प्रेरितान काम 27 - नाहाली

पौलुसाह रोम मोकेलणो

¹ ताहे-यो जो निश्चित एय गीया कि आमु नावद्वारे ईटली माय जाहू, तेवी तास पौलुस एने काही दिहरी केधीह पुण युलीयुस नावान ओगोस्तुसान पलटण एक जमादारान आथे होपीन आपील.

² अद्र्मुतीय एक नावीपोर जी आशियान मेरापूर जागीपोर जाणेपोर एतो, चेडिन आमु ताह उगडीन आपील, एने अरिस्तर्खुस नावान थीस्सलुनीका एक मासेदोनिया आमरा हेरी एतो.

³ दिहीरा एक दिह आमु सिदोनामाय लंगर टाकील, एने युलीयुस पौलुसा पोर क्रुपा केरीन ताह दोस्ती आहने जाहू आपील कि तान सत्कार किरील जाऊ.

⁴ तारीन जहाज उगडीन साइप्रस च्या विरुद्ध ला कारणाने आमु कृपेने तीवूगी माय चालणे;

⁵ एने किलकीया एने पंफुलीयाम आहनेन समुन्द्रमाय निकलीन लुक्या प्रांतामाय मर्या माय उतोर्णो.

⁶ ताहारी जमादाराह सिकांदरियान ज्यान एक नाव ईटली माय जातालून मिलना, एने ताह आमूह तापोर चेढाविन आपील.

⁷ ताहेरया आमु जादा दिहावोर बागे-बागे चालतो कृप्राच्या कनिदासमोर पोचेल, तर जानकेरता कि हवी आमूह ओगाण जाहू आपतेन नाहां एती, सलमोना समोरण आवीन क्रेतच्या तीवूगी एनो;

⁸ ओवतो आमु मोठली प्रयत्नांसे तान ठेक-ठेकीन हाजी माकड्यो नावान जागापूर आवूह तान आहने लसया नगर एता.

पौलुसान अंदाज़

⁹ ताहेरया जादा दिह एय गीया एने जल दिह निवरीन गीया एता सेवट उपास पौलुस हे केयीन होमजाडील.

¹⁰ “हे प्रियांनो, माहु इही देखाह कि आवो प्रिनासाम आफेत एने जादा हानी, नाहं केवळ माहु एने नावीन नापून आमरा जीवान पुण एय हि.”

¹¹ पुण जमादाराने पौलुसुसान वातुहू एने जहाजान स्वामिना वातुहू वोदिन मानणनये.

¹² तो माकड्यो थंडी फेरणेन केरता हाजो नाह एतो, तान केरता जादा जाणाह विचार आवा कि तारीन जहाज उगडीन केध्दीह कायताहा रीतीमाय एहू शकेल तर फिनिक्स पोचाडीन हियालू मोकलीदेईल, हे तर क्रेत चा एक माकड्यो हि जो दक्षिण पश्चिम एने उतरील उगे पोचणे.

समुद्राम तुफान

¹³ ताहेरया थोडो थोडो दक्षणी हवी चालू एनी, तेवी हे होमजाडीन कि आमारो बेत पुरो एय गीयो हि, एल उखीलील एने मेरू देरीनुच क्रेते जाहू लागिल.

¹⁴ पुण थोडच टायमामाय बूईमरीन मोठा वादलो उठना, जे यरकलोन कियील जातेह.

¹⁵ ताहेरया वादलो नावीपोर आवहू लागिल तेवी ते ताह थोबविण थाकील नाहं सेवट आमु ताह वोयहू आपील एने आवो रीतीमाय वोयतालोन निकलीन गीयो.

¹⁶ तेवी कौदा नावान एक आत्योस बेटान तीवूगी माय वोयतालो आमु केष्टासे आमु नावीन वंशात केरूह शकू.

¹⁷ ओवतो योजनाकेरीन विसीन आमु उपाय केरूह नावीन बुन्देरीन बाधील एने ते सुर्ती नावान भाटीपोर टेकणेन बियान शीड एने हारका उतारीन वोयतालोन निकलीन गीया.

¹⁸ ताहेरया आमूह वादलाह रीन जुलुम धक्के खाले तेवी दिहीरा एक दिह ते जहाजान माल टाकहु लागिल.

¹⁹ एने तिसऱ्या एक दिह तास आपणो आथान नावीन आखोच हारका पुण टाकील आपील.

²⁰ ताहेरया जादा दिहावोर नाहं सूर्य नाहं चांदण्यो देखा एने वादलो चालतेच रेणा, तर सेवट आमरी वोचनाने आखा आशा जात गीयी.

