प्रेरितान काम 15 - नाहाली

यरूशलेमान सभा

¹ ओवतो काही माणहे यहूदी मायरीन आवा एने बायाक शिक्षण आपुह लागिल: “जर मुसान नियमाहोस तुमरी खतना एनी निह एय तर तुमरो उद्धार एय शकत नाय.”

² पौलुस एने बरनाबस तामाय समेज नाह एता तेवी तामाय एक मोठू विवाद उबरील रेणू तेवी पौलुस एने बरनाबस तोहोलोच तान काही हेरी यान ज्याह समस्यान समाधानाकेरता प्रेरित एने डाय डाया फाय यरूशलेम माय मोकलणेन निश्चय किरील.

³ ते कलीसिया द्वारे मोकलील; जात असून फेनिक एने शमरोन ज्यामायरीन जात येतो आखा बायाक दिहरी जातीन हृदय परिवर्तनाचा विस्ताराहे-यो सुवार्ता केयीन ताह आनंद केरतीन एता.

⁴ ओवतो ताहेरया ते यरूशलेम माय पोचेल, तेवी कलीसियाह प्रेरितान डाय डाया तान स्वागत-सत्कार किरील, एने तास ताहेर्यो बोगवानान जे काही किरील एता ता आखा काही ताह कियील.

⁵ ह्यापूर फरीसीमच्या एक दल काही विश्वासी उबरीयेल रेणा एने कियेल, “तान खतना अवश्य केरील जाणे एने ताह आदेश आपील जावा कि मुसान व्यवस्था पोहणे केरणू.”

⁶ ज्याह प्रश्नापोर विचार केरणे केरता प्रेरित तोहोलोच डाय डाया परस्पर एक्ठाच एय गीया.

⁷ तेवी जुलुम टाइमवोर वादा-वाद केरील, तां बाद पतरस उबरीन ताह कियील, “बायहो, तुमूह मालूम हि का खोब दिह एनाह, का बोगवान तुमूह मायरीन माहु निवाड लियील, का दिहरी जातीन अधर्मी माणहे सुवार्ता होमलती एने विश्वास केरती.

⁸ एने मोन ओलखणार बोगवानान आमरो सन्मान ताह भी पवित्र आत्मान वरदान आपील तान संबाधामाय आपणा गवाही देखाडील;

⁹ विश्वासान द्वारे तान हृदयान पवित्र केरीन आमरा माय एने तामाय काय भी भेदभाव देखाडील नाहं.

¹⁰ तेवी ऐवी चेलान बोचीपोर एक इही बारो मेलीन ज्याह आमु वीसहु शकत नाहं एने आमरा पूर्वज, तुमूह बोगवानान परिक्षा का देखणु?

¹¹ पुण आमारो तर ओहलो विश्वास हि कि प्रभु यीशुन कृपासे जोहलो आमरा उद्धार एय गीयो हि तोहोलोच आमरी ओहलो हि कि तानकेरीन पुण उद्धार एय.”

¹² ह्यापूर आखा समुदाय ठावको एनो एने बरनाबस एने पौलुस न्यान होमलूह लागिल ता दिहरी जातीन बोगवानान ताफायरीन दुय अदभूत चिन्ह प्रकट किरील एता एने आश्चर्य काम किरील एता एने तान वर्णन केरतीन एता.

¹³ तान ताहेरया बोलीन एय गीयो तेवी याकूब केतेह एतो, हे बायहो, मारा होमलू.

¹⁴ शिमोन ने कियील एता कि बोगवानान दिहरी जातीन माय काही माणहाह आपणो नावाकेरता निवाडीन आखान देखील केवी प्रेम प्रकट किरील एता.

¹⁵ भविष्यवक्ताचे वचन पुण न्या हेऱ्यो मेळ बोहथू, जोहलो कि लिखील हि,

¹⁶ “मी ज्याबाद माय आवी, पोशो मी उबरील केरणू दाविदान घेर जे पोडील हि, पोशो विसीन तान भागदडे बुजीन हेल्लीच केरुहू.”

¹⁷ जानकेरता जे वोचील हि ते दिहरी जातीन जे आखा ऐवी मारा नावान केवाड्तेह तास प्रभुन होदणे केरुहू.

¹⁸ हि वात तीस प्रभु केतेह हि जी जगान रीन सुरुवात वातूह तो प्रकट करने.

¹⁹ “ज्यानहोस मारो हा निर्णय हि कि आमूह ता माणहाह जे दिहरी जातीन असून हि बोगवाना उखेर वोलना हि, ताह त्रास आपुह नाहा;

²⁰ पुण तांह लेखीन मोकलू का मूर्ती पुर चेढाविल जेवण अशुद्ध खाहू मा सेटा रिज्यू एने व्यभिचारामायरीन सेटा रिज्यू गेलु दाबीन मारील जेनावराह मा खाहू ते सेटा रिज्यू एने रक्ताह केध्दी खाहू मा.

