प्रेरितान काम 16 - नाहाली

पौलुसान तीमुथियुसाह हाती लेणु

¹ पौलुस दिरबे एने लुस्रा माय पुण आवा. तान जागापूर तीमुथियुस नावान एक चेलो एतो, तोकून विश्वासी यहूदी बायकून सोरो एतो पुण तान आबुक यूनानी एतो

² लुस्रा एने इकुनियुमतल्या बायहोम तान हाजी बोलचाल एती.

³ पौलुस तीमुथियुसाहहा प्रिनासाम आपणेहेर्यो लीन जाहू एतो एने तान ताह आपणेहेर्यो लीईल एने ता जागीपोर रेणार यहूदान मोदेतसे तान खतना केरील काहाकाय ताह पुण मालूम एता कि तान आबुक एक यूनानी एतो.

⁴ सेहेरा मायरीन प्रिनास केरतीन एतालून तास ता जागापूर रेणारा माणहाह एक नियमान विषयाम कियील, जे यरूशलेम माय प्रेरित एने डाय डाया ज्यान निश्चित किरील एता.

⁵ ज्यानहोस ता जागापूर रेणारा कलीसियान विश्वास सद्रुड एता गीयो एने दिह दाडीनदीही तान संख्या वोदनेन गीयी.

त्रोवासमाय पौलुसाह दर्शन

⁶ ओवतो फ्रुगीया एने गलतीमान भागाफायरीन निकेलना काहाकाय पवित्र आत्मा माय ताह आशिया माय वचन केणेन मोनाई किरील एता.

⁷ ओवतो ते ताहे-या मसियान सिमापोर पोचेल तेवी तास बितुनिया जाणेन निर्णय केल पुण यीशुन आत्मा ने ताह ताजागेन पुण जाहू आपील नाहं.

⁸ तेवी मसियाफायरीन त्रोआस पोचेल.

⁹ रातीन पौलुसुसाने होपनामाय देखील कि मासेदोनियान एक माणहे प्रार्थना केरीन किथी हि मासेदोनिया माय आव एने आमूह मदत केर.

¹⁰ हे होपना देखनेओवतो चालूच हि ज्याह परिणामी निकलील कि बोगवानान ता माणहामाय सुवार्ता पोरचार केरणेन आमूह हादाडील हि, आमु मासेदोनिया जाणेन ठेरायेल.

फिलीप्पीमाय लुदियान ह्रदय परिवर्तन

¹¹ ज्यानहोस आमु त्रोआसांला पाण्यामार्गान जाणेन केरता आमरी नाव सुडील एने हेल्लीच संमोथ्रोक जाइन पोचेल ओवतो ओंगाल्यो एक दिह नियापुलीस निकलीन गीया.

¹² तारीन आमु एक रोमी उपनिवेश फिलीप्पी ला पुचनु जे मासेदोनियाच्या भागाम प्रमुख नगर हि ज्याह नगरामाय आमु काही दिह रेणा.

¹³ ओवतो शब्बाथ एक दिह आमु हा विचार केरतीन कि प्रार्थना केरणेन केरता ताजागेन एखादी जागो रेंय एने आमु नगर फाटकान बाहेर नदीहे-या जाईल ताजागेन आमु बोहीन एने एक्ठाच बायकू हे-यो चर्चा केरूह लागिल.

¹⁴ एने लुदिया नावान थूआथीरान हेयरामाय जांमण्या रेंगान फाडका वेचणार एक भक्त बायकू होमेलताली, एने प्रभु बोगवान तीन मोन खोल देणु, का पौलुस ने वातीपूर ध्यान देय

¹⁵ आपणो योग्य गीरिनालाहे-या बाप्तिस्मा मांगनेपोर तिने आमूह विनंती केरील कि, “जर तुमूह माहु प्रभुन विश्वासिनी मोनाम हि तर आवो एने मार घेर रीवू” तेवी तास आमुहू तान गिर जाणेन तियार केरीन आपील.

पौलुस एने सिलास जेलीमाय

¹⁶ ओवतो इही एय गीयो कि ताहेरया आमु प्रार्थना जागापूर जात एता तेवी आमूह एक दासी मीलनी, तिमाय हेकीन ची आत्मा एती; ती बोगवानान्य प्रश्न केयीन आपणो मालदार मोक्तास धन मेलावीन आपतेन एती.

¹⁷ ती आमरा ते पौलुसुसान पासाण हे बोलीह आवी कि, “हे माणहे परम बोगवानान दास हेते, हे तुमूह उद्धारान मार्गान संदेश किथी हि.”

¹⁸ ती जुलुम दिहावोर ओहलो केरते रेणी, तेवी पौलुस दुखी इनू एने वोलीन ती आत्माह कियील, मी यीशु मसीहान नावामाय आज्ञा आपथु का सोरीमारीन बाहेर निकेल तेवी तो दुष्ट आत्मा तिमायरीन चालूच बाहेर निकली गीयी.

¹⁹ ओवतो तीन मालक्यान ताहेरया हे देखील, कि तान आखीच कमाई आशा जात रेनीह तेवी पौलुस एने सिलास ला दिरील एने जोमनि पोर खेचतेन बाजारामारीन अधिकारी फाय लीन गीया.

