प्रेरितान काम 14 - नाहाली

इकुनियुम माय पौलुस एने बरनाबस

¹ इकुनियुम माय या एय गीयो कि यहूदी आराधनालय माय एखठाच एय गीयो, एने आवो प्रकारे वातू केरील कि यूनानी एने यहूदी एने ज्यामाय्रीन मोक्तास माणहे विश्वास किरील.

² पुण विश्वास नाहं केरणारा यहूदीयांनी दिहरी जातीन मोन बायहो विरुद्ध गेंदो किरील.

³ ते मोक्तास दिह ताहवोर ताहारी रेणा; एने ओंगाल्यो बोरहापूर निभ्रीडपणे बोलीह एता एने ते तान आथान चिन्ह एने अदभूत कामे केरावीन आपणो कृपा पोर वचनापोर गवाही आपतेन एतो.

⁴ पुण नगरातील माणहामाय फुट पोडीन गीयी एती ज्यान कोलाक जन तर यहूदी उगे एने कोलाक प्रेरिता फाय एय गीयो.

⁵ पुण ताहे-या दिहरी जातीन एने यहूदी न्यान अपमान एने तापोर देगुडदेणु केरणेन केरता आपणो सरदार तान उगे दोवेडना,

⁶ तर ते आवो वातून होमजाडीन गीया, एने लूकानविया प्रांतामाय लुस्रा एने दिरबे नगरात, एने आहने पाहणेन प्रांतात निकलीन गीया.

⁷ एने ताहारी सुवार्ता पोरचार केरीन लागिल.

लुस्रा एने दिरबे माय

⁸ लुस्रा माय एक माणुह बोहील एतो, तो पायाकेरीन लेगडो एतो. तो जन्मापासून लेगडो एतो केरीन तो केध्दीह चालहु नाह एतो.

⁹ तो पौलुसाह वात केरतालोन होंबलेह एतो. पौलुसुसाने ताफाय टक लागाडील देखील, कि ताह हाजो ला विश्वास हि,

¹⁰ एने मोठली शब्दाम कियील, आपणो पायापोर हास केरीन उबरील रीवू “तेवी तो ऊसलीन चालणे लागो.”

¹¹ माणहान पौलुसाचे हे काम देखीन लुकवानीयान भाषाम मोठली आवाजामाय कियील, “बोगवानान माणहान रुपान आमुफाय उतरीन आवा हि.”

¹² तास बरनाबसला ज्युस, एने पौलुसाह हर्मास इही कियील, कारण तो वातू केरणेम मुख्य एतो.

¹³ एने ज्युस ने ता मंदिर ने पुजारी जो तान नगरान सामने इतू, बोईल एने फुलांन माला पोर लावीन माणहा हेर्यो बलीदान केरणे होदतालु.

¹⁴ पुण बरनाबस एने पौलुस प्रेरितांन ताहेरया हे होमलील, तर आपणा फाडका फाडील, एने माणहामाय रीगीन एने आयडीन केहू लागिल,

¹⁵ “हे माणहा, तुमूह काय केरतेह? आमु भी ते तुमरेहोस दुख हुख भोगणारे माणुह हेते, एने तुमूह सुवार्ता पोरचार होमलाव ताला का तुमूह जी वाया वस्तूह रीन आलेग एईन जीवताला बोगवाना उखेर फिरू, ज्यान स्वर्ग एने पृथ्वी एने समुन्द्र एने जो काही तामाय बोणाविल हि.

¹⁶ तान जाईल वेलान आखा दिहरी जातीन आपणो आपणो वाटीन चालू आपील.

¹⁷ तेभी पुण तान आपणो जीवाह गवाही नविहीर रेहू; आपील नाहं पुण तो हाजो केरतीन रेणा एने आकाशामाय वोरहात एने फलदायक रुतू तुमूह आपील तुमरो मोनाह भोजन एने आनंदमाय केरतीन रेणू.”

¹⁸ हे केयीन पुण तास माणहाह मोठली काढालमाय ताह रोक्या का तान केरता बलीदान प्रयत्नांसे आवरना.

¹⁹ ओवतो अन्ताकिया एने इकुनियुम यारीन कोलाक यहूदी आवा तास माणहान मोन वालीन पौलुसाह देगुडदेणु किरील, एने तो मोरणु इही होमजाडीन ताह नेगरान बाहेर खेचीन टाकीन आवा.

²⁰ तान भोवती चेला जोमना तो उठिल एने नगरात निकलीन आवा, ओवतो दिहीरा एक दिह बरनाबसहे-यो दिरबेस निकलीन गीयो.

सिरीयान अन्ताकियामा वापस

²¹ एने ता नगरात सुवार्ता केणेंन, एने चेला बोनावणेल, ओवतो ते लुस्रा इकुनियुम माय एने अन्ताकिया पोशा आवा.

²² एने चेलान मोनाह स्थिर केरतीन एने विश्वासामाय स्थिर बोणावीन; केरता हे केयीन प्रोत्साहित केरतीन रेणा, “आमूह मोठा दुख विसीन बोगवानान राज्यातम प्रवेश केरुहू हि.”

²³ ओवतो तास प्रत्येक कलीसिया माय डाय डायान निवाड, केरीन उपास हेरी प्रार्थना केरील एने तास मसीहान आथाम होपीन आपील ज्यापूर तास विश्वास किरील एतो.

²⁴ तेवी ते जातेन पिसिदियामायरीन पंफुलीयाम पोचेल;

²⁵ ओवतो पिर्गा माय वचन केयीन ईटली माय गीया,

²⁶ एने तारीन ता जहाजामाय बोहीन अन्ताकिया माय गीया, ताहरी ता तां कामान केरीन जो तां पुरो केरील एतो बोगवानान कृपा माय ता होपाय जाईल एता.

²⁷ ताहारी पोचाडीन तास कलीसियान एक्ठाच किरील, एने जे काही बोगवानान ताहे-यो किरील एता ते केयीन देखाडील एता, एने हे पुण कि किहीत बोगवानान जे यहूदी नाहं दिहरी जातीह विश्वासान बायणो उगडीन आपील.

²⁸ तेवी ते चेलान हेरी जुलुम दिह रेणा.