प्रेरितान काम 21 - नाहाली

यरूशलेम ने यात्रा

¹ ताहे-या आमु ताहे-या आलेग एईन नाव उघाडील, तेवी मीठ मार्गाने कोसास आवा, एने दिहरा एक दिह रुदास माय एने तारीन पतरा जाईल.

² ताहारी एक नाव फेनिकेसमाय जातालून जुडी, एने आमु तापुर चेडिन ताह उगडीन आपील.

³ ताहे-या आमूह साइप्रस देखा, तेवी ताह आमु डाखरीउगी टाकील, एने सिरीया उगे जाइन सोराला उतरील; केरू ताहारी नावीम रीन माहु उतारू एता.

⁴ चेलान हेरी आमु ताहारी सात दिह रेणा. तास आत्मान द्वारे आमूह हिकाळनेल पौलुसाह कियील कि यरूशलेम ला पाय पुण मेलूह मां.

⁵ तेवी ता दिह पुरो एईन गीया, तेवी आमु तारीन निकालनु एने आखा बायकू एने सोरा हेरी आमूह नेगरान बाहेर ताहवोर पोचाडील; एने आमु मांडा टेकिन समुन्द्र मेरापूर प्रार्थना केरील,

⁶ ओवतो एक दिहरा तारीन सेटो एईन, आमु नावीम चीढील एने ते पोशा आपणो गिर गीया.

⁷ ओवतो आमु सोरा फायरीन जल प्रिनास केरीन प्रलमेसात पुचील एने बायहो जाणाह सलाम केरीन तान हेरी दुय दिह रेणा.

⁸ दिहीरा एक दिह आमु तारीन चालीन कैसरात आवूह एने फिलीप सुवर्तान घेरामाय जो सात मायरीन एक एतो जाइन तान गिर रेणा.

⁹ तान चार कुवारी सोरी पवित्र एती ता भविष्य आवाज केरतीन एता.

¹⁰ ताहे-या आमु ताहारी मोक्तास दिह रेणा, तेवी ताहारी अगब नावान एक भविष्यवक्ता यहूदीफायरीन आवा.

¹¹ तो आमुफाय आवीन पौलुसाचे कोमेरपोट्टो लियील एने आपणा आथ पाय धुवू लागिल एने कियील, पवित्र आत्मा हे किथी हि कि ज्या माणाहान हे कमरबंध हि ताह यरूशलेम माय ज्याह प्रकारे यहूदी ती एने दिहरी जात्यूह होपीन आपती.

¹² ताहे-या आमु हि वात होमेल्नी तेवी माणहान ताह ताच रेणेन विनंती केरील एने कियेल यरूशलेम ला जाहू मा.

¹³ पुण पौलुसुसाने उत्तर आपील, तुमूह काय केरणू कि रेडीन रेडीन मारा मोन दुखाडतेहे? मी तर प्रभु यीशुन नावाकेरता यरूशलेमेन नाय तर बांधणेकेरता म्हणजे मोरने केरता पुण कि तियार हि.

¹⁴ ताहे-या तो होंबलेह आमु हे केयीन ठावको रेणा “प्रभुन ईच्छा पुरो होवो.”

¹⁵ आवो दिह ओवतो आमु तियारी केरील एने यरूशलेमाम जाईल.

¹⁶ कैसरारीन पुण काही चेला आमरा हेरी आवा एने आमूह म्नासो नावान साइप्रसतील एक जुनो चेला एतो ताफाय लीन आवा कि आमु तान न्या रिजी.

पौलुसान यरूशलेम माय आवणो

¹⁷ ताहे-या आमु यरूशलेमेन पुचनु तेवी बायहो मोठली आनंदम आमूह मिलना.

¹⁸ दिहीरा एक दिह पौलुस आमूह याकूबाफाय लीन गीयो ताहारी आखा डाय डाया वर्ग एक्ठाच एता.

¹⁹ ताहे-यो तान ताह नमस्कार केरीन जे जे काम बोगवान तान सेवान द्वारे दिहरी जातीमाय किरील एता एक एक केरीन आखा कियील,

²⁰ तान हे बोगवानान महिमा किरील, ओवतो तो कियील, हे बायहो, तू दिखिह हि कि यहूदीयान एजारो विश्वास किरील हि एने आखा व्यवस्थाह धुन मानणारे हि.

²¹ ताह तारो विषयातमाय हिकाडील गीया हि, तू दिहरी जातीमाय रेणारे यहूदीयान मुसान त्याग केरीन केरता हिकाडणे एने किथे कि आपणो सोरो खतना केरूह नाहा एने परिपाठाप्रमाणे चालू नाहा.

²² तर ओवतो काय किरील जाणे? माणहे अवश्य होमबोलणार कि तू आवा हि.

