2 कुरिंथीयो 7 - नाहाली

¹ केरीन हे प्रियानो, जर आमूह हि प्रतिज्ञा जुडी हेते तर आवो, आपु स्वताह शरीर एने आत्माआ आखा अशुद्धते पासून शुद्ध केरणू, एने बोगवानान बिय मेलतांलोन पवित्रतेला पुरो केरणू.

पौलुसान आनंद

² आमूह आपणो हृदयाम जागो दया. आमु कुणाहेरी अन्याय किरील, नाहं कोणबी बिघडाविणे नाहं, एने कोणबी फासाडीयू नाहं.

³ मी तुमूह दोषी ठरिनिलाकेरता किथी नाहं. काहाकाय मी पेलूच कियील हि कि तुमूह मारो हृदयाम इही बोह्ना हि कि आमु तुमरीकेरता मोरणेन जीवन जीविल तियार हेते.

⁴ मी तुमूह जादा हिमंत देरीन किथी हि कि माहु तुमरे पोर मोठू गर्व हि, मी शान्ति से बोरीन गीयो हि आपणो आखा संकटामाय मी आनंदमाय जादा रेणे.

⁵ काहाकाय जेहीकाय आमु मासेदोनियाम आवा, तेवी पुण आमरा शरीराह आराम जुडी, नाहं पुण आमु चारुबी ईवोल संकट सहन करने, बाहेर लेडाणारहेर्यो, एने माय जाहखो वातू एता.

⁶ तेभी पुण दुईजानाह शान्ति आपणारा बोगवानान तीतुसच्या आवता आमूह शान्ति आपील;

⁷ एने तान आवूच नाहं पुण तान ता शान्ति से पुण जी शान्ति ताह तुमरेफायरीन जुडी एती तान तुमरी ईच्छा, तुमरो दुख, एने मारकेरीन तुमरी आशा समाचार आमूह होमलायेल, ज्यान मुळे माहु उंजू पुण आनंद एनो.

⁸ काहाकाय जर मी आपणो पत्राने तुमूह निराश किरील पुण तान माहु वाईट लागणे नाहं जोहलो पेल्ला पस्तावा लागणे एतो केरीन मी दिखेह कि ता पत्राने तुमूह निराश तर एय गीयो पुण ते थोडच टाइमाकेरता एता.

⁹ ऐवी मी आनंदित हि पुण तान केरता नाहं कि तुमूह दुख पोचाडीदे पुण तान केरता कि तुमूह ता रागाईल मोन फिरीविलो, काहाकाय तुमरो दुख बोगवानान इच्छेप्रमाणे एतो कि आमुफायरीन तुमूह काल्लूच वातून नुकसान एईन नाहा.

¹⁰ काहाकाय बोगवान भोगोत दुख ओह पश्चाताप फोसगिया निर्माण करने, तान परिणाम उद्धार हि एने ओवतो तानकेरीन फोसगिया केरणेन काम नाहं पुण जगान दुख मरण निर्माण केरूह.

¹¹ केरीन देखू, आवो वातू केरीन कि तुमूह बोगवानान भक्तीने दुख एय गीयो तुम्रेमाय कोलाक दया एने दोष निवारण एने रागलागील, एने बिय, एने उत्कंठा, एने आशा एने शिक्षण आपणेन विचार निर्माण एय गीयो? तुमूह आखा प्रकारे देखाडीन आपील कि तुमूह आवो वातून निर्दोष हेते.

¹² ओवतो मी जे तुमरेहे-यो लेखील एता, ते तावजेसे लेखील नाहं, ज्यान अन्याय किरील एने ज्यान मुळे पुण नाहं ज्यापूर अन्याय किरील पुण तान केरता कि तुमरी दया जी आमरे केरता हि ती बोगवाना ओगाण तुमरे पोर उघड एईन जाहू.

¹³ तान वजेसे आमूह शान्ति जुडी. आमरा आवो शान्तिमुळे तीतुसाच्या आनंदिसे उंजू पुण आनंद एनो काहाकाय तान जीवन तुमूह आखाज आखाच स्वस्थता जुडी.

¹⁴ काहाकाय जर मी सुमोर तुमरेबाराम काही गर्व देखाडील, तर लाजावालो नाहं, पुण जोहलो आमु तुमूह आखा वातू खेरा खेरा केयीन आपील एता, तोहोलोच आमारो गर्व देखाडणे तीतुसाओगाण खेरो निकेलना.

¹⁵ जेवीह ताह तुमु आखाज आज्ञाकारी ला इआवीह आवी कि केवी तुमूह बियीईन काटीन भूरील; एता तर तान प्रेम तुमरीफाय उंजू वोदनेन जाथू.

¹⁶ मी आनंदित हि काहाकाय माहु प्रत्येक वातून तुमरे पोर पुरो विश्वास हि.