2 थिस्सलुनिक्यो 3 - नाहाली

प्रार्थना केरणेन विनंती

¹ सेवट हे बायहो, आमरे केरता प्रार्थना केरतीन रीवू कि प्रभुन वचन आखाजमाय जेल्दी पसरणे जुवी एने महिमाले जाणे, तुमरे माय एय गीयो,

² एने आमु वाकड एने ठेग महापुररीन वोचीन रिजी कारण आखाजमाय विश्वास हि इही नाहं.

³ पुण प्रभु विश्वास योग्य हि; तो तुमूह मजबूत एने स्थिर केरूह: एने ता दुष्ट पोररीन सुरक्षित मेलील.

⁴ आमूह प्रभु माय तुमरे पोर बुरहू हि कि जी-जी आज्ञा मी तुमूह आपथु, ताह तुमूह होमोलनु, एने मानत पुण रेहू.

⁵ बोगवानान प्रेम एने मसीहान धीरजाउखेर प्रभु तुमरो मोनान मार्गदर्शन केरू.

काम केरणेन उत्तरदायीत्व

⁶ हे बायहो, आमु तुमूह प्रभु यीशुन नावान आज्ञा करने कि तुमूह प्रत्येक ओहला सोरापुरण आलेग रीवू जो कायनयहाजो वागणू करने एने जी लिकाडतालु तास आमुफायरीन लीईल तानहोस केरतीन नाहं.

⁷ काहाकाय तुमूह मालूम हि कि कानले प्रकारे आमरा वागणू रेणेन जुवी, काहाकाय आमु तुमरे माय कायनयहाजो वागणू केरील नाहं.

⁸ एने कुणीन रूटू फुकट खाइल नाहं; पुण मेहनत एने कामान केरीन रात दिह काम केरतीन एता कि तुमरे मायरीन कुणापोर बोर पोडहुं नाहा.

⁹ याच नाहं कि आमूह अधिकार नाहं, पुण तान केरता कि स्वताह तुमरीकेरता नमुना बोणाविल एतो कि तुमूह आमरे केरता वागणू केरू.

¹⁰ काहाकाय ताहेरया आमु तुमरो न्या एता, तेवी पुण तुमूह हि आज्ञा आपतेन एतो कि जर कुणबी काम केरुहू निह एय तर खाणेन पुण नाय जुवी.

¹¹ आमु होमलथू कि कूण कूण तुमरो माय कायनयहाजो वागणू केरणू, एने कायीच काम केरतीन नाहं पुण दिहरान कामाम आथ रेतेह.

¹² ओहलाह आमु प्रभु यीशु मसीहा माय आज्ञा आपथु एने होमाजाडणे कि ठावको पुण काम केरीन आपणीच रूटू खाणे रिजी.

¹³ तुमु, हे बायहो, हाजो केरणेम तुट गीयो मा.

¹⁴ जर कूण आमरा आवो पत्राला आवो वातूह मोनाम नाहं तापोर नेजर मेलू, एने ताहेऱ्यो हेरी केरूह मा, ज्यान मुळे तो लाज आली एणेन जुवी.

¹⁵ तेभी पुण ताह शत्रु होमजू मा, पुण बाहाक होमजाडीन तान कानउगाडे केरू.

आखरी नमस्कार

¹⁶ ऐवी जो प्रभु जो शान्तिन झिर हि स्वताह तुमूह कायम एने आखा प्रकारची शान्ति बोगवानानाह एने. प्रभु तुमूहहु आखाहेरया रीवू.

¹⁷ मी, पौलुस आपणो आथान नमस्कार लेखणे. प्रत्येक पत्राम मारा ज्याच निशान हि; मी ज्योच प्रकारे लेखाणे.

¹⁸ आपणा प्रभु यीशु मसीहान कृपा तुमूह आखापूर एते रेंय.