प्रेरितान काम 17 - नाहाली

थीस्सलुनीकी नगर माय

¹ ओवतो तो अंफुपुली एने अप्पुलीनियो जाइन थीस्सलुनीका माय आवा, जांबी यहूदी माणहान एक आराधनालय एता.

² पौलुस आपणो रीतीन नुसार तान आहने गीयो एने तीन शब्बाथान एक दिह वोर पवित्र शास्त्राद्वारे तासहेऱ्यो वादावाद किरील;

³ एने तानकेरीन अर्थ उगडीन होमजाळीन लागिल कि मसीहान दुख सोसणे, एने मुरील मायरीन जीवतालू एने आवश्यक एता; एने “जोस यीशु ज्यान मी तुमूह वार्ता होमलाडेहे, मसीह हि”

⁴ तामायरीन कोलाक जाणा, एने भक्त यूनानी मायरीन मोक्ता जाणे एने धार्मिक बायकू भी मान लियील एने पौलुस एने सिलास न्या हेऱ्या मिल गीया.

⁵ पुण यहूदी माणहान डाव देरीन बाजारामायवाला माणहामाय काही दुष्ट माणहा आपणो हेरी लीईल, एने गेर्दी एक्ठाच केरीन नगरामाय कापाली उगडीन लागिल, एने यासोनान घेराकडे दोवळीन ताह माणहान ओगाण लावणेन एता.

⁶ ते ताहारी नाहं हे देखीन ते आयेडतेन रेतालान यासोनाला एने काही बायाक नगरान हाकीमान खेचीन लावील, “हे माणहे तान केरता जगाह उलटो सुलट केरीन आपील, हि न्या पुण आवीन गीया हि.

⁷ यासोनान ताह आपणो न्या ताहवोर उगरावना हि, कि हे आखान आखा ज्यो किथी हि कि यीशु राजा हि एने कैसरान आज्ञाला विरोध केरणू”

⁸ ता माणहाह एने नगरान अधिका-यान हे हाकीम बिईन आपील.

⁹ जानकेरता तास यासोन एने उगरील माणहाह हेरी जामीन आपील सोडवीन लावील.

बिरुयामाय पौलुस

¹⁰ बायाक चालूच रातीज पौलुसाह एने सिलास ला बिरुयाम मोकलीन आपील; एने ते ताहारी पोचाडीन यहूदी माणहान आराधनालय माय गीया.

¹¹ ज्या माणहे तर थीस्सलुनीका माय वाला यहूदी माणहारीन हाजो एता एने तास मोठली उत्सुकतेने वचन ग्रहण किरील एने हि वात ज्याच हि कि नाहं हे प्रत्येक दिह पवित्र शास्त्रामाय चौकशी केरतीन रेणा.

¹² जानकेरता तान वचना से जुलुम जाणाह, एने यूनानी कुळामाय वालो बायकुमायरीन एने एदम्यामायरीन जुलुम जाणाह विश्वास किरील.

¹³ काहाकाय का ताहे-या थीस्सलुनीका माय वाला यहूदी होमजाडीन जाईल काय पौलुस बिरुयामाय बोगवानान वचन होमेललतालु एतो, तो ताहारी आवीन माणहाह जुलील किचवाडनु.

¹⁴ तेवी बायाक चालूच पौलुसाह मोकलीन आपील; कि समुद्राम मेरापूर निकलीन जा पुण सिलास एने तीमुथियुस ताच रेयीन गीया.

¹⁵ पौलुसाह पोचाडणार ताह अथेने वोर लीन गीया; एने सिलास एने तीमुथियुसाहनकेरिन हि आज्ञा मेलावीन मोकलीन आपील कि ते तान जेलदीचमाय जेल्दी आवा.

¹⁶ जेवी पौलुस अथने माय तान वाट जोवतालु, ते नगराह मूर्ती से बोरील देखीन तेवी तान जीव गाबराय गीयू

¹⁷ ऐवी तो आराधनालय माय यहूदी माणहा हेर्यो, एने भक्तां हेर्यो एने जां चौकामाय मिल्ताला, तां हेर्यो दाडीन दिह वादा-वाद केरते रेतालो.

