2 तीमुथीयुस 4 - नाहाली

¹ बोगवान एने मसीह यीशुह गवाहीदार केरीन, जो जीवतालू एने मुरीलताहा न्याय केरूह, एने तान प्रकट ला एने राज्यान आपील मी तुवाह आज्ञा आपथु.

² कि तू वचनान पोरचार आखा केणेन टाइम तियार, आख्याज रोंआ प्रकारची सहनशीलता एने हिकाडणे बरोबर दोष देखाड एने जुल एने होमजाळ.

³ कारण ओहलो टाइम आवूह ताहेरया माणहे खेरो शिक्षक सहन केरुहू, नाहं पुण कान खाजविल्या आपणो वोचनेकेरता आपणे केरता जादा शिक्षक होदणे काढहु,

⁴ एने आपणा कान सत्यापरत फिरावीन कल्पित वार्ता पोर लागाडणार.

⁵ पुण तू आखा वातून होमंबालीन रीवू, दुख सहन केर, सुवर्तेचे पोरचार केर, एने आपणो सेवेला पुरो केर.

⁶ कारण ऐवी मी अर्पण एता हि, एने मारो प्रयाण काळ आहने आवा हि.

⁷ मी हाजी कुस्ती लेडाणे सुक्यू हि, मी आपणी धाव पुरो केरील हि, मी मारो विश्वासाआ रक्षा केरील हि.

⁸ भविष्यामाय मारकेरीन धार्मिकतान तो मुकूट मोकलील हि, ज्याह प्रभु जो धर्मी एने न्यायी हि, माहु ता एक दिह आपण्यू एने माहूच नाहं पुण ता आखा जे तान प्रकट प्रिय एणेन प्रिय होमोजणु.

व्यक्तिगत संदेश

⁹ माहफाय जेल्दी आवणेन प्रयत्न केर.

¹⁰ कारण देमासने आवो जगाह प्रिय होमजाडीन माहु सोडीन आपील हि एने थीस्सलुनीकेला निकलीन गीयो हि. क्रेन्स्केस गलतियो एने तीतुस दलमतीयेला निकलीन गीयो हि.

¹¹ फक्त लूकाच मारहे-या हि. मरकुस लीन आवीन जा; कारण सेवा केरता तो मारो जादा कामा हि.

¹² तुखिकुसला मी इफिसुस माय मोकलील हि.

¹³ जो बगिचामाय त्रोआस माय करपुसच्या न्या सोडीन आवा हि, ताहेरया तू आवूह तर ताह एने पुस्तका विशेष केरीन चर्मपत्रे पुण लीन आव.

¹⁴ सिकंदर तांबटा वाईट मारहे-या जादा वाईट किरील हेते; प्रभु ताह तान कर्माप्रमाणे बदला आपण्यू.

¹⁵ तू पुण तापुररीन होमंबालीन राहा, कारण तास आमरा वातील जादा विरोध किरील हि.

¹⁶ मारो पेलूच उत्तर आपणेन टाइम कुनुस मारो साथ आपील नाहं, पुण आखाच माहु सोडीन आपील. हाजो एय कि तान ताह हिशोब नाहं आपणे लागणार!

¹⁷ पुण प्रभु मारो मदत केरणार रेणू, एने माहु शेक्ती आपील तामुळे माफायरीन पुरो केर देनूह पोरचार एणेन जुवी एने आखा दिहरी जातीनी होम्लीन लेणेन जुवी. मी सिंहास मुया मायरीन सोडावील गीयो हि.

¹⁸ एने प्रभु माहु प्रत्येक वाईट कामापुररीन सोडवे, एने आपणो स्वर्गीय राज्यातम सुरक्षित पोचाड्णारे. ताणुच महिमा पिडीन पिडी एता रेणेआवी. आमेन.

आखरी अभिवादन

¹⁹ प्रिस्का एने अक्विलालाह एने उन्नेसीफुरूसच्या कुटुंब सलाम.

²⁰ ईरास्तुस कुरिन्थियो माय रेयीन गीयो हि, एने त्राफिमाय मी मिलेतूस माय दुखारया सोडीन आवा हि.

²¹ हियाला ओगाण निकलीन आवणेन प्रयत्न केर. युबुलुस एने पुरेस, एने लीवूस एने क्लौदिमुस, एने आखा बायहो तुवाह सलाम.

²² प्रभु तारो आत्मा हेरी रीवू. तुमरे पोर कृपा एता रेय.