प्रेरितान काम 18 - नाहाली

कुरिन्थुसमाय में पौलुस

¹ ज्याबाद माय पौलुस अथने सोडीन कुरिन्थियो चालहु गीयो.

² ताजागेन तो पुंत्तुस चे रेणारे अक्विला नावान यहूदयाला मिलील, तो तान टायीमा आपणो लाडी प्रिस्काला हे-यो ईटलीहून आवा एतो. तास ईटली तान केरता सुळील एता, कि क्लौदिमुस ने आखा यहूदी माणहाह रोम मायरीन निकलीन जाणेन आदेश आपील एतो, तेवी पौलुस ताह मिलने गीयो.

³ काहाकाय तान कामधंदा एकुच एतो तेवी तो ताहेर्यो रेणू एने काम केरूह लागिल तान व्यवसाय तम्बू बणावणे एतो.

⁴ आखा शब्बाथ एक दिह तो यहूदी धर्म आराधनालय माय वादावाद केरीन यहूद्यान एने यूनानी माणहाह खात्री केरीन आपतेन इही.

⁵ ताहेरया ते मासेदोनिया रीन सिलास एने तीमुथियुस आवा तेवी पौलुसुसाने आपणो आखोच टाइम वचन पोरचार केरणेन केरता लागाडया एतो तो यहूदयान हे प्रमाणित केरतीन एतो कि यीशु जोस मसीह हि.

⁶ ताहे-या तास तान निंदा किरील एने ताह हाजो शब्द नाह केया तेवी तान तान विरोधामाय आपणा कपडे झेटकीन ताह कियील, तुमरो रक्त तुमराच निडालापूर हिकाडणे तामाय मी निर्दोष हि ऐवी मी ओगाण दिहरी जातीन उखेर जाहू.

⁷ एने पौलुस चालीन तीतुस यूस्तुस नावान बोगवानान एक भक्तान घेरामाय आवु, तान घेर प्रार्थना आराधनालय हेर्यो लागिन एतो

⁸ क्रिस्पूस जो यहूदी प्रार्थना आराधनालयान अधिकारी एतो आपणो योग्य गीरिनालाहे-या प्रभु माय विश्वास किरील एतो ताहेऱ्यो ता मोक्तास कुरिन्थियो करांनी तान केरता पौलुसाचे वचन होमलील एता तास विश्वास केरीन बाप्तिस्मा लियेल.

⁹ एक राती होपनाम प्रभुने पौलुसाह कियील, “बिऊ मां, बोलीह रीवू एने ओगाण रेहू मां.”

¹⁰ काहाकाय मी तारहेऱ्यो हि तारहेऱ्यो लेढाई केरीन कूण पुण तुवाह हानी पोचाडणार नाहं कारण ज्याह नगरामाय मारा मोक्तास माणहे हेते.

¹¹ ताहरी पौलुस दीड वो-यावोर बोगवानान वचन तामाय हिकाडतेन रेणू.

¹² ताहे-या अखयान राज्यपाल गलीयो एतो तेवी यहूदी एकटाह एईन पौलुसापुर चेडिन आवा एने ताह देरावीन न्यायालयाम लीजाईन आवा.

¹³ एने केया, हा माणुह माणहाह बोगवानान आराधना ओली प्रकारे केयीन बोहकाडणे हि कि जे व्यवस्था बाहेरिनाला हि.

¹⁴ पौलुस ऐवी आपणा मूय उघाडन्यूस एतो तेवी गलीयो ने यहूदयाला कियील, हे यहूदियानो, जर हा विषय काल्लोबी कठीण अपराधान रेणू येतो तर तुमरो होमालणे मारकेरीन न्यायसंगताम एता.

¹⁵ पुण जर ज्यो वादी-विवाद शब्द, एने नावे, एने तुमरे न्यावाला व्यवस्था विषय माय हि, ते तुमु जाणे; काहाकाय मी ज्यू वातून न्यायी बोणणेन नाह होदीत.

