प्रेरितान काम 10 - नाहाली

कुरनेलियुसान पतरसाह हाद्णो

¹ कैसरान न्या एक कुरनेलियुस नावान एक माणुह एतो, ईटालीक नावान पलटणान सुभेदार एतो.

² तो भक्त एतो, एने आपणो आखा घेरर्ल्याहे-यो बोगवानान बियीईन एतो, एने यहूदी माणहाह जादा दान आपतेन एतो, एने ताहे-यो बोगवानान प्रार्थना केरतीन एतो नावान एक माणुह एता ईटालीक नावान, पलटण सुभेदार एतो.

³ तो दिहान तिसऱ्या प्रहरान आहनिपाहानी दर्शना माय साफ रूपामाय बोगवानान एक स्वर्गदूत तान आहनी माय आवीन कियेल “हे कुरनेलियुस.”

⁴ तान ताह हेसकेरिन देखील एने बियीन कियील, “हे प्रभु काय हि?” तो ताह कियील, “तारी प्रार्थना एने तारो दान बोगवानान ओगांण पोचली हि;

⁵ एने ऐवी यापुर माय माणुह मोकलीन शिमोनाह जो, पतरसस केयेल जाथू हादाडळीन ले.

⁶ तो शिमोन चामडान धंदा केरणारान न्या पावणु हि, ज्यान घेर समुद्राम मेरानआहणे एता.”

⁷ ताहे-या तान स्वर्गदूत तान केरता तान हेरी वातू केरील तो चालहु गीयो, तान दुय दास, एने जे तान हेरी उपस्थित रेथे एता तानकेरीन एक भक्तिमान शिपायाह हादाड्या.

⁸ एने ताह आखा वातू केयीन यापुर ला मोकलील.

पतरसान दर्शन

⁹ दिहरे दिह चालतो चालतो नगरान आहने पोचेल, दिहीरा प्रहरान आहनी पतरस प्रार्थना केरणे केरता छतावर चेढील.

¹⁰ ताह बुख लागिल एने ताह काही खाणेन जोवतालो, पुण ता ते तेवी तियारी केरताला एने तो बेसूद एय गीयो;

¹¹ एने ताह पेल आकाश उगडी गीयो; एने एक मोठली ताट चादरान होस चारू कोपराह लेटकीन, पृथ्वी वूखीर उतेरताली.

¹² ज्यामाय जोमनिन आखा प्रकारान चार पायान एने सरपटणारा जेंतू एने आकाशामाय वाला चिडा एता.

¹³ एने ताह एक ओहलो एक शब्द होमलानो, “हे पतरस उठ, मार एने खा.”

¹⁴ पुण पतरस कियील, “नाहं प्रभु. ऐवी वोर नाहं काहाकाय मी केधीच अपवित्र एने अशुद्ध वस्तु नाह खादो.”

¹⁵ ओवतो टायीमा ताह हा शब्द होमलूह आवा, “जे काही बोगवानान शुद्ध ठेरायेल हि, ताह अशुद्ध माणुह मां.”

¹⁶ तीन टायीमा ओहलाच एय गीयो; तेवी ते चालूच ते पात्र आकाशामाय उखीलील गीया.

¹⁷ ओवतो पतरस आपणो मोनाम विचार केरतीन एतो, कि जे दर्शन मी पेल्लो एता ते काय रेहू सेकुह, तेवी देखो, जे माणुह कुरनेलियुस ज्या मोकलील एता, ते शिमोनान घेरान बायनाआहनी आवीन उबरीयेल एता.

¹⁸ एने आयडीन फुसीन लागिल, “काय शिमोन पतरस केयेल जाथू तो न्याहीरीज पावणु केरीन हि?”

¹⁹ पतरस ते ता होपनाबाराम विचार केरतालुच. का एने आत्मा माय ताह कियील, “देख, तीन माणहे तुवाह होदतेन आवतेह.

²⁰ सेवट उठीन बुंदे जा, एने काही शंका नाह केरता ताहेर्यो जा; काहाकाय मीच ताह मोकलील हि.”

²¹ तेवी पतरस ता माणहा कियील, “देखू, जांह होदणे केरता तुमु आवील हेते तो मीच हि. तुमरो आवणेन काहाकाय हि?”

²² ता ताह कियील, “कुरनेलियुस सुभेदार जो खेरो धेर्मी एने बोगवानाह बिणार एने आखी यहूदी जातीमाय हाजो नावलायेल माणुह हि, एने तो एक पवित्र्य स्वर्गदूताफायरीन ज्योच लेक्षामाय आवील हि, का तुवाह आपणे घेरामाय हादिन तुवा फायरीन उपदेश होम्ली.”

²³ तेवी तान ताह माय हादाडळीन पावणाय केरील. दिहरो एक दिह तो तान हेरी गीयो, एने यापोमाय बायाकहे-या तान हेरी निकलीन गीया.

कुरनेलियुसान घेर पतरस

²⁴ दिहीरा एक दिह ते कैसरीयाम पोचेल, एने कुरनेलियुस आपणो कुटुंबाहे-या एने प्रिय हेरीन एक्ठाच हादाडळीन तान वाट दिखिह एतो.

