प्रेरितान काम 26 - नाहाली

अग्रीपान होम्बुर स्पष्टीकरण

¹ राजा अग्निप्पान पौलुसाहा कियील, “माहु आपणो विषयातमाय बोलणेन हुकुम हि.” तेवी पौलुस आथ ओगाण केरीन उत्तर आपुह लागिल,

² “हे राजा अग्निप्पा, जोलाक वातीमाय यहूदी मारपुर दोष लागडते आज तारो ओगाण ताह उत्तर आपणेन ते आपुहू धन्य सोमाजता हि,

³ विशेष केरीन तान केरता कि तू यहूदी न्यान आखा रीतीरिवाज एने वाद विषयी बाबी होमजनेस मी शेवेट विनंती करने कि धीर देरीन मारा होमलू”

⁴ “मारा चाल चालणो पेल्ला तारीन आपणो जातीमाय एने यरूशलेम इही एता, ता आखा यहूदीयान मालूम एता.

⁵ जर ता गवाही आपुह इच्छिता, तर पेल तारीन माहु ओलकतेह का मी फरीसी एईन आपणो धेर्मान आखान सत्य पंथाप्रमाणे चालहु.

⁶ ऐवी ती प्रतिज्ञा एने आशान कारण से जो बोगवान आपणा वेगालां किथी मारपुर न्याय चालू हि

⁷ तान वाटजोवणु पुरो एयनेण आशा देरीन आमरा बारा वंश आपणो आखा मोनाकेरिन रात दिह सेवा केरतीन आवा आहेहे राजा ज्योच आशान विषयाम यहूदी मारपुर दोष लागडते.

⁸ जो कि बोगवान मुरीलाह जीवतालू करने, तर तुमरो न्या हि वात काय विश्वास योग्य नाहं समजील जातेह?”

⁹ “मी पुण समजील एता कि यीशु नासरी च्या नावापुर विरोधामाय माहु जादा काही केरणे जुवी.

¹⁰ एने मी यरूशलेमाम ओहलाच किरील” एने मुख्य याजकाशी अधिकार मेलावीन जादा पवित्र माणहाह बंदिगृहात टाकील, एने ताहेरया मारील जाहू एता तर ते पुण तान विरोधामाय आपणी संपती आपतेन एता.

¹¹ प्रत्येक आराधनालय माय मी ताह तालताल शासन केरीन यीशुन निंदा केरीन लेतेन एतो तान शिवाय किसवायल ओहलो टाइम लीन गीयो कि बाहेर नगरात पुण जाइन तान त्रास आपतेन एतो.

¹² ज्योच आवाजामाय ताहेरया मी मुख्य याजकान अधिकार एने आज्ञा पत्र लीन दमिष्काकडे जात एतो.

¹³ तर हे राजा तालताल हिरानेन टाइम आकाशापेक्षा सूर्यान तेजारीन एक पेक्षा आपणो एने आपणो हेरी चालणारा चासवुगे चोमेकतेन देखील.

¹⁴ एने जेवी आमु आखा जोमनि पोर पोड गीया, ते मी इब्री भाषा माय माहु ज्यो एक शब्द होम्लाइल, हे शाऊल, हे शाऊल, तू माहु काहा त्रास देथे? टोक्दार डेंगा पुर लात देणेन तुवाह कठीण हि

¹⁵ मी कियील हे प्रभु तू कूण हि? प्रभु कियील मी यीशु हि ज्याह तू त्रास देणे.

¹⁶ पुण तू उठ, आपणो पायापोर उबरील रीवू काहाकाय मी तुवाह तान केरता दर्शन आपील हि का तुवाह आवो वातून भी दास एने गवाही एनु जे तू पेल हि एने तान भी जानकेरता मी तुवाह दर्शन आपील.

¹⁷ एने मी तुमूह तारो माणहाह एने दिहरी जाती मायरीन वोचाणणे रेहू ज्याफाय मी ऐवी तान केरता मोकलथू कि,

¹⁸ कि तू तान डोला उघाडील कि ते आंधारामाय प्रकाशावूखीर एने शैतानान अधिकारा मायरीन बोगवानानाफाय वोलनु म्हणजे पापान क्षमा एने ता माणहान हेरी जे मारपुर विश्वास केरणेन पवित्र किरील गीया हि वतन जूळनू.

¹⁹ ऐवी, हे राजा अग्निप्पा, मी ता स्वर्गीय दर्शनान वात नाह टाली,

²⁰ पुण पेल दमिष्कान, ओवतो यरूशलेमाय रेणाराह, तेवी यहूदीयान आखा देशामाय रेणाराह एने दिहरी जाती माणहाह होमजाडते रेणू, का पश्चाताप केरू एने बोगवाना वूखेर फिरू एने हाजा काम केरू.

²¹ आवो वातून कारण से यहूदी मंदिरामाय माहु मारीन टाकणेन मशीन रेचने एता.

²² पुण बोगवानान कृपेने मी आजवोर हि एने मोठा आत्या आखान ओगाण गवाही आपथु एने आवो वातुहू सोडीन काही नाहं किथी जो भविष्यवाणी केरणे वाला एने मुसान पुण कियील एता कि हे एय हि.

²³ कि मसीहान दुख बोगणे लागी एने तोच पेल्ला मुरील मायरीन जीवतालू एईन आमरा माणहान एने दिहरी जातीमाय प्रकाशान पोरचार केरुहू.

²⁴ ताहेरया तो आवो रीतीमाय उत्तर आपतेन एतो तेवी फेस्तान मोठली आवाजामाय कियील, हे पौलुसा तू विढू हि, जादा ज्ञानासे तू माहु वेढे केरीन आपील हि.

²⁵ पुण पौलुस कियील, हे महाराज फेस्ता, मी विढू नाहं पुण खेरो ते एने ओंगाल्यो वातू किथी हि.

²⁶ राजा पुण ज्यान ओगाण प्रशस्तपणे बोलीह हि वात समाजामाय हि एने माहु विश्वास हि कि आवो वातू मायरीन काही तान तारीन लिकाईल नाहं कारण हि घटना कायताहा कोपरामाय एनी नाहं.

²⁷ हे राजा अग्निप्पा, काय तू भविष्यवक्तान विश्वास करने? होव, माहु मालूम हि कि तू विश्वास करने.

²⁸ तेवी अग्निप्पा पौलुसाह कियील, तू जुलुम थोडो होमजाडणे केरीन माहु मसीही बणावूहू इच्छितो?

²⁹ पौलुसुसाने कियील, “बोगवानान मारी प्रार्थना हि कि काय थोडो माय काय मोकतामाय, फक्त तूच नाहं पुण जोलाक माणहे आज मारा होमेलनू, बायहो जाणाह सोडीन ते मारहोज एईन जाणे.

³⁰ तेवी राजा एने सुभेदार, बर्निका एने तान शी बुहील उठीन उबरीयेल रेणा.”

³¹ एने आलेग जाइन खुदमाय केहू लागिल, “हा माणुह तर कायीच केरतीन नाहं, जो कैद केरता आवी एने बोन्दिखाणो टाकील जाहू.”

³² अग्निप्पा ने फेस्ताह केदा, “जर ज्याह माणहान कैसराकडे न्याय मांगील, नसतू तर ताह मोकला किरील हि.”