¹⁶ एने तान ताह न्यायालयामायरीन बाहेर काडीन आपील.

¹⁷ तेवी तान प्रार्थना आराधनालयान अधिकारी सोस्थिनेस ला देरावीन दाबिल, न्यायालायान ओगाण ताह मोरू लागिल पुण गलीयो ने न्याफाय थोडोक पुण लक्ष्य आपील नाहं.

अन्ताकियाम पोशो जाणो

¹⁸ “जुलुम दिहापुर पौलुस ता जागापूर थोबील एतो, ओवतो बायहो ताहेऱ्यो किखीता माय लेट्या काटाड्यो, काहाकाय तो वचन लियील एतो एने नावीम सिरीया माय चाल देनो एने ताहेरी प्रिस्काला एने अक्विला एत्यू.

¹⁹ ओवतो ते इफिसुस पोचेल एने पौलुसुसाने प्रस्कीलाला एने अक्विलालाह ता ठीकाणीन सुळील एने तुमूह प्रार्थना आराधनालय माय जाइन यहूदीयाहे-यो बहसकेरहू लागिल,

²⁰ ताहे-या ता ठिकाणावाला माणहान ताह काही दिह उंजू थाबाडणेन कियील तेवी तान ताह नकार आपील.

²¹ पुण तान जातेन कियील, जर बोगवानान ईच्छा रेंय तर मी तुमरेहे-यो पोशो आवी ओवतो तान इफिसुस तारीन नावपूर प्रिनास किरील.

²² ओवतो कैसरिया पोचनेपूर ते यरूशलेम माय गीया एने ता जागापूर कलीसियान माणहान भेट लीईल एने ओवतो तो अन्ताकिया उगे निकलीन गीयो.”

पौलुसान तिसरी पोरचार-यात्रा सुरुवात

²³ ता जागापूर काही टाइम ओडकाडना तान खोबीर लियेल एने गलतीया एने फ्रीगीयाच्या क्षेत्रामाय एक जागे रीन दिहीरा जागापूर प्रिनास केरतीन आखा चेला विश्वास वोदाडीन एतो.

अपुल्लोस नावान माणुह

²⁴ ताजागेन अप्पुलोस नावान एक यहूदी रेथे एतो तो सिकांदरियान रेणार एतो, तो विद्वान वक्ता एतो तो इफिसुस माय आवा एतो शास्त्रान पुरो ज्ञान ताह एता.

²⁵ ताह प्रभुन मार्गान दीशा पुण जुडी एती तो हृदयाम उत्साह बोरीन प्रिनचन हिकाडतेन एतो तोहोलोच यीशु विषयी सावधान पूर्वक संदेश आपतेन एतो ताह यूहन्नान बाप्तिस्मा विषयी ज्ञान एता.

²⁶ यहूदी आराधनालय माय तो बितेह बोलहू लागिल ताहेरया प्रिस्काला एने अक्विला ने ताह बोलतालू होमलील तेवी ते ताह एक उगी लीन गीया एने जुलुम सोपो एने हेल्लीच भाषाम ताह एक एक वात बोगवानान मार्गाबारामाय होमाजाडील.

²⁷ ताहे-या तान अखया जाणेन ठेराव्यू, तेवी बायाक तान उत्साह वाढवील एने ता जागापूर रेणारा चेला तान स्वागत केरणेन केरता पत्र लेखीन मुकलेल ताहे-या तो ता जागापूर पोचना तेवी तो तान केरता मोठू मदत केरणार बोणील सिद्ध बोणील तान केरता बोगवानान कृपान विश्वास ग्रहण किरील एतो,

²⁸ अपुल्लोस आपणी शक्ती एने कौशल्या हेर्यो यहूदीह सार्वजनिक रूपामाय अभिभूत केरील, पवित्रशास्त्रा मायरीन प्रमाण आपिन का यीशुच मसीह हि.