2 कुरिंथीयो 6 - नाहाली

¹ आमु बोगवानान मदतकेरन्या हेते पुण होमजाडणे कि तान कृपा जी तुमरे पोर एनी, ताह वाया जाहू आपुह मा.

² काहाकाय तो तर किथे, “आपणो आनंद ला टाइम मी तारो होम्लीन लीईल, एने उद्धारान दिहामाय मी तुवाह मदत केरील.” देखू, ऐवी तो आनंदान टाइम हि; देखू, ऐवी तो उद्धारान दिह हि.

³ आमु काल्लोबी वातून ठोकर संधी आपतेन नाहं म्हणजे आमरा सेवेपूर काही दोष आवहू नाहा.

⁴ पुण प्रत्येक वातून बोगवानान दासा हेर्यो आपणो हाजो गुणांना उघड करने, मोठला हिमतिकेरिन, मोठला संकटामाय, दारिदद्योमाय, दुखा माय,

⁵ कोडे खाइतेवी, कैद एय गीयो, हुलडाणे, मेहनतान, जागे रेयताहा, उपास केरणे केरता,

⁶ पवित्र तामाय एने, ज्ञानासे, प्रेम माय, एने कृपाळूपनाने, पवित्र आत्मा माय,

⁷ खेरा प्रेमाकेरता, सत्यान वचनाने, बोगवानान सामर्थ्यान, धार्मिकतान हत्याराने, जे जेवड्यो बांगाडू आथाम हेते.

⁸ आदराने, अपमान, अपकीर्तीने, सतकीर्तीने. जर फसिवणारे समजी जर खेरो हेते;

⁹ ओलखणार सारकोस, तेभी पुण प्रसिद्ध हेते, मोरणाराह सारकोस हेते एने देखू, जीवतालू हि; मार खानेनकेरता हेते पुण जीवाने मारील जात नाहं;

¹⁰ शोक केरणारा सारकोस हेते, पुण कायम आनंद करने; गरीबाहोस सारकोस हेते, पुण मोक्तास जणांनाश्रीमंत बोणाव देतेह; इही हि जोहलो आम्हुफाय कायीच नाहं तेभी पुण आखा काही मेलतेह.

वाकडातिकडा जुवालाम मा जुतो

¹¹ हे, कुरिन्थियो करांनो, आमु मोकला पणाने तुवाहेर्यो वातू केरील हेते, आमरा हृदय तुमरीफाय उघडा हि.

¹² तुमरीकेरता आमरा मोना माय कायीच शंका नाहं, पुण तुमरो माय शंका हि.

¹³ पुण आपणी सोरा होमजाडीन तुमूह किथे कि तुमूह पुण तान बोदल्याम आपणा हृदय उगडीन दया.

¹⁴ तुमूह अविश्वास मेकानाराकेरीