2 कुरिंथीयो 8 - नाहाली

मोनान उदारता से दान आपु

¹ ऐवी हे बायहो, मी तुमूह बोगवानान ता कृपेची समाचार आपथु जी मासेदोनियावर एने कलीसिया एनी हि.

² कि संकटा च्या मोठली परिक्षाम तान मोठू आनंद एने हजू दरिद्र्यामाय तान उदारता जादा वादीनगियो हि.

³ तान विषयी मारी हि गवाही हि कि तास आपणो सामर्थ्यान बोरीन सामर्थ्यचे पुण बाहेर, आपील हि.

⁴ एने आवो दाने माय एने पवित्र माणहान सेवा भागीदार ला कृपेने विषयातमाय, आमूह पोशा-पोशा जादा विनंती केरील,

⁵ एने जोहलो आमु आशा केरील एती, तोहोलोच नाहं पुण तास प्रभुह पोशा बोगवानान ईच्छा आमूह पुण स्वताह आपील.

⁶ तान केरता आमु तीतुस ला होमजाडील, कि जोहलो तान पेल्ला चालू केरील एती, तोहोलोच तामाय आवो दानाआ कामाकेरता पुण पुरो केरीन लेजी.

⁷ ज्यानकेरता जोहला तुमूह प्रत्येक वातून म्हणजे विश्वास, वाचन, ज्ञान एने आखा प्रकारान प्रयत्नात, एने प्रेमामाय जे आमरे पोररीन केरणू, वोदणु, तोहोलोच आवो दानाआ कामाम पुण वोदनेन जा.

⁸ मी आज्ञा रीतीपूर तर नाहं, पुण दिहीरा उत्साहाने तुमरो प्रेमाह खेरो पणाने पारखाणे किथे.

⁹ तुमूह आपणा प्रभु यीशु मसीहान कृपा मालूम हि कि तो श्रीमंत येतो पुण तो तुमरीकेरता गरीब एनो, म्हणजे तान गरीब एय गीयो तुमूह श्रीमंत एने जुवी.

¹⁰ आवो वातून मारा मोन किथे: हे तुमरीकेरता हाजो हि, जे एक वोरोन नाहं फक्त आवो कामान केरीन, पुण आवो वातूह आवाडावने धेरनु पुण पेल्ला आवा एता,

¹¹ तामुळे ऐवी आवो कामाकेरता पुरो केरू कि जोहलो रोकीन देरणे तुमूह तियार एता, तोहोलोच आपणेआपने परिस्थितीनुसार हे पुण पुरो केरू.

¹² काहाकाय जर मोनान तियारी हि, तानकेरीन दान पुण होवकोयत जातेह, जे तान आहने हि केव्ही तानहोस नाहं जे तान आहने नाहं.

¹³ हे नाहं कि दिहीराह आराम एने तुमूह दुख जूळनू,

¹⁴ पुण हारकोच फुसणे आवो टाइम तुमरो वातुहू, तान थोडो ला कामाम आवूह, म्हणजे तान वातुहू पुण तुमरो थोडो होनारो कामान केरता आवील जुवी म्हणजे बरोबर एईन जाहू.

¹⁵ जोहलो लेखील हि, “ज्यान जुलुम टुलू किरील तान कायीच निकेलना नाहं एने ज्यान थोडो टुलू किरील तान काही थोडो निकेलनो नाहं.”

तीतुस एने तहेऱ्या कामकेरणारे

¹⁶ बोगवान धन्यवादीत एय, ज्यान तुमरीकेरता तीस दया तीतुसच्या हृदयाम टाकील हि.

¹⁷ कि तान आमरा होमजडणे मानीन लीईल पुण जादा उत्साही एईन तो तुमरेहे-यो आवा हि.

¹⁸ आमु ताहेऱ्यो ता बायाक पुण मोकलील हि तान नाव सुवार्तान विषयी आखा कलीसिया माय पसरीलिय हि;

¹⁹ एने ओलख नाहं, पुण तो कलीसियान द्वारे निवाड पुण किरील गीयो कि आवो दानाआ कामान वजसे आमरेहेयो आवणे जुवी. आमु हि सेवा तान केरता करने कि प्रभुन महिमा एने आमरा मोनान तियारी प्रकट एईन जाणेन जुवी.

²⁰ आमु आवो वातून होमंबालीन रेणे कि आवो उदारतेच्या कामानबरामाय ज्यान सेवा आमु करने, कूण आमरे पोररीन दोष लागाडू नाहा.

²¹ काहाकाय ज्या वातू फक्त प्रभु आहानीच नाहं, तर माणहा हेऱ्या पुण हाजी हि आमु तान चिंता करने.

²² आमु ताहेऱ्यो आपणो बायाक पुण मोकलील हि ज्याह आमु पोशा-पोशा पारखिल्यु जादा वातीमाय उत्साही देखील; हि पुण ऐवी तुमरे पोर तान मटली खात्री हि, ज्यानकेरता कि तो उंजू जादा उत्साही हि.

²³ जर कूण तीतुसच्या विषयी फुसणेन तर तो मारो हेरी हि; एने मारो एखठाच बायाक काम केरताला हि, एने जर आमरा पान्यानबारमाय फुसहु तर ते कलीसिया वजेसे मोकलील एने मसीहान महिमा हेते.

²⁴ केरीन आपणा प्रेम एने आमारो तो गर्व जो तुमरो विषयी हि कलीसियान ओगाण पुरो केरीन ताह देखाड.