2 थिस्सलुनिक्यो 2 - नाहाली

पापान माणुह अर्थाम विनाशने सोरो

¹ हे बायहो, ऐवी आपु आपणो प्रभु यीशु मसीहान, एने तान आहनी एखठाच एणेन विषयातमाय तुमु विनंती करने.

² कि एखादी आत्मा, केव्ही वचन केव्ही पत्राच्या द्वारे, जे जणूकाही आमरेफायरीन हि, हे सेमजीन ले प्रभुन दिह आवीन गीया हेते, तुमरो मोन उचकाहूस आलविनारू नाहा एने तुमूह बिऊ मा.

³ काल्लोबी प्रकारे कुणीन उगीरीन फुसूह मा, कारण तो दिह आवूह नाहं, जाहुजा धर्मान विरोध एय नाहं, एने तो अधर्मी माणहे म्हणजेच नाशाचा सोरो प्रकट एय नाहं.

⁴ जो विरोध करने, एने आखा पुरीन बोगवानान केव्ही पूज्य कियील, एने स्वताह मोठू माणने न्याओर कि, तो बोगवानान मंदिरामाय बोहीन स्वताह बोगवानान माणने.

⁵ मी तुमूह हेऱ्यो एतो तेवी नाहं का ताहेरया मी तुमरीफाय एतो, आवो वातू तुमूह ज्यान तुमूह एर नाह काय?

⁶ तुमूह ता वस्तूह ओलकतेह, जी ताह ऐवी थोबाडीन रेणी हि तो ताणुच दिहामाय प्रकट एणेन जुवी.

⁷ काहाकाय अधर्मचे रहस्य ऐवी पुण काम केरतीन जात, पुण ऐवी एक उबराखानारू हि जेवीवोर तो सेटो एता नाहं तो थोबीन रेंय.

⁸ तेवी तो अधर्मी प्रकट एय, ज्याह प्रभुन यीशु आपणो मुया मायरीन फुकिलो मारीन टाकणे, एने आपणो आगमनान लाडीवाला नाश केरुहू.

⁹ ता अधर्मीन शैतानान कामानहोस आखा प्रकारान वाईट शक्ती एने, चिन्ह अदभूत कामापुररीन.

¹⁰ एने नाश केरणारा केरता अधर्म आखा प्रकारान कपट एय, कारण ताह सत्याबरोबर प्रेम किरील नाहं ज्यासे तान उद्धार एता.

¹¹ ज्यानकेरता बोगवान तामाय एक भ्रांतीची शेक्ती मोकलनेकेरता कि ते ठोगनारा विश्वास वाट देखणार,

¹² म्हणजेच जोलाक माणहे सत्यान विश्वास नाहं, पुण अधर्मने आनंद ऐतेह ता आखाहुच दण्ड जुडी.

दृढ बोणीन रेवू

¹³ हे बायहो, एने प्रभुन प्रिय माणहे, जुवी का आमु तुमरेबाराम कायम बोगवानान धन्यवाद केरतीन, रिजी काहाकाय बोगवानान सुरुवातीरीन तुमूह निवाडीन लीईल कि आत्मान द्वारे, पवित्र बोणावीन, एने सत्यान पोर विश्वास केरीन उद्धार जूळनू,

¹⁴ ताजमाय तान तुमूह आमरा सुवार्ता मुळे हादाडील, कि तुमूह आपणा प्रभु यीशुन महिमाह प्राप्त केरणू.

¹⁵ तामुळे हे बायहो, स्थिर रीवू; एने ज्या ज्या वातू तुमूह जर वाचनाने केव्ही पत्राच्या द्वारे आमुफायरीन शकले हेते, ताह देरीन रीवू.

¹⁶ आमारो प्रभुन यीशु मसीह स्वताह, एने आमारो आबुक बोगवान, ज्यान आमरेपुरेन प्रेम किरील एने कृपा माय अनंत शान्ति एने श्रेष्ठ आशा आपील हि,

¹⁷ तुमरो मोनाम शान्ति बोगवानानाह एने तुमूह प्रत्येक हाजो कामाम एने वाचून मजबूत केरू.