प्रेरितान काम 11 - नाहाली

पतरसा द्वारे आपणा कामान स्पष्टीकरण

¹ पोशा प्रेरित एने बायहो जें यहूदियामाय एता कोलाक दिहरी जातीन भी बोगवानान वचन इयील लीईल हि

² यास्तव ताहे-या पतरस यरूशलेम माय आवा, खतना किरील माणहे ताहे-यो वादावाद केरूह लागिल,

³ “तू बेखतना किरील हे-यो जाइन हेरी जेवण किरील.”

⁴ तेवी पतरसाने ताह सुरुवात केरीन अनुक्रमाने केयीन देखाडील:

⁵ “मी यापो नगरामाय प्रार्थना केरतालु, एने बेसूद एयीन एक दुष्टांत देखील, का एक मोठली ताट चादरान होस चारू कोपराह लेटकीन, आकाशा मायरीन उतरीन माहफाय आवो.

⁶ जेवी मी हास केरीन दिखिह विचार केरील, एतो तेवी पृथ्वी पोरिनाला चतुष्पाद, जीवे, सरपटणारे जीव, एने आकाशामाय वाला चिडा मार डोलान ओगांण देखाना;

⁷ एने मी ओहलो आवाज बोलतालुन मी होमलील, का पतरसा, उठ एने मारीन खा.”

⁸ पुण मी केयेल, नाहं; प्रभु, काहाकाय का मी उंजू ऐवी वोर अशुद्ध एने अपवित्र वस्तु मारा मुयामाय केधी भी नाह गीयी.

⁹ ज्याओवतो चालूच दिहिरी आवाज आकाशा मायरीन होमेल्नी, “जे काही बोगवानान शुद्ध किरील हि ते अशुद्ध माणुह मां.”

¹⁰ तीन वारीन ओहलोस एय गीयो; तेवी आखो काही पोशा आकाशामाय विसाय गीयो.

¹¹ “एने देखू, जल्दीस तीन माणुह जा कैसरिया फायरीन माहुफाय मुकलेल एता, तान पायामाय आमु एतो आवीन उबरीयेल एता.

¹² तेवी आत्मा आवीन माहु ताहेर्यो काही शंका नाह केरता जाणे कियील एने ज्या सोव बाहाक भी मार हेऱ्या आव लागिल, एने आमु ता माणहान गिर जाईल.

¹³ एने आमूह कियील, का तान एक स्वर्गदूतांह आपणा घेरामाय उबरील देखील एने तो माहु कियील, यापोसमाय माणुह मोकलीन शिमोन ज्याह पतरस केणु, हादाडळीन लाव.

¹⁴ तो तुमूह ओहलो वात केनार, ज्यान उगेरीन तू एने तारो आखा कुटुंबान उद्धार एय.”

¹⁵ जेवी मी जीवात केतालू, तेवी पवित्र आत्मा तापोर तान प्रकारे उतरनी ज्या प्रकारे सुरुएताच तां पोर उतरनी.

¹⁶ तेवी माहु प्रभुन वचन एर आवील, ज्यो का तो केयेल यूहन्ना ते ऐवी पाण्यानकेरीन बाप्तिस्मा आपील, पुण तुमूह पवित्र आत्मान बाप्तिस्मा जुडी.

¹⁷ वास्तव ताहे-या बोगवान ताह पुण तोज दान आपील, जे आमूह प्रभु यीशु ख्रीस्तापोर विश्वास केरणेन मिलील एता तर मी कूण एतो जो बोगवानानाह थोबविण शकणे?

¹⁸ ज्या होमलीन ते टाकु रेणा, एने बोगवानान स्तुती केरीन केहू लागिल, “तेवी तर बोगवान दिहरी जातीन पुण जीवनान केरीन मोन फिरावणे दान आपील हि.”

अन्ताकिया कलीसिया

¹⁹ जे माणहे आवो उपद्रिनकेरेल संकटामुळे जे स्तीफणुसान वजसे पुडील एता, याहारू तोथा एय गीया एता, ते फिरीन फिरीन फेनिवुगे एने साइप्रस एने अन्ताकिया वोर पोचेल; पुण यहूदयाह सोडीन कोणीही तेभी वचन होमेललतालु एता.

²⁰ पुण तामायरीन काही साइप्रस प्रिनासी एने कुरनेकर एता, जे अन्ताकिया आवीन यूनानी पुण प्रभु यीशुन सुवार्ता पोरचार केहू लागिल.

²¹ तेवी प्रभुन आत्मा ताहे-यो एतो, एने मोक्तास माणहे विश्वास प्रभु उगे वोलना.

²² ताहे-या तान चर्चा यरूशलेमान कलीसियाह होमलूह आवी, तवी तास बरनाबसाह अन्ताकिया मोकलील.

²³ तो ताहारी पोचाडीन एने बोगवानान कृपा देखीन आनंदित एनो एने आखाच शिक्षण आपील, कि निश्ययपूर्ण मोन प्रभुह बिलकुल रिजी.

²⁴ तो एक हाजो माणुह एतो, एने पवित्र आत्मा एने विश्वासामाय परिपूर्ण एतो; एने दिहरा जादा माणहे प्रभु माय आवीन गीया.

²⁵ तेवी तो शाऊलाह होदणे केरता तार्शीस निकलीन गीयो.

²⁶ तेवी तो ताह मिलील तर ताह अन्ताकिया लावील; एने इही एय गीयू कि ते एक वर्षापोर कलीसियाह मिलनेम एने जादा माणहाह शिक्षण आपतेन फिरील एने चेला आखान पेल्ला अन्ताकिया माय मसीही केरीन कियील गीया.

²⁷ ता दिहामाय कूण भविष्यवक्ता यरूशलेम मरीन अन्ताकिया आवा.

²⁸ तामायरीन अगब नावान एक उबरील रेयीन आत्मान हि कियील कि आखा जगाम दुष्काळ पोडती क्लौदिमुस टायीमा हे एय गीयो.

²⁹ तेवी चेला निर्णय लियेल कि प्रत्येक जन आपणी यथाशक्तीन अनुसार यहूदियामाय रेणारे बायाकने सेवान केरता काही मोकलो.

³⁰ तां ओहलाच किरील; एने बरनाबस एने शाऊल ज्ञान आथे डाय डाया फाय मोकलीन दियील.