुख्य याजकान ओगाण लीन जाणेन आवा नाहं एतो?”

²² पुण शाऊल जास्तीच जास्ती शक्तीशाली एते रेणू, एने जी वातीन प्रमाण आपी-आपिन का यीशु ज्योस मसीह हि, एने दमिष्कामाय रेणारे यहूदीन मूय बोंद केर्ते रेतालू

²³ जुलुम दिह इयील, ताबाद यहूदी ताह मारणेन होमच्यू केरील.

²⁴ पुण तान योजनान बारामाय शाऊलाह मालूम एय गीयो, का ते नगर बांयणामाय रातनेदीही ताह घात केरणेन फिरीन एता तान केरता ताह मारीन टाकणे.

²⁵ पुण तान चेला रातीन टाइम ताह लीजायल, एने पाटीमायरीन गावकुसापोररीन ताह बुंदे सोडीन उतारील.

यरूशलेम माय पौलुस

²⁶ ओवतो ताहेरया तो यरूशलेम माय पोचना तो ता चेलाह जुडणे प्रयत्न केरूह लागिल; पुण ते ताह आखा बियीईन एता, ताह विश्वास एता नाह एतो कि तो पुण एक चेलो हि.

²⁷ पुण बरनाबस ताह प्रेरितान आहने लीन गीयो एने तान ताह कियील कि पौलुस ने आपणो मार्गाम यीशुह केवी पाहिलेव प्रभु ताहे-या कोहलो बोल्णु एने दमिष्कात तान किहीकेरिन निर्भयताने यीशुन नावान पोरचार किरील.

²⁸ ओवतो पौलुस ताहेऱ्यो यरूशलेम माय स्वातंत्र पूर्वक आविह जात एतो तो धैर्याने प्रभुन नावान प्रिनचन बोलीह एतो.

²⁹ तो यूनानी भाषा-भाषाम यहूदयाहोस बोलीह एने चर्चा केरतीन पुण ते तर ताह मारणेन प्रयत्न केरतीन एता.

³⁰ पुण बायाक ताहे-या हि वात मालूम एनी तेवी ताह कैसरात लीन गीया एने ओवतो ताह तार्शीस पोसाळणे.

³¹ ज्यानहोस योग्य यहूदी, गलील एने शमरोन ज्याह कलीसियाम तो टाइम शांततामाय गीयो ता कलीसिया होवटो शक्तीमान एता, गीया कारण ता कलीसिया मायरीन माणहे प्रभुह बियीन आपणा जीवन जगत एता एने पवित्र आत्मान ताह उंजू होवटो प्रोत्साहित किरील एता, तेवी तान संख्या वोळतेच गीयी.

लोड एने याफामा पतरस

³² ओवतो ता योग्य क्षेत्रामाय फिरीन फिरीन पतरस लोद गावाम जे विश्वासी माणहे एता, ताह मिलने केरता आवा.

³³ ताजागेन ताह अनियास नावान एक माणुह मिलील जो आठ वरह्यारीन खाटलापुर एतो, ताह लखवा एनो एतो.

³⁴ पतरस ताह कियील, “हे अनियास, यीशु मसीह तुवाह हाजो केरीह, उठ एने तारो आथरील वीस तेवी तो चालूच उठीन उबरीनू

³⁵ ओवतो लोद एने शारोन माय रेणारे आखा माणहान ताह देखील एने ते प्रभु उगे वोलना.”

³⁶ याफा माय तबिथा नावान एक चेलो रेथे एती ज्यान अनुवाद हि दोर्कास अर्थात हरिन ती कायम हाजो हाजो काम केरतीन एती एने गारीबांह दान आपतेन एती.

³⁷ तान ती दुखारया पोडीन एती एने मरण गेई तास तीन देहाद उघाडीन मांडीपूरिनाला खोलीम मिलना.

³⁸ लोदहे गाव याफा आहानीच ईतुतेवि चेला हे होमलील पतरस लीददा माय हि, तेवी तास ताफाय दुय माणुह मोकलील कि ते ताह विनंती केरीन जैलदी जेल्दी आम्हुफाय आवु.

³⁹ तेवी पतरस तियार एईन ताहेर्यो निकलील, एने ताहेरया पतरस ताहारी पोचना तेवी ताह मांडी पुरिनाला खोलीम लीन गीया ताहारी आखा विधवा दुख केरतीन एने तीन कुर्ते एने दिहरा फाडका ज्याह दुर्कस ने ताहेरया ती ताहेर्यो एती बोणावणेन एता दिखिह तीन आजुबाजू उभी रेणी.

⁴⁰ पतरसाने आखाह बाहेर काडीन आपील, एने माडापोर आवीन तान प्रार्थना केरील ओवतो प्रेताफाय बोहीन तान कियील, “तबिथा उभी रीवू” तेवी तिने आपणा डोला उगाडना एने पतरसाला देखीन उठीन बोहनी.

⁴¹ ओवतो पतरसाने तीह आथ आपील उभी केरील एने पवित्र माणहा एने राडांयेल हादाडळीन तीह जीवताली ताह होपीन आपील.

⁴² आखा याफा माय आखाह मालूम एय गीया एने जादा माणहान प्रभु पुर विश्वास किरील.

⁴³ ओवतो याफा माय शिमोन नावान एक चामडा कोमावणार चामडान धंदा पतरस जादा दिह थोबील.