2 थिस्सलुनिक्यो 1 - नाहाली

अभिवादन

¹ पौलुस एने सिलवानुस एने तीमुथियुसा फायरीन थीस्सलुनीकिन कलीसियान नावापुर, जो आमारो आबुक बोगवान प्रभु यीशु मसीह माय हेते:

² आमारो आबुक बोगवान एने प्रभु यीशु मसीहफायरीन तुमूह कृपा एने शान्ति जुडती रेय.

न्यायान दिह

³ हे बायहो, तुमरो विषयी आमूह कायम बोगवानान धन्यवाद केरणे जुवी, एने ज्यो योग्य हेते, ज्यानकेरता कि तुमरो विश्वास जुलुम वोधाडनु, एने तुमूहहु आखान प्रेम आपसामाय जुलुम वोदाडने हि.

⁴ न्याओर कि आमु तुमूह बोगवानान कलीसियात तुमरेबाराम गर्व करने कि जोलाक संकट एने क्षळ तुमूह सहन केरणू, ता आखामरीन तुमरो धीर एने विश्वास उघड एतो.

⁵ हे बोगवानान खेरा न्याय ने प्रमाण हि कि तुमूह बोगवानान राज्यान योग्य निकालणेन जुवी, जानकेरता दुख पुण सहन केरणू.

⁶ काहाकाय बोगवानान आहने हा न्याय हि कि जो तुमरो क्षळ करने, ताह बोदल्याम क्षळ आपण्यू.

⁷ एने जे तुमूह, क्षळ सहन केरणू, आमरेहेयो विश्रांती आपण्यू, तीबोखे ताहेरया प्रभु यीशु आपणो सामर्थ्यवान स्वर्गदूता हेरी खिजनारू आखटाहेर्यो स्वर्गामाय रीन प्रकट एय,

⁸ एने जे बोगवानान ओळखतेह नाहं एने आपणा प्रभु यीशु च्या सुवार्ताह मानत नाहं ताफायरीन बदला लेहु.

⁹ ते प्रभुन ओगाणरीन एने तान शक्तीचे उजालामरीन तेज सेटो एईन अनंतदण्ड मिलावूह.

¹⁰ हे ता एक दिह एय, ताहेरया तो आपणो पवित्र माणहामाय महिमा मिलवणे केरता एने आखा विश्वास करणारामाय आश्चर्याचे; काहाकाय एणेन केरता आवूह काहाकाय तुमूह आमरा गवाहीपुर विश्वास किरील.

¹¹ तामुळे आमु कायम तुमरीकेरता प्रार्थना पुण करने कि आमारो बोगवान आवो पाचारानाचे योग्य होमजाडील, हाजान केरीन प्रत्येक ईच्छा एने विश्वासान प्रत्येक कामाकेरता सामर्थ्याहर-या पुरो केरणू.

¹² म्हणजे आमारो बोगवान एने प्रभु यीशु मसीहान कृपान नुसार आपणा प्रभु यीशुन नाव तुमरे माय महिमाला जावा, एने तुमूह तामाय.