2 तीमुथीयुस 3 - नाहाली

आखरी दिह्याम अधर्म

¹ पुण तो मेलील कि शेवटेस दिहामाय कोठीन टायम आवूह.

² कारण माणुह लोभी, स्वार्थी, डिंगमार, गर्विष्ठ, निंदा केरणार, आई आबाक आज्ञा होमालनारू, कृतघ्न, अपवित्र,

³ दया केरणार, क्षमान केरणार, दोष लागाडणार, असयंमी, कठोर, हाजुहोये वैरी.

⁴ विश्वास, दिट, कोठी, एने बोगवानाल नाहं पुण सुक्वालू आवडणारा देरणारे रेहू.

⁵ ते भोक्ती केरणेन नाटक तर केरुहू पुण शक्ती जोराकेरिन माणहा नाहं ओहलापूररीन आलेग रेणू.

⁶ तामायता माणहे हेते जे घेरामाय दाबिल पायाकेरीन पेरणेजाईल, एने ता भोळ्या बायकूह वशमाय केरीन लेनो जे पाप ने दाबिल एने प्रत्येक प्रकारान वाचणे वशमाय हेते.

⁷ एने कायम शिकाडे रेणेन पुण सत्यान ओलेखलीजू केविज पोहोचती नाहं.

⁸ तोहोलोज योनेस एने याम्ब्रेसाने मुसान विरोध किरील एतो, तोहोलोच हे पुण सत्याचे विरोध केरणू; हे इही माणुह हेते ज्यान बुद्धी भ्रष्ट एईन गीयी हेते एने ते विश्वासान विषयातमाय उरणे हेते.

⁹ पुण तो न्यारीन ओगाण जाहू शकत नाहं, कारण जीही तान मुर्खपण आखा माणहांपोर प्रकट एनी, एती तोहलीच ज्यान पुण एईन जाहू.

तीमुथियुसाह कियील विशेष वातू

¹⁰ पुण तू हिकाडील, वागणू, ईच्छा, विश्वास, सहनशीलता, प्रेम, धीरज, एने छळामाय एने दुख सहन केरणेम मारी मदत केरील;

¹¹ एने ओहला दुखा माय पुण जे अन्ताकिया एने इकुनियुम माय एने लुस्रा माय मारपुर पोडील एता, एने दिहीरा दुखा माय पुण जे मी सहन किरील हेते; पुण प्रभुने माहु आवो आखा पासून सोडवीन लीईल.

¹² पुण जोलाक मसीह यीशु माय भक्तीने जीवन जीवणु ईच्छा केरणू ता आखाज वेखडणु एय;

¹³ पुण दुष्ट एने फिरावनारु एने फिरनारो, बिगडी जातेह.

¹⁴ पुण तू ता वातुपोर जे तू हिकाणु हेते एने जे विश्वास किरील हि, हे जीही मजबूत टिकीन रीवू, कि तू ते कायताहा माणहा फायरीन हिकणे हेते,

¹⁵ एने आत्यारीनुच तू पवित्र शास्त्र हिकणे हि, जो तुवाह मसीह पोर विश्वास केरणे केरता उद्धार मिलावणे बुद्धिमान बणावूहू शकणे.

¹⁶ आखोच पवित्र शास्त्र बोगवानान प्रेरणेने बोनाईल हि एने हिकाडनु, एने होमजाडणे, एने हुदारणे धार्मिकता शिक्षेकेरिन फायदान हि,

¹⁷ तामुळे बोगवानान भक्त पुरो एईन, एने प्रत्येक हाजो कामान केरता तियार एईन जावा.