प्रेरितान काम 13 - नाहाली

बरनाबस एने पौलुसाह मोकलणेन

¹ अन्ताकियान कलीसियान माय कूण भविष्यवक्ता एने शिक्षक एतो; जोहलो: बरनाबस एने शिमोन नीगर आहने केयेल जाथी; एने लुक कुरनेकर, एने कलीसिया देशान राजा हेरोदेसान दुय बाहाक मोनाएल, एने शाऊल.

² ताहे-या ते उपास केरतीन प्रभुह उपासना केरतीन एता, तेवी पवित्र आत्मा माय केदा, “मारबाराम बरनाबस एने शाऊल ता कामान केरता आलेग केरू ज्यानकेरता मी ताह हादाड्या हि.”

³ “तेवी तास उपास एने प्रार्थना केरीन तां पोर आथ मेलीन आपील.”

पौलुससान पेलली पोरचार-यात्रा

⁴ सेवट: तो पवित्र आत्मा मोकलील सलुकीयामाय गीया; एने तारीन नावेपोर चेडिन साइप्रस गीया;

⁵ एने साल्मिनामाय पोचीन, बोगवानान वचन यहूदीयान प्रार्थना आराधनालय माय केयेल. यूहन्ना ता दास इतो.

⁶ ते ता आखा बेटामायरीन चालीन पाफुस ताहवोर पोचना ताह ताहारी बर्येषु नावान यहूदी जादूटोणा एने जुठा भविष्यवक्ता एतो.

⁷ तो तान हाकीम सिरगियुस पौलुसाहे-यो इतो, जो बुद्धिमान माणह इतो तास बरनाबस एने शाऊल आपणे हेऱ्यो हादाडळीन बोगवानान वचन होमलाण्यु इतू.

⁸ पुण अलीम जादुगार तान नावान अर्थ जोस हि ज्यासे तानकेरीन विरोध केरीन सुभेदारान विश्वासाह थोबाडणेन काम केरतीन एतो.

⁹ तेवी शाऊल ज्यान नाव पौलुस पुण एता पवित्र आत्मा माय परिपूर्ण एय ताफाय एक एक लागाडील देखील, एने कियील.

¹⁰ “हे आखा देगुकेरिन एने हुशार पणाने भोराईल शैतानान सोरा, अवघ्या धार्मिकता वैरी, काय तू प्रभुन हेल्लीच मार्गाला विपरीत केरणेन सोडहु नाहं का?

¹¹ ऐवी देखू, प्रभुन आथ तारपोर लागिल हि; एने तू काही टाइम ताहवोर आंधलू रेहू एने दिहान देखणार नाहं.” तेवी लागीच थूप्या पोडीलेनेगेत एने तान डोलापूर आन्दारी आवी, एने तो याहारू तोथा होदणे केरूह लागिल कारण कि कुणीन तेभी आथ देरावीन चालती ओहलो तान परिस्थिती एती.

¹² तेवी सुभेदाराने जे एय गीयो एता ताह देखीन एने प्रभुन शिक्षणापुरेन चक्कित एयन विश्वास किरील.

पिसिदियान अन्ताकिया माय

¹³ पौलुस एने तान हेरी पाफुसरीन नावीम बोहीन पंफुलीयाम पिर्गा न्या आवा; एने यूहन्ना ताह सोडीन यरूशलेम ला निकलीन गीयो.

¹⁴ पिर्गारीन ओगाण जाइन ते पिसिदियामाय अन्ताकियाम पोचेल एने शब्बाथान एक दिह आराधनालय माय जाइन बोह्ना.

¹⁵ व्यवस्था एने भविष्यवक्तान पुस्तकामाय वाचणे बादमाय आराधनालय माय अधिका-यान केयीन मुकलेल, “हे बायहो, केध्दीह माणहान हिकणेन केरता तुमरो मोनाम काही रेंय तर केवो.”

¹⁶ तेवी पौलुस उब रेणो एने आथा केरीन इशारू केरीन केयील, “हे इस्राएल माणहा, एने बोगवानाह बिणारा, होम्लू:

¹⁷ ता इस्राएल माणहान बोगवानान आमरा पूर्वजान निवाडीन लिईलअने, ताहे-या ते माणहे मिस्र देशामाय बाहेर देशान एय रेथे एतो तेवी तान प्रगती केरील; एने पराक्रमी आथा केरीन काडीन लीईल.