¹⁸ तेवी एपीकुरपंथी एने स्तोयिकपंथी तत्वज्ञान मायरीन थोडाक जणाह तान विरोध किरील, एने थोडाक जाणा कियील, “हा बोडबोडयो काय केणेंन ईच्छिला हि?” पुण दिहरान कियील, “तो दिहरी बोगवानान शिक्षक मालूम नाहणे” काहाकाय तो यीशुन पुनरुस्थानाचा सुवार्तान घोषणा केरतीन हेते.

¹⁹ तेवी ते ताह आपणो हेरी अरियुपगुस पुर लेय गीया एने फुसील, “आमु होमजू शकणे कि हा नोवालो मोन होमेललतालु हि, काय हि?

²⁰ कारण तू ओलखणेनाह वात होमेललतालु हि, जानकेरता आमूह होमजाडीन लेणेन हि कि ज्यान अर्थ काय हि?

²¹ जानकेरता कि आखा अथेनेकर एने बाहेर देशान जे ताहारी रेथे एता, नोवालो वातू केणु एने होमलावणे शिवाय एने कायताहा कामाम टाइम ओडकाडणेन नाह एता.”

²² तेवी पौलुससाने अरियुपगुस पथानान माय उबरीन कियेल, “हे अथेनान माणहामाय, दिखेह कि तुमूह प्रत्येक वातीमाय बोगवानान मोठा माननारा हि.

²³ काहा कि फिरतालुन ताहेरया तुमरो पूजणारान वस्तूला दिखिह एतो, तर एक ओहलो एक वेदी पुण देखील, ज्यापूर लेखील एता, एजानल्यो बोगवानान केरता.” जानकेरता ज्याह तुमूहदेखतो पूजणु, मी तुमूह तान पोरचार होमलाडेहे.

²⁴ जो बोगवान पृथ्वी एने तामाय वाल्यू आख्यू वस्तु बोणाविल, तोच स्वर्ग एने पृथ्वीन स्वामी एयीन भी आथा केरीन बोणाविल मंदिरामाय रेत नाह;

²⁵ नाहं कायताहा वस्तून आवश्यकतान कारणाने माणहान आथान सेवा लेणे, कारण तो खुदेन आखान जीवन एने हांह एने आखा काही आपथु.

²⁶ एकुच माणहा केरीन तान आखा दिहरी जातीन निर्माण किरील; तान केरता ता आखा पृथ्वीपोर वास्तव्य केरणू, ताणुच माणहान नियम निश्चित किरील एने ता ठीकाणान पुण ज्या जागापूर ते रेती एता.

²⁷ का ता बोगवानाह होदू एने शायद ता तान फाय पोच सेक्ती, एने खेरीते तो आमु मायरीन कुणी से सेटो नाह सोतो.

²⁸ काहाकाय आमु रेणे, तामायुज जीवताला आमरी शेक्ती हि; एने तामायुज आमरा वास्तव्य हि इही केरीन काही भविष्यवक्त्यांनी पुण कियील हि कि आमु तान सोरा हेते.

²⁹ काहाकाय आमु बोगवानान सोरा हेते तान केरता आमु ज्यो विचार केरहू मां का तान अस्तित्व होनो, केव्ही चांदी केव्ही देगडा केरीन माणहा उगेरीन बोणाविल मूर्तीनगेत हेते.

³⁰ या अनफड युगान बोगवानान अपेक्षा केरीन आज्ञा आपील हि, केरीन तो आखा माणहाह मोन फिरावणे केरता आदेश आपतेन हि.

³¹ केरीन तान एक दिह निश्चित किरील हि, ता एक दिह तो एक माणहा फायरीन जगान न्याय केरुहू हि मुरील मायरीन जीवतालू केरीन आखा केरता हि वात पुरावो तान कियील हि.

³² ताहे-या तान मुरील मायरीन जीवन ला प्रेमान किथी एतो तेवी काहीजाना तापोर मोजाक केरील, एने काही माणहान कियील, कि “आमु आवो विषयी ओवतो उंजू वचन होमलूह.”

³³ तेवी पौलुस ताह सोडीन निकलीन गीयो.

³⁴ काही माणहान विश्वास ग्रहण किरील, एने ताहे-यो एय गीया याम अरीयूपगुसका सदस्य एतो, दियुनुसियुस एने दमरीस नावान एक बायकू, तोहोलोच ताहे-यो काही उंजू माणहे एता.