²¹ ताहेरया ते जादा दिह ताहवोर उपाशी रेयीन गीया तेवी पौलुसुसाने तामाय उबरीयेल रेयीन कियील, ज्याह माणहे मारा होमलने जुवी एता कि क्रेत तारीन नाहं नाव सुडील एती एने हि सेंकट आवी एती एने नाहं हि हानी वीसने लागिल एती.

²² पुण ऐवी मी तुमूह सोमजीह कि धेर्य देरू, कारण तुमरो मायरीन कुणीन जीवाह हानी एय नाहं पुण केवळ नावीन एय.

²³ कारण कि बोगवान ज्यान मी हि एने ज्यान सेवा केरता तान स्वर्गदूताने आज राती माहफाय आवीन कियील,

²⁴ हे पौलुस बिय मा, तुवाह कैसरान ओगांण उबरेणेन जरुरी हि. एने देख, बोगवानान तान करूणामाय जां तार हेऱ्या प्रिनास केर्तेह, तुवाह आपील हि

²⁵ जानकेरता हे बायहो, धेर्य देरू काहाकाय बोगवानापोर विश्वास करने, कि जाणेन माहु कियील गीया हि तोहोलोच एय.

²⁶ पुण आमूह कायताहा तेभी बेटापोर जाइन थोबज्यू लागी.

जहाजन टूटणो

²⁷ ताहेरया चौदावी रात आवी एने आमु आंद्रिया समुद्रा माय भटकत रेणा तेवी अर्ध्या रातीन सुमारास बुदेन माणहाह जानवी कि आमु कानलु तेभी देशानआहणे पुचनु हि.

²⁸ बुडीत टाकील तेवी वीस वाटे भूरील, एने थोडोक ओगाण वोदिन उंजू मोजील तेवी पंधरा वाटे आवा.

²⁹ तेवी देगडान जागाने ठोकर लागणेन बियमाय तास नावीन पासाण चार एल टाकील एने वेगीस एयनेण वाट देखहुं लागिल.

³⁰ पुण ताहेरया मल्याह नावपोररीन पाळायला ईच्छा एता एने खेट्टीपुरीन हि एल टाकणेन बाहानासे खलाशी समुद्रा माय उतारीन आपील.

³¹ तेवी पौलुसुसाने जमादार एने सैनिकांना कियील, केध्दीह हे नावीपोर रीवू, तुमूह पुण तामाय वोच शकत.

³² तेवी सैनिकांनी दोयडी काटीन पोडहुं आपील.

³³ तेवी पहाटेच एने पोर एती तेवी पौलुसुसाने हे केयीन आखाच भोजन केरीन केरता होमजाडील आज चोदा दिह एय गीयो कि तुमूह वाट दिखिह उपाशी रेणा एने कायीच खाले नाहं.

³⁴ जानकेरता तुमूह होमजाडणे कि काही खाइन ली, ज्यासे तुमरो वोचाड एय काहाकाय कि तुमरो मुडापोरनीन एक लेडया पुण थोडो एय नाहं.

³⁵ हि केयीन तान आखान ओगाण बोगवानान धन्यवाद किरील एने तोडीन खाणेन लागिल.

³⁶ तेवी ता आखा इमुत बांधीन भोजन केरणे लागिल.

³⁷ आमु आखा मिलिन नावीपूर दोनशे शतीस जन एता.

³⁸ जेव्ही ते भोजन केरीन तृप्त एय गीयो, ओवतो तास गोवाह समुद्रा माय टाकील नाव फोवरो केरूह लागिल.

³⁹ ताहेरया दिह निकलनेपुर तास ता देशान ओलखिल नाहं पुण एक बुंदे देखील तीन सपाट मेरू एतो, एने विचार किरील कि केध्दीह एहू शकेल तर न्यापुर नाव टेकाडू.

⁴⁰ तेवी तास एलाह सोडीन समुद्रा माय सोडीन आपील, एने तान टाइम सुकानान बाधाईल ढिल्लो केरील एने जूइ ओगाण ओगांल्या शिढ चेढाविन मेराउखेर निकेलना.

⁴¹ पुण दुय समुद्राम एकठोमेल जागीपोर देरावीन तास जहाज टेकाडील, एने नाळ तर धोका खाइन गच्च एनी एने टालवो शकली नाहं पुण विराम जावटान जोरतीर तुटणे लागिल.

⁴² तेवी सैनिकांन हा विचार एनो कि बोन्दि हेते ताह मारीन टाकहुईही होवो कि, कूण झेपीन निकलीन जाहो.

⁴³ पुण सरदाराने पौलुसाह वोचाळणेन ईच्छा कियील, जो देखहुं शकणे तास झेपीन पेल्ला मेरापूर निकलीन जाणे.

⁴⁴ एने बाकी काही फोलापुरीन, एने काही नावीन फोलापुरीन निकलीन जा. आवो रीतीमाय आखा काही मेरापुरि वोचीन गीया.