²¹ प्राचीन काला से मुसान व्यवस्था वाचणारा नगर माय हेते, प्रत्येक शब्बाथ एक दिह मुसान व्यवस्था प्रार्थना आराधनालय माय वोचील जात हि.”

अन्य जातीन विश्वासीह पत्र

²² ओवतो प्रेरित एने डाय डाया कलीसियाहे-यो निश्चय किरील कि तामायरीन काही माणहाह निवाडीन, पौलुस एने बरनाबस न्या हेऱ्यो अन्ताकिया मोकलील जाणे, तेवी ताह बर्शब्बा कियील यहूदी एने सिलास ला निवाडीन लीईल ते बायाकामाय आखा प्रमुख एता.

²³ तास तान आथाम हे पत्र मोकलील: “तुमरो बाहाक, डाय डाया एने प्रेरित न्या फायरीन अन्ताकिया, सिरीया एने किलकीया उगेरीन, दिहरी जातीन बायाक नमस्कार मोकलील.”

²⁴ आमु जेव्हीपूर होमलील हि कि आमूह फुसतालू आमु मायरीन काही माणहान जाइन आपणो शब्दांनी तुमूह दुख आपील हि; एने तुमरो मोनाह आज्ञा उलट किरील हि.

²⁵ आमु आखा परस्पर समेज एईन हा निश्चय किरील हि कि आमु आपणे मायरीनुच काही माणहाह निवडू एने आपणा प्रिय बरनाबस एने पौलुस न्या हेऱ्यो ताह तुवाहेर्यो मोकलो.

²⁶ ते ज्याच माणहे हेते तान केरता आमरा प्रभु यीशु मसीहान नावाकेरता आपणो जीवापोर उदार इयील इही एता.

²⁷ आमु यहूदा एने सिलास ला मोकेलतेन हि ते तुमूह आपणो मुखाने ज्याह आखा वातू केनार.

²⁸ पवित्र आत्मा हे आखा मालूम हि कि तुमूह ज्याह आवश्यक वातू व्यतिरिक्त दिहीरा वातून बारो तुमपूर नाह आपजू.

²⁹ का तुमु मूर्ती पुर चेढावेल जेवण तुमूह खाहू मा एने रक्त एने गेलु दाबीन मारील जेनावर एने व्यभिचार ज्यापुररीन सेटो रीवू जर तुमूह जी वातुपुररीन स्वता: सेटो मिलना तर तुमरो केल्यान एय एने श्रेमकुशल एय.

³⁰ ज्यानहोस ताह मोकलीन आपील एने ता अन्ताकिया जाइन पोचेल, ता जागापूर तास धर्म सभा हादील एने ताह हे पत्र आपील.

³¹ पत्र वाचीन ताह हे प्रोत्साहन जुडील तापोर तास आनंद किरील.

³² यहूदा एने सिलास जे हे दुयू स्वयं भविष्यवक्ता एता, बायाकने ओगाण ताह उत्साहित केरीन एने दृढता प्रदान केरीन एक जुलुम टायमाउर प्रिनचन हिकाडील.

³³ ताजागेन काही टाइम थोबनेबाद बायाक ताह शान्ति से तानच आहने पोशा मोकलील तान केरता ताह मोकलील एता.

³⁴ पुण सिलासाह ता रेणे हाजो लागो.

³⁵ पौलुस एने बरनाबस ज्यान उजू काही टाइम अन्ताकिया माय गोमाळील: एने जुलुम दिहीरा माणहाहे-यो तास प्रभुन वचनान शिक्षण आपतेन माणहामाय सुवार्ता पोरचार केरील.

पौलुसान दुसरी पोरचार-यात्रा पौलुस एने बारबसमाय मतभेद

³⁶ काही दिहा बादमाय बरनाबसला पौलुसुसाने कियील, “आवो, आपु ज्या ज्या नगरात आपु प्रभुन वचनान पोरचार किरील हि ताजागेन आपणो बायाकानआहने जाइन देखहुं कि ते काय केरतीन हि.”

³⁷ बरनाबसला लागनो कि मरकुस कियील यूहन्नान पुण आपणो बरोबर आवु.

³⁸ पुण पौलुसाह हे हाजो लागनो कि आपणेहेर्यो कोणीही हीन लेजी ज्यासे पंफुलीयाम माय ताह सुळील एने प्रभुन कामाम तो ताहेर्यो रेणू नाहं.

³⁹ ज्यापूर ता दुयोमाय तीव्र विरोध निर्माण एनो परिणामी हे एय गीयो कि ते एक दिहरा पासून आलेग एय गीयो बरनाबस मरकुस ला लीन पाण्यान जहाजमाय साइप्रस चालताला गीया.

⁴⁰ पुण पौलुस सिलासाह निवाड लियील, एने बाहाक ताह बोगवानान कृपा माय होप देनो एने ताहरीक रीन जात रिनो;

⁴¹ तेवी पौलुस सिरीया एने किलकीयान प्रिनास केरतीन ताजागेन वालाह कलीसियाह सुदृढ केरतीन रेणू.