प्रेरितान काम 23 - नाहाली

¹ पौलुसुसाने महासभाउगे स्थिर नजर लागाडील देखील एने कियील, “हे बायहो, मी ताहवोर बोगवानान केरता बिलकुल खेरो विवेकान जीवन रीगाडील हि.”

² ज्यापूर हनन्याह महायाजकाने तान आहने जो उबरीयेल एतो, तान मुयापूर चापट मारणेन केरता आज्ञा आपील.

³ तेवी पौलुसुसाने तान कियील, “हे चुनो फिरावील भितडो, बोगवान तुवाह मारुह. तू नियम शास्रा होस मारो न्याय केरणेन केरता बोहील हि, एने ओवतो काय व्यवस्था विरुद्ध माहु मारणेन केरता आज्ञा आपतेन हि?”

⁴ जे आहने उबरीयेल एता तास कियील, “काय तू बोगवानान महायाजकाह हजो वाईट किथे?”

⁵ पौलुसुसाने कियील, “हे बायहो मी ओळखतेह नाहं कि तो महायाजक हि कारण कि लेखील हि, आपणो माणहान प्रधानाला वाईट मां केहू.”

⁶ तेवी पौलुसुसाने ओलखिल का एक भाग सदुकीयांचा एने दिहरो भाग फरीसीचा हि सभा माय आयडीन कियील, “हे बायहो मी फरीसी एने फरीसी वंशाजान हि, मुरीलताहा आशा एने पुनरुस्थान विषय माय मारी चौकशी एता हि.”

⁷ ताहेरया तास हि वात कियील, तेवी फरीसी एने सदुकी यामाय लेढाय एहू लागिल सभा माय होम्च्यू पोडीन गीयी.

⁸ काहाकाय का सदुकी तर हे केणु कि पुनरुस्थान हि, नाहं स्वर्गदूत हि नाहं दुष्ट आत्मा हि, पुण फरीसी आवो आखाच होमोलनु.

⁹ तेवी मोठू हल्ला एनो एने काही शास्त्री जे फरीसीन दावान एता उठीन उबरीयेल रेणा एने हे केयीन लेडानेन लागिल “आमु आवो माणहामाय काही वाईट पेल्ला नाहं, पुण केध्दीह दुष्ट आत्मा एने स्वर्गदूत ज्यामाय बोल्णु एतो, तर ओवतो काय?

¹⁰ ताहेरया जुलुम लेढाय एय गीयो तर पलटणे सरदाराने आवो बियमाय कि ते पौलुसाचे टुकडा टुकडा केरीन तर टाकणे नाहं, पोलटणार आज्ञा आपील कि उतरीन ताह तान गढीत लाव.”

¹¹ ता राती प्रभुन तान आहणेउभरीन रेयीन कियील, “हे पौलुसा, धीर देर, कारण कि जोहलो तू यरूशलेमेन मारी गवाही आपील तोहोलोच तुवाह रोम माय पुण गवाही आपजी लागी.”

पौलुसान खुनान चाल

¹² ताहेरया दिह उजाडील तेवी यहूदी माणहान डाव रेचील एने शपथ लीईल कि ताहेरया ताहवोर आमु पौलुसाह मारीन नाहं तेवी ताहवोर आमरा खाणु एने पिणे जापोर धिकार ओहलो.

¹³ तान केरता आपसामाय हि शपथ लीईल एती ते चाळीस पेक्षा होवटो एता.

¹⁴ तास मुख्य याजक एने डाय डाया आहने जाइन कियील, आमु हे ठाणून लीईल हि कि ताहेरया ताहवोर आमु पौलुसाह मारीन नाहं ताहउर केध्दीह आमु खाले तेभी आमऱ्येपुररीन धिक्कार हि.

¹⁵ जानकेरता ऐवी महासभेमाय पलटणे सरदाराला होमजावू कि ताह तुमूहे-या लीन आवो, मानू कि तुमूह तान विषयी उंजू पुण हाजो रीतीमाय चौकशी केरू इच्छिता एने आमु तान पोहचणेन पेलूच मारीन टाकणेन तियार रेहू.

