2 तीमुथीयुस 2 - नाहाली

मसीह यीशुन

¹ केरीन हे मार सोरा, तू ता कृपा माय जो मसीह यीशु माय हि, बलवान एईन जा,

² एने ज्या वातू तू मोक्तास गवाहीदारांन ओगाण होमलील हेते, ताह विश्वासी माणहा होपीन आप; जे दिहीरा पुण हिकाडनु योग्य रेणेन जुवी.

³ मसीह यीशुन हाजो शिपायाहोस मारहे-या दुख सहन केर.

⁴ ताहेरया कूण शिपाई लेडाणे जाथू तर तान केरता कि आपणी भोक्ती केरणाराह आनंद केरणू केरीन स्वताह जगाच्या कामाम ठेगनु नाहं.

⁵ ओवतो जर मल्ल युद्धाम लेडणार नियमानहोस लेढ्तेहे नाहं तर मुकूट मिलवणू नाहं.

⁶ जो खेतावालो मेहनत करने, फल्ला भाग पेल्ला ताह जुळणे जुवी.

⁷ जे मी किथे तापोर लक्ष्य आप, एने प्रभु तुवाह आखा वातू होमजाडीन आपुह.

⁸ यीशु मसीहाह एर मिल जो दाविदान वंशामरीन एनोह, एने मुरील मायरीन जीवतालू इनू, एने ज्यो मार सुवार्तान होस एनो.

⁹ ज्यानकेरता मी दुष्कर्म केरणाराहोस दुख सहन करने, न्याओर कि कैद पुण हि; पुण बोगवानान वचन कैद नाहं.

¹⁰ तान केरता मी निवाडल्या माणहा केरता आखा काही सहन करने कि, ते पुण ता उद्धार हा जो मसीह यीशु माय अनंत महिमात मिलीजावू.

¹¹ हि वात खेरो हि, कि जर आमु ताहेऱ्यो मोरीन गीया हेते, तेभी ताहेऱ्यो जीवतालू पुण एयुच;

¹² जर आमु धीर मारीतले सहन केरतीन रेहू, तर ताहेऱ्यो राज्य पुण केरणार जर; आमु तान नकार केरुहू, तर तो पुण आपणा नकार केरुहू.

¹³ जर आमु अविश्वासी पुण हेते, तेभी पुण तो विश्वास योग्य बोणावीन रेणे, कारण तो स्वताह चा नकार केरूह शकत नाहं.

हाजालो कारागीर

¹⁴ आवो वातील इआवीह ताह आप कि प्रभु ओगाण हास केरीन ताहेरया कि शब्दापूर लेढाय केरतीन रेहू नाहा, ज्यान मुळे कायीच फायदा एता नाहं पुण होमलणारे बिगडीन जातेहे.

¹⁵ स्वताह बोगवानान आयाड्णार एने इही काम केरणार बोणावणेन प्रयत्न केर, जो लाजआवी एहू नाहा, जो सत्य वचनामाय योग्य रीतीमाय कामाम लावे रेंय.

¹⁶ पुण अशुद्ध बडबडीपुररीन सेटो रीवू कारण इही माणहे उंजू अभक्तीम वोदनेन जाहू.

¹⁷ एने तान वचन सोडील जखमेहोसे पसारीन जाहो. हुमीनयुस एने फिलेतूस तामायरीन हि.

¹⁸ जे हे केयीन कि पुनरुस्थान एईन गीया हेते, हाजामरीन भटकून गीया हेते एने कोलाक जाणाह विश्वासाह उलटो सुलट केरीन आपणु.

¹⁹ तेभी पुण बोगवानान मजबूत पाया टिकीन रेणे, एने तापोर हि हाराप आपणे हि: “प्रभु आपणा जे हेते ताह ओळखणे” एने “जो कूण प्रभुन नाव लेणे, तो अधर्मा फायरीन वाचीन रिजी.”

²⁰ मोठला घेराम फक्त हुना चांदी नाहं, पुण लाकडान एने मातडयो ठामंला भी रेणू; काल्ला-काल्ला सन्मानाकेरिन रेणू, एने काल्ला-काल्ला अपमानान केरता रेणू.

²¹ जर कूण स्वताह ताफायरीन शुद्ध केरुहू, तर तो सन्मानाचे टामलाह एने पवित्र ठेरणू; एने मालकाहा कामाम आवी, एने प्रत्येक हाजो कामान केरता तियार एय.

²² जुवान्यान वासनेपुररीन सेटो पळ, एने जे शुद्ध मोनान प्रभुन नाव लेनो, जेहीकाय धार्मिकता, एने विश्वास, एने प्रेम एने मिलाप पासाण फिर.

²³ पुण गाडायील एने अज्ञानाच्या विवादारीन आलेग रीवू, कारण तुवाह मालूम हि तापुररीन लेढाई निर्माण ऐतेह.

²⁴ प्रभुन दास लेढाय केरणार मां, पुण आखाहेरया सौम्यतेने एने हिकाडणे निपुण एने सहन केरणार रेणेन जुवी.

²⁵ तो विरोध केरणारा नम्रतेने होमजाडणार, रेणेन जुवी कोणीही मालूम कि बोगवान ताह मोन फिरावणे केरता मोन आपुह कि ते पुण सत्याह ओलखिन लेहु,

²⁶ एने यान द्वारे तान ईच्छा पुरो केरणेन केरता सावधानीकेरता शैतानान लोगडी फादु सुळीन जाहू.