²⁰ ओवतो दण्ड आपणारा अधिका-याफाय लीन गीया एने केया, हे माणहे यहूदी हेते एने आमरा नगरात गडबड केरतीन हि.

²¹ हे ओहला रीत रिवाजानविषयाम बोलीह हि कि जे ग्रहण केरणेन एने तापोर चालणु आमु रोमीन केरता न्यायपूर्ण नाहं.

²² गेर्दी पुण विरोधामाय माणहाहे-यो तां पोर चेडिन आवा दण्ड अधिका-याने तान फाडका फाडीन उतारील एने आज्ञा केरील कि ताह शेड्यू मार्नेन.

²³ ताह जुलुम शेड्यू देणेबादमाय तास ताह बोन्दिखाणामाय टाकील एने कैदखाणान अधिकाऱ्याराह आज्ञा केरील कि तां पोर केठीन जागतालो मेल.

²⁴ ओहलो आज्ञा इयील ताबाद ताह कैदखाणान माय वाला कोठडीत मिलना तास तान पाय खोड्यात थेडकानणे.

पौलुस एने सिलास जेलीम रीन मुक्ती

²⁵ ओवतो लेगभोग माय रात एनी रेंय एने पौलुस एने सिलास बोगवानान भजन गावीन प्रार्थना केरीन एता एने दिहरा बोन्दि ते होंबलेह एता.

²⁶ तेवी ताजागेन एक ओहलो भयानक भूकंप एनो कि बोन्दिखाणान पाया डगमगना एने चालूच बोन्दिखाणान बायणा उघाडील गीया तेवी प्रत्येकान बेड्या ढिल्लो एय गेलीन पोडणा.

²⁷ कैदखाणान अधिका-याने जागेएय देखील कि बोन्दिखाणान बायणा उगाडना हि तेवी तान आपणी तलवार काडील एने स्वता: उपेर वार केरीन लेहु एतो, तेवी.

²⁸ तेवी पौलुसुसाने उचो स्वराने आयेड आपील कियील, “स्वता: ची हानी केरीन केरीन लेहु मां, कारण आमु आखा न्याहीरीज हि.”

²⁹ ह्यापूर कैदखाणान अधिका-याने बुल्यो मागडील एने जेल्दी जेल्दी तान आहने गीयो एने बियान काटीन काटीन पौलुस एने सिलास ज्यांन सुमोर पाया पोडील.

³⁰ ओवतो तो ताह बाहेर लीन गीयो एने बोल्णु, “महाराज, मारा उद्धार एने जुवी केरीन काय केरणू लागी?”

³¹ तास उत्तर आपील, प्रभु यीशु उपेर विश्वास केर तान तारो उद्धार एय एने तारो परिवारान पुण.

³² ओवतो तान परिवाराह-या तास ताह प्रभुन वचन कियील.

³³ ओवतो कैदखाणान अधिका-याने तान राती एने तान टाइम ताह लीन गीयो एने तास तान जखेम धुवील एने आपणो आखा गीरिनालाहे-या बाप्तिस्मा लियेल.

³⁴ ओवतो ते पौलुस एने सिलास ला आपणो गिर लीन आवा एने ताह तास जेवण खाहू पेरेल बोगवानापोर विश्वास ग्रहण किरीनकेरिन तास आपणो आखा कुटुंबांहे-यो आनंद किरील.

³⁵ ओवतो ताहे-या दिह उगनो तेवी दण्ड अधिका-याने आपणो शिपायांना मोकलीन कियील कि ताह सोडीन आपज्यू.

³⁶ ओवतो कैदखाणान अधिका-याने हि खुबेर पौलुसाह केयी कि, “दण्ड अधिका-याने तुमूह सोडीन आपणेन कियील हि तान केरता तुमूह बाहेर आवो एने शान्ति से निकलीन जा.”

³⁷ पुण पौलुसुसाने शिपायांना कियील, जर आमु रोमी नागरिक हि पुण आमु अपराधी नाह सोतो आखान ओगाण मारील पिठले एने बोन्दिखाणामाय मिलना, एने लिकाईन ते आमूह बाहेर मोकेलतेन हि निश्चय इही एय नाहं इही एणेन जुवी कि ते स्वता: आवीन आमूह बाहेर लीन जाणे.

³⁸ शिपायांन दण्ड अधिका-याहबी शब्द कियील, दण्ड अधिकाऱ्याराह हे ताहे-या मालूम एय गीयो कि पौलुस एने सिलास रोमी हि तेवी ते जादा बिईल.

³⁹ तेवी दण्ड अधिकारी ताहरी आवा एने तान ताफायरीन क्षमा मागीन बाहेर लीन गीयो एने तान ते नगर निकलीन जाणेन कियील.

⁴⁰ पौलुस एने सिलास बाहेर जाइन लुदियान गिर गीया एने आखा बाहाक मिलिन तास तानकेरीन उत्साह वाढवील, एने ओवतो पोशो ते तारीन निकलीन गीया.