3 योहान 1 - नाहाली

¹ माहु डाय डाया फायरीन प्रिय गयुसान नावे, जापोर मी खेरीच प्रेम मेलणे.

² हे प्रिय बाहाक, मारी जी प्रार्थना हि का जोहलो तू आत्मिक उंन्नती केरील हि, तोहलीच तू आखी वातू माय उंन्नती केर, एने हाजो हुकेह रेंय.

³ काहाकाय जेवी बायहो आवीन, तारा ता सत्यान गवाही आपील, ज्यापोर तू खेरीच चालीह, ते माहु खोब आनंद एनो.

⁴ माहु ज्याहरीन वोदिन उंजू काल्ली आनंद नाय मिली मी होमथू, का मार सोरा सत्यापोर चालतेह

गायुसान प्रशंसा

⁵ हे प्रिय, जेवी भी तू बायहो केरीन काम किरही, एने जां बाहेर एन्जांण्या हेर्यो भी, तान विश्वासयोग्यता हेर्यो केर.

⁶ तास कलीसियान सुमोर तारो प्रेमाची गवाही आपील हि. जर तू ताह ता प्रकारे मुकलेल ज्या प्रकारे बोगवान माणहान केरता उचित हि तर हाजो केरही.

⁷ काहाकाय कि ते ता नावानकेरता निकेलना हि, एने दिहिरी जातीमायवाल हेरी काही नाहं एता.

⁸ जानकेरता तोहोलोच स्वागत केरणे जुविकाय, ज्याहरीन आमु पुण सत्याही शीडा तान सहकर्मी एहू.

दियत्रफेस एने दिमोत्रीयस

⁹ मी कलीसिया माय काही लेखील एता, पुण दियत्रफेस जो तान माय मोठा एहू इच्छितो, आमूह ग्रहण नाहं केरतीन.

¹⁰ जानकेरता जेवी मी जाहो तर तान कामान जे तो केरतीन एतो, ज्या केरीन आपुह, कि ते आमरा विषय माय वाईट-वाईट वातू किथे; एने ज्यापूर पुण वायफळ नाहं केरीन आपणो बायाक ग्रहण नाहं केरतीन, एने ताह जो ग्रहण केरूह इच्छितो नाहं केणे एने कलीसिया मायरीन काडीन टाकथू.

¹¹ हे प्रिय, बुराई नाहं पुण हाजाआ अनुयायी एवू. जो हाजो करने, ते बोगवान फायरीन हि; पुण जो वाईट करने, तान बोगवानान नाहं देखील.

¹² दिमोत्रीयसच्या विषय माय आखा, नापून सत्य पुण आपणी गवाही आपील; एने आमु पुण गवाही आपथु, एने तू ओलखणे कि आमरी गवाही खेरो हि.

आखरी अभिवादन

¹³ माहु तुवाह जुलुम काही लिखील तर एता, पुण शाई एने पेनि केरीन लिखू ईच्छा नाहं.

¹⁴ पुण माहु आशा हि कि तारो हेरी जोलदी भेट केरूह, तेवी आमु ओगाण वातू केरूह.

¹⁵ तुवाह शान्ति जुड्ताली रीवू. या मेघ माहु नमस्कार केरणू. तास दोस्ती एती नाव लेईन नमस्कार केयीन देजी.