¹⁶ पौलुसुसान बाणजान होमलील कि ते तान घात केरणेम हि तेवी गढीत जाइन पौलुसाह हा संदेश आपील.

¹⁷ पौलुसुसाने न्यायालयाम लीजाईन एक जाणाह आपणो आहने हादाडळीन हे कियील आवो जुवान्याह पलटणे सरदारफाय लीन जा, तो ताह काही केहू इच्छितो.

¹⁸ जानकेरता तान ताह पलटणे सरदाराहे-यो लीन बातम्यू कियील, बंदी पौलुसुसाने माहु हादाडळीन विनंती केरील कि हा जुवान पलटणे सरदाराला काही केहू इच्छितो ताह तान आहने लीन जा.

¹⁹ पलटणे सरदाराने तान आथ देरावीन एने बाजूमाय लीन जाइन फुसी, तू माहु काय केहू इच्छितो?

²⁰ तान कियील, यहूदी माणहान होमच्यो रेचील हि कि तुवाह विनंती केरूह कि हेकाले पौलुसाह महासभेमाय लावो, केह कि उंजू तान हाजी तापासणी केरूह इच्छितो.

²¹ पुण तान मानू मां कारण तामायरीन चाळीस जनावर माणुह तान घातावर हि तासहे ठाणून लीईल हि कि जो ताहवोर ते पौलुसाह मारीन नाहं ताहउर ते नाहं खाण्यू नाहं पिनार एने ऐवी ते तियार हि एने तारो वचनाने वाटजोवणु केरतीन एता.

²² तेवी पलटणे सरदाराने हि आज्ञा आपील सोडीन आपील कि कुणीहुच ज्याह वातू केणेन नाहं कि तू माहु ज्याह वातू केदाह हि.

पौलुसाह कैसरिया मोकेलणु

²³ तेवी तान दुय सुभेदारान हादाडळीन कियील दोनशे सैनिक, सत्तर माफ एने दोनशे मोलकरी इही प्रहर रातीच कैसरीयाम जाणेन केरता माफ घोडा तियार मेलू कि ताह कैसरान न्या जाणेन केरता तियार केरीन मेलू.

²⁴ एने पौलुसुसान माफ केरता घोडा तियार मेलू कि ताह फेलिक्स सुभेदारामाय होमालीन पोचाडीन द्या.

²⁵ तान आवो प्रकारची चिठी पुण लिखील.

²⁶ मात्र सभेदार फेलिक्स सुभेदाराह क्लौदिमुस लुसियान सलाम.

²⁷ आवो माणहाह यहूदी देरावीन मारीन टाकु इच्छिमाय पुण मी जाणिल कि हा रोमी हि तर पलटण लीन सोडवीन लावील.

²⁸ जो जाणहु इच्छितो कि ते तापोर कायताहा कारणाने दोष लागडते जानकेरता कि तास तान महासभेमाय लीन गीयो.

²⁹ तेवी मी ओलखिन लीईल कि आपणो व्यवस्था वचनमाय विषयामाय तापोर दोष लागाडणुपुण मारीन टाकीलपोर केव्ही बांधीन जाणू योग्य तामाय कुणीबी दोष नाहं.

³⁰ ताहे-यो माहु कियील गेल कि ते ता माणहान घातात लागिल हि तर मी तात्काळ तुमरीफाय मोकलीन आज्ञा आपील हेते एने वादींना हि केस चालाळणे.

³¹ सेवट जोहलो सैनिकांना आज्ञा आपील गीयी एती तोहोलोच ते पौलुसाह लीन रातीन अंतीपत्रीस माय लीन आवा.

³² दिहीरा एक दिह ते जीकील तान हेरी जाणेन केरता सोडीन स्वताह गढीत पोशा आवा.

³³ तास कैसरिया पोचाडीन सुभेदाराह चिठी आपील पौलुसाह पुण तान ओगाण उबरीयेल किरील.

³⁴ तान चिठी वाची फुसील, “हा कायताहा प्रारानतान हि?”

³⁵ तेवी ताह कियील, “ताहेरया तारो गुनोरेचनारो पुण आवी, तेवी तारो मुकद्दमा केरूह.” एने तास ताह हेरोदेसान केरता वाडाम मेलणे आज्ञा आपील.