2 पतरस 3 - नाहाली

प्रभुन आवणेन दिह

¹ हे प्रिय, ऐवी मी तुमु ज्यो दुसरो पत्र लेखथु, एने दुयुमाय होमजाडीन तुमरा शुद्ध मोनाह उभारथू.

² कि तुमूह ज्यू वातूह जे पवित्र भविष्यवक्ता पेलूच कियील, एने प्रभु एने उद्धारकर्ताच्या ता आज्ञा एर केरू जे तुमरो प्रेरितांच्या द्वारे आपील गीयी एती.

³ पेल्ला हे ओलखिन ली कि शेवटेस दिहामाय ओहलो थट्टा केरणारा आवती जे आपणाच वोचनेनुसार चालणारे.

⁴ ता केती, “तान आवणेन प्रतिज्ञा का गीयी? काहाकाय जाविह रीन बाप दादा मोर जायील हेते, आखो तोहलोस हि जाहलो धरतीन सुरुवात से एतो?”

⁵ ता ते जांण बुजीन ज्यो विहरी गीया, का बोगवानान वचनान द्वारे आकाश प्राचीन काल से विद्यमान हि एने पृथ्वी भी पाण्या मायरीन बोणनी एने पाण्यामाय स्थिर हि,

⁶ ज्यां कारण ज्या युगान जग पाण्यामाय बुडीन नाश एय जायील.

⁷ पुण वर्तमान कालान आकाश एने पृथ्वी ताच वचनान द्वारे केरीन मिलील हि, का हेल्गाडनेमाय आवी; एने ता भक्तीहिन माणहान न्याय एने नाश ला दिह वोर ओहलाच मेलेल रेती.

⁸ हे प्रियानो, हि वात तुमरेरीन लिकाईन रीवू कि प्रभुन न्या एक दिह हजार वोरोहो बरोबर हि.

⁹ प्रभु तान प्रतिज्ञान विषय माय वार नाह केरणे, जोहलो वार किहिक माणहा सोमजणु; पुण तुमरे विषय माय धीर देरणे, ताह नाह जुवीत का कूण नाश एय, पुण ज्यानकेरता कि आखाह मोन फिरावणेन टायम जुडी.

¹⁰ पुण तो बोगवानान दिह चोरान होस आव जाय, एने ता दिहा स्वर्गान माय मोठला आवाजा हेर्यो शब्द जात रेती एने तत्व जुलुम ता ता एईन पिगली जाती एने पृथ्वी एने तान कामान न्याय एय.

¹¹ ते ज्यू सोब वस्तु, जिच रीती से पिगेलणी हि, ते तुमूह पवित्र चालचालण एने भोक्ती माय ओहलो माणुह बोणणेन जुवी

¹² एने बोगवानान ता दिहान वाट काल्ली रीती से जोवणे जुवी, एने तान जेल्दी आवणेन केरीन किहीकाय वागणू जुवी, जां से आकाश आग्ठा केरीन पिघ्ली जाती, एने आकाश ने गण जादाच ता ता एयीन गेल पोडती.

¹³ पुण तान प्रतिज्ञान अनुसार आपु एक नोवाला आकाश एने पृथ्वीन आस देखतेह जामाय धार्मिकता रेय.

जागताला एने तियार रीवो

¹⁴ जानकेरता, हे प्रिय, जेवी कि तुमूह आवो वातून आस देखताला, तर यज्ञ केरू कि तुमूह शान्ति से तान ओगांण निष्कलंक एने निर्दोष ठारा,

¹⁵ एने आमरा प्रभुन धीरान उद्धार होमजू, जोहलो आमारो प्रिय बाहाक पौलुसाने पुण ता ज्ञानानुसार जे ताह जुडील ते, तुमूह जुडील हि.

¹⁶ तोहोलोच हि तान आपणी आखा पत्रांमाय पुण आवो वातील चर्चा केरील हि, तामाय काही वात ओहलाच तान सोमेजणे केठीन हि, एने अशिक्षीत एने चंचल माणहे तान अर्थाह पुण पवित्र शास्त्राची दिहर्री भाषाहा दिहरी वातू सारकोस खेचीन टाइम आपणाच नोही काहाकाय बोणावीन जातेह.

¹⁷ जानकेरता हे प्रिय, तुमूह माणहे पेलूच ज्याह वातुहू ओलखिन होमंबालीन रीवू, काहाकाय अधर्मियांचे जागापोर ठेगान आपणी एकिजागे कोहली आथा केरीन गोमाडी देओ.

¹⁸ पुण आपणो प्रभु एने उद्धार केरता यीशु मसीहान कृपा एने ओलेख माय वोदनेन जाऊ. ताणुच महिमा ऐवी भी होवो, एने पिडीने पिडी एती रेंय. आमेन.