²³ तान केरता जे आमूह किथे हे केरू आमरा न्या चार माणुह हि तान केरता मान्ता किरील हि.

²⁴ ताह लीन तां हेर्यो स्वताह शुद्ध केर; एने तान केरता खेर्चो आप, का ता टाली केरावती. तेवी आखा जाण लेती, का ज्यू वातू ताह तार विषय माय हिकाडील एत्यू, तान कायीच जेड नाह सोतो पुण तू भी व्यवस्थाह मानीन तान अनुसार चालणे

²⁵ पुण ता दिहरी जातीन विषयी तान केरता विश्वास किरील हि, आमु निर्णय लेईल हेते एने लेखीन मोकलील हेते का मूर्तीन ओगांण चेढाविल माह एने रक्ताह से एने गेलु दाबीन मारील माह से एने व्यभिचार से वाचीन रेवू

²⁶ तेवी पौलुस ता माणहाह लीन. एने दिहीरा एक दिह तान हेरी शुद्ध एईन. मंदिरामाय गीयो एने ताहारी केयीन आपील कि शुद्ध ला एक दिह म्हणजे तामायरीन प्रत्येक जाणाह अर्पण लेणेवोर दिह केवी पुरो एय.

मंदिरामाय पौलुसान देराणेन

²⁷ ताहे-यो तो सात दिह पुरो एने पोर एता तर आशियान यहूदी ज्याच पौलुसाह मंदिरामाय देखीन आखा माणहाह खिजवाळणे एने खेचीन ताह देरील.

²⁸ “हे इस्राएल माय वाला मदत केरू, ज्यो तोच माणुह हि, जो माणहान, एने व्यवस्था, एने ज्या जागान विरूधमाय प्रत्येक जागीपोर आखा माणहाह हिकाडीह, न्यावोर का यूनानीह भी मंदिरामाय लावीन तो ज्या पवित्रस्थानाह अपवित्र किरील हि”

²⁹ तान पेल्ला इफीसीयोकर त्राफिमाय तान हेरी नगरात पेल्ला एता एने होमजाडणे एता कि पौलुस ताह मंदिरामाय लीन आवा एतो.

³⁰ तेवी पुरो सेहेरामाय गाबराय गीयो एनो एने माणहे दोवळीन याहारू आवा एने पौलुसाह देरीन मंदिरान बाहेर लेहेकीन लावील एने जेल्दी बायणो बंद किरील जाणे.

³¹ ताहे-यो तो ताह मारीन टाकणे एता तेवी ते शिपाई एने सरदाराला माहिती जुडी कि पुरो यरूशलेमाम गडबड उडनी.

³² तेवी ते जेल्दी शिपायान एने सुभेदाराह लीन ताफाय बुंदे दोवळतीन आवा एने तान शिपायांच्या सरदाराला एने सैनिकान देखीन पौलुसाह मारनु झोडणे सोडीन आपील.

³³ तेवी शिपायांच्या सरदाराने आहने आवीन ताह देरावीन लीईल एने दुय हाकली केरीन बांधणेन केरता आज्ञा आपील फुसहु लागिल, हा कूण हि एने याने काय किरील हि?

³⁴ पुण गेर्दी मायरीन कूण काय ते कूण काय आयेडते रेणा, एने जेवी गर्दीमाय तो हेचकेरीन खेरो न्याय होमजी नाह शेकील ते ताह गेर्दीम लीन जाणेन आज्ञा केरील.

³⁵ ताहे-यो तो पाय-यापोर पोचना तेवी इही एय गीयो कि गर्दीमुळे शिपायांनी ताह विसीन लीन गीया.

³⁶ कारण माणहान गेर्दी हे आयेडतेन तान पासाण चालतो एती, तान नाश केरीन द्या.

³⁷ जेव्ही ते पौलुसाह गढीत लीन जाहू एता, तेवी तान शिपायांच्या सरदाराला कियील, “काय माहु आज्ञा आपथो का कि मी ताह काही केहू?” ताह कियील, “काय तुवाह यूनानी भाषा आवी का?

³⁸ काय तू तो मिस्री नाहं, जो आवो दिहान पेल्ला बंद, उघाडीन चार हजार देणाराह जेंगलामाय लीन गीयो?”

³⁹ पौलुस कियील, “मी तर किलकीयातील तार्शीस यहूदी हि, मी तुवाह विनंती करने कि माहु माणहाहे-यो वातू केरूह द्या.”

⁴⁰ जेवी तो आज्ञा आपील, तेवी पौलुस पाय-यापोर उबरीन रीन माणहाह आथा केरीन इशारू केरील. जेवी ता ठावका एना तेवी तो इब्री भाषामय बोलणे लागिल.