2 कुरिंथीयो 9 - नाहाली

हाती विश्वास्यान केरता मोदेद

¹ ऐवी ता सेवान विषयी जी पवित्र माणहा केरता केरील जातेह, माहु तुमूह लिखील गिरीज नाहं.

² काहाकाय मी तुमरो मोनान तियार एनो ओळखणे, ज्यान मुळे मी तुमरेबाराम मासेदोनियाच्या रेडनरान ओगाण गर्व देखाड्थू कि अखयान माणहे एक वोरोन तियार एय गीयो हेते, एने तुमरो उत्साहाने एने जादा जाणाह उबरीयेल किरील हि.

³ पुण मी बायाक तान केरता मोकलील हि कि आमु जो गर्व तुमरो विषयी देखाडील हि, तो आवो वातून वाया एहू नाहा; पुण जोहलो मी कियील तोहोलोच तुमूह तियार रीवू.

⁴ इही एणेन मां कि जर कूण मासेदोनियाच्या रेणार मारो हेर्यो आवूह एने तुमूह तियार इयील देखूह, तर एहू शकते कि आवो खात्रीचे काहाकाय आमु हे किथी नाहं कि तुमूह लाज आली एणेन जुवी.

⁵ तान वजेसे मी बायाक हि विनंती केरुहू जरुरी समजील कि ते पेलरीन तुमरेहे-यो जाणेन जुवी, एने तुमरो उदार केरणे फोल ज्यावीरूढ पेल्लारीन वचन आपील गीया एता, तियारी केरीन मीलनु कि हे दाबावु नाहं तर उदारतेच्य फळापरत तियार एने जुवी.

दान किहिक आपणु

⁶ पुण हि वात हि कि: जो थोडो पेरणेन, तो थोडो काट्नार; एने जो जुलुम पेरणेन तो जुलुम काटी.

⁷ प्रत्येक जन जोहलो मोना माय विचार केरुहू तोहोलोच दान आपणे; कुरकुर केरीन नाहं एने जबरीवाही पुण नाहं, काहाकाय बोगवान आनंद आपणारा प्रेम करने.

⁸ बोगवान आखा प्रकारान कृपा तुमूह जुलुम केरीन आपथु जी माय आखा वातून एने प्रत्येक टाइम, आखा काही, तुमूह गिरीज हि, तुमरेहे-यो रेणेन जुवी, एने प्रत्येक हाजो कामान केरता तुमरेहे-यो जुलुम काही रेणेन जुवी.

⁹ जोहलो लेखील हि, “तो वरील, तो गारीबांह दान आपील, तान धर्म कायम टिकीन रेंय.”

¹⁰ केरीन जो पेरणारान भी एने खाणेन केरता रूटू आपथु, तो तुमूह भी आपण्यू, एने ताह फळदृपी केरुहू; एने तुमरो धार्मिकता फोलाह वोडावी.

¹¹ तुमूह प्रत्येक वातून आखा प्रकारान उदारतेकेरिन जे आमारेपुररीन बोगवानान धन्यवाद आपीह, तामाय श्रीमंत बोणावीन जा.

¹² काहाकाय हि सेवा पुरो केरणे पवित्र माणहान च गिरीज पुरो एता, इही नाहं माणहा फायरीन बोगवानान पुण जादा धन्यवाद एतो.

¹³ काहाकाय जी सेवाह प्रणाम स्वीकार केरीन ता बोगवानान महिमा प्रकट केरणू का तुमूह मसीह बोगवानान सुवार्ताह मानीन तानहोस समर्पित राहतातत्याची हि, आखाहेर्यो मदत केरणेम औदार्य प्रकट केरणू.

¹⁴ एने ते तुमरीकेरता प्रार्थना केरणू; एने तान केरता कि बोगवानान तुमरे पोर मटली कृपा केरील हि, तुमरेबाराम उत्कंठा बाळगतो.

¹⁵ बोगवानान, ता तान दाणान केरता जो केणेन बाहेर हि, धन्यवाद एय.