¹⁸ तो काही चाळीस वर्षा पोर जेंगलामाय तान सहन केरतीन रेणू.

¹⁹ एने कनान देशामाय दिहरी जातीन सात नाश केरीन तानकेरीन देश साडे चारहोव वर्षामाय तानकेरीन कनान देशामाय केरीन लियेल.

²⁰ ज्ञान ओवतो तान शमुवेल भविष्यवक्ता ताहवोर ताह न्यायी ठेराव्यू.

²¹ तान ओवतो तान एक राजा मांगील: तेवी बोगवानान चाळीस वर्षानकेरता बिन्यामीन वंशजातील एक माणुह; म्हणजे किशान सोरो पौलुसला तां पोर राज्य केराईल.

²² ओवतो ताह आलेग केरीन दाविदाह तानकेरीन राजा बोनाईल ज्यान विषय माय तान गवाही आपील माहु एक माणुह ईशायान सोरो दाविद, मारो मनाहोच माहु जुडना हि तोच मारी आखीच ईच्छा पुरो केरूह.

²³ तान वंशामाय रीन बोगवानान आपणो प्रतिज्ञान नुसार इस्राएल आहने एक उद्धार केरथू म्हणजे यीशुह मोकलील.

²⁴ तान आवणारा पेलूच यूहन्नान इस्राएल माय मोन फिरावीन बाप्तिस्मा चा पोरचार किरील.

²⁵ एने यूहन्ना आपणी सेवा पुरी केरणेपूर इतो, तेवी तो ताह कियील, तुमूह माहु काय होमजणू? मी तो नाहं सोतो, देखू मार बादमाय एकजाण आविह तान पायान खाहडान बोंदे सोडणेन भी मी लायकीन नाह सोतो.”

²⁶ “हे बायहो, तुमूह जे अब्राहामान सोरा हि; एने बोगवानान ओगांण रेडनु, तुमरीफाय ज्योच उद्धारान वचन मोकलील हि.

²⁷ काहाकाय का यरूशलेम ने रेणारान एने तान सरदारे ताह ओलखिल नाहं एने भविष्यवक्तान वातू होमजील नाहं जे प्रत्येक शब्बाथान एक दिह वोचील जातेह ज्यानकेरता ताह दोषी ठेरिनीन ता वातुहू पुरो किरील.

²⁸ तास मारीन टाकणे केरता योग्य दोष तामाय सापडेल नाहं तेभी पिलातुसाफायरेन विनंती केरील कि ताह मारीन टाकील जाणे.

²⁹ ताहे-या तास तान विषयाम लिखील आखा वातू पुरो केरील कि ताह क्रुसापूर उपेरीन उतारीन कबरेमाय मिलील.

³⁰ पुण बोगवानान ताह मोरील मायरीन जीवतालू किरील,

³¹ एने ते ताह जे ताहे-यो गलील रीन यरूशलेमा माय आवा एता, जादा दिहावोर देखाती रेणू; माणहान सुमोर ऐवी तोज गवाही रेणा हेते.”

³² एने आमु तुमूह ता प्रतिज्ञान विषयामाय जी पूर्वजाहे-यो केरील, एती, तीस सुवार्ता होमलाडतेह,

³³ का बोगवान यीशुह जीवतालू केरीन तीस प्रतिज्ञा आमरा सनातनान केरता पुरो केरील जोहलो का दिहरा स्तोत्रसंहितामाय भी लेखील हि, “तू मारो सोरो हि” “आज मीच तुवाह जेल्मो आपील हि.”

³⁴ एने तान ज्योच रीतीमाय मोरील मायरीन जीवतालू केरणेन बरामाय माय पुण कि तो केधीच साधारण नाहं तान ओहलाच कियील, “मी दाविदान पवित्र एणेन निवरणारी कृपा तुमरे पोर पुण केरूह.”

³⁵ ज्यानकेरता तान उंजू एक स्तोत्रसहीतामाय कियील हि, “तू आपणा पवित्र जाणाहा सेडणे नाय देय.”

³⁶ काहा दाविद तर बोगवानान ईच्छा नुसार आपणो खुदमाय सेवा केरीन हुवीन गीयो एने आपणो पुर्वाजामाय जाइन जुडना एने सोडीन पुण गीयो.

³⁷ पुण बोगवानान ज्याह जीवतालू किरील तो सूड शकील नाहं.

³⁸ ज्ञान केरता, हे बायहो, तुमूह पुण होमजाडीन ली कि याणूच द्वारे पाप्यान क्षमान घोषणा तुमूह आपील जात हि;

³⁹ एने ज्या वातीमाय तुमूह मुसान व्यवस्था द्वारे निर्दोष ठेरहू शकत नाहं तान आखामाय प्रत्येक जन विश्वास केरणार तान द्वारे निर्दोष ठेरहू.

⁴⁰ जानकेरता होमंबालीन रीवू इही एहू नाहा कि भविष्यवक्तान पुस्तकामाय आवा हेते ते तुमरे पोर आवु:

⁴¹ हे निंदा केरणा, देखू, एने आश्चर्य केरू एने निवरीन जा; “काहाकाय तुमरो दिहामाय एक काम करने इही, काम कि केध्दीह कूण तुमरीफाय तान चर्चा केरहेतू केध्दीह तुमूह विश्वास केरुहू नाहं.”

⁴² तान बाहेर निकलने टाइम माणहे ताह विनंती केरूह लागिल कि ओंगाल्यो शब्बाथान एक दिह आमूह हि वात पोशा होमलावीन जाऊ.

⁴³ एने जेवी आराधनालय मायवाली सभा निवरी गीयी यहूदी माणहे एने यहूदी मत माय आईल भक्ता मायरीन पौलुस एने बरनाबस न्यान पासाण गीया; एने तां ताहेऱ्या वातू केरीन होमजाडील, का बोगवानान कृपा माय बोणीन रीवू.

पौलुस द्वारा अन्ताकिया माय पोरचारान सुरुवात

⁴⁴ शब्बाथान ओगांल्या दिह नगरामाय बहुतेक माणहे बोगवानान वचन होमलनेकेरता एक्ठा एय गीया.

⁴⁵ पुण यहूदी गर्दीह देखीन हेवो केरीन बोह गीया एने निंदा केरताच पौलुसुसान वातून भी विरोधामाय बोलणे लागिल.

⁴⁶ तेवी पौलुस एने बरनाबस नाह बिन केणे लागिल, “आवश्यक एतो, का बोगवानान वचन पेल तुमूह होमलावणे माय ओवतो; पुण तुमूह ताहेऱ्या रीन सेटा रेतेह, एने आपुहू अनंत कालिक जीवनाम योग्य नाह ठेरावतेह, ते देखू आमु दिहरी जातीन वुगे फिरतेह.”

⁴⁷ काहाकाय का प्रभु हि आज्ञा आपील हि का, “मी तुवाह दिहरी जातीन केरीन प्रकाश इही ठेराव्यू हि, काहाकाय तू पृथ्वीन शेवेट ताहवोर उद्धारान बायणो हि.”

⁴⁸ जो एतो दिहरी जाती आनंदित एय गीयो एने बोगवानान वचनान महिमा वर्णवू लागलएने जोला अनंत जीवनान केरीन ठेराव्यू गीया आथे तास विश्वास किरील.

⁴⁹ तेवी प्रभुन ता आखा देशामाय पासारू लागिल.

⁵⁰ पुण यहूदी माणहे ते भक्त एने धार्मिक बायकूह एने नगर ने प्रमुख माणहाह बोडकावीन, एने पौलुस एने बरनाबस न्याह मोक्तो हाजो बाक्तो केयीन ताहेर्या गेंज बाक्तो केरीन ताह हेयरान बाहेर काड दियील.

⁵¹ तेवी ता तान ओगांण आपणा पायान मातड्यो झेटकीन इकुनियुम निकली गीया.

⁵² एने चेला आनंदमाय एने पवित्र आत्मा माय परिपूर्ण एता गीया.