²⁵ ताहे-या पतरस माय आविह एतो, तर कुरनेलियुस ताह भेट आपील, एने तान पायान पोडीन ताह नमन किरील;

²⁶ पुण पतरसाने उठीन ताह कियील, “उबरील रीवू, मी भी माणुह हि.”

²⁷ एने तान हेरी बोलतेच माय गीयो, एने जादा माणहाह एक्ठाच देखीन,

²⁸ ताह कियील, “तुमूह मालूम हि का, दिहरी जात्यू हेर्यो संगती केरणू एने ताफाय जाणे ज्यो यहूदीन केरता अधर्म हि, पुण बोगवान माहु कियील हि का काल्ला भी माणहाह अपवित्र नाह ते अशुद्ध नाय केवं.

²⁹ ज्यानकेरता ताहे-या माहु हादाड्या गीया तेवी कायीच बोलतालू निकलीन आवा?”

³⁰ कुरनेलियुस कियील, “तीन दिहान पोयले, मी आपणा घेरामाय तिसऱ्या प्रहरी प्रार्थना केरताला तेवी देखू; एक बोगवानान दूत मार ओगांण उबरील इतू.

³¹ एने केणे लागिल, हे कुरनेलियुस, तारी प्रार्थना होमेलनेमाय आवील हि, एने तारो दान बोगवानान ओगांण एर केरनेमाय आवील हि.

³² केरीन यापोसा माय माणहे मोकलीन शिमोन पतरस केणु ताह, हादाड. तो समुद्रान आहनी तो शिमोन, जो चामडान धंदा करने ताफाय पावणु केरीन हि.

³³ तेवी मी चालूच तुवा फाय माणहे मोकलील, एने तू न्या आवीन हाजो किरील, एने ऐवी आपु बोगवाना ओगाण हि काहाकाय जे काय बोगवानान तुवाह कियील हि हुमील.”

पतरसान उपदेश

³⁴ तेवी पतरसाने कियील, “ऐवी माहु निश्चित मालूम हि कि बोगवान कुणान पक्षपात केरतीन नाहं.

³⁵ नाह ते प्रत्येक दिहरी जातीन जो ताह बिन्हे एने खेरापणान काम करने तो ताह पोटणे.

³⁶ जो वचन तो ताह इस्राएल माणहाफाय मुकलेल, तेवी तो यीशु मसीहान द्वारे जो आखान प्रभु हि शान्तिन सुवार्ता होमलावील

³⁷ तू वचन तुमूह मालूम हि यूहन्नान बाप्तिस्मा सुवार्ता ओवतो गलील मायरीन सुरुवात एय आखा यहूदियामाय फेयलीन गीया.

³⁸ बोगवानान कायताहा रीतीमाय यीशु नासरीन पवित्र आत्मा एने सामर्थ्यान अभिषेक केरील तो सत्कर्मे करने एने आखाच शैतानाने जे त्रास आपील एता, हाजो केरतीन फिरील, काहाकाय बोगवान तान हेरी एतो.

³⁹ आमु ता आखा कामामाया गवाही हि कि जे ताह यहूदी तान देशाम एने यरूशलेम माय पुण किरील एने तास ताह क्रुसपूर मारील.

⁴⁰ ताह बोगवानान तिसऱ्या एक दिह जीवतालू किरील एने ताह प्रकट एने जुवी इही किरील.

⁴¹ आखा माणहाह नापून तान गवाही दारान ताह बोगवानान देखील ज्याह तान निवाडील एता म्हणजे आमरे पोररीन तान केरता तान मोरील मायरीन जीवतालू इयील ताबाद तान हेरी खाले पियली.

⁴² एने तास आमूह आज्ञा केरील कि माणहामाय पोरचार केरू, एने गवाही द्या कि हा तोच हि ज्याह बोगवानान जीवतालो एने मृत्यू पावलेल्यांचा न्यायी ठेरावील हि.

⁴³ तान आखा भविष्यवक्ता गवाही आपणु कि जो कूण तापोर विश्वास केरूह ताह तान नावापुर पापान क्षमा जुडी.”

अन्य जाती पोर पवित्र आत्मान उतेरणेन

⁴⁴ पतरस हि वात केतूच एतो कि पवित्र आत्मा आखा होमालनापोर उतरी.

⁴⁵ एने जोला खतना केरील विश्वासी पतरसाहे-यो आवील एता, ता आखा बोंगलाय गीया दिहरी जातीन उपेर पुण पवित्र आत्मान दान ओतला गीयो हि.

⁴⁶ काहाकाय ता बाती-बातीन भाषा बोलताला होमलील, एने बोगवानान महिमा केरताला होमलील तापोर पतरस कियील,

⁴⁷ “काय कूण पाप्याह थोबविण शकणे यान बाप्तिस्मा जुळी, केरीन ज्याह आमरा सारकोस पवित्र आत्मा जुडना हि.”

⁴⁸ एने ताह आज्ञा आपील कि ताह यीशु मसीहान नावामाय बाप्तिस्मा आपील जाऊ तेवी तास ताह विनंती केरील कि तो ताहे-यो उंजू काही दिह रिजी.