2 योहान 1 - नाहाली

अभिवादन

¹ मारो डाय डायान उगेरीन ता निवाडल्या बायकू एने तारो सोरान नावान, जो तान केरता मी खेरो प्रेम मेली, एने केवळ मीच नाह पुण तो आखा भी प्रेम मेलतेह सत्य ओलखतेहे;

² ते सत्य जे आमरा स्थिर रेणेन, एने कायम आमरा हेरी अटल रेंय;

³ बोगवान आबोक, एने आबोक ने सोरो यीशु मसीहा उगेरीन कृपा, दया एने शान्ति, सत्य एने प्रेम हेते आमरा हेर्यो रेय.

सत्य एने प्रेम

⁴ मी जुलुम आनंदमाय एनो कि मी तारो काही सोराह ता आज्ञानुसार, जे आमूह पित्या फायरीन जुडी एती, सत्यान चलतालोन देखील.

⁵ ऐवी हे बायकू, मी तुवाह काल्ली नोवालो आज्ञा नाहं, पुण तीस जी पेलूच तारीन आमरा हेरी हि, लिखील हि; एने तुवाह विनंती करने कि आमु एक दिहरा उपेर प्रेम मेलो.

⁶ एने प्रेम हे हि कि आमु तान आज्ञनेच्या नुसार चालू; हि ती आज्ञा हि तुमूह पेलूच तारीन होमेल्नी हि, एने तुमूह ज्यापोररीन चालणेन पुण जुविकाय.

⁷ काहाकाय कि जादा जन बटकावणारा जगामाय निकलीन आवा हि, जे हे नाहं मानत कि यीशु मसीह देहाने आवणार आवा; ठ्गनारू एने मसीह विरोधी ज्याच हि.

⁸ आपणो विषय माय सावधान रीवू, कि जो मेहनत आमु किरील हि ताह तुमूह निष्फळ एहू मा आपुह, नाह पुण तान पुरो प्रतीफळ मिळवा.

⁹ जो कूण ओगांण जात रेणें, एने यीशु मसीहान शिक्षणामाय लेटकीन नाहं रेणे, ताफाय बोगवान नाहं सोतो; जो कूण तान शिक्षणापूर स्थिर रेणे, तान आहनी आबोक भी एने सोरो भी हि.

¹⁰ जर कूण तुमरो आहने आवी एने हि शिक्षण नाहं आपण्यू, ताह नापून घेरामाय आवहू दया नाहं नमस्कार केरू.

¹¹ काहाकाय जो कूण ओला जाणाह नमस्कार करने, तो तान वाईट काम माय भागीदार एतो.

आखरी अभिवादन

¹² माहु जुलुम काही वातू तुमूह लेखणेन हि, पुण कागद एने शाईने लेखणे नाहं इच्छितो, पुण आशा हि कि तुमरो आहनी आवीन एने तुमरे ओगांण वातू केरूह, ज्याही तुमरो आनंदने पुरो एय.

¹³ तारो निवाडल्या बोणिक ने सोरा तुवाह नमस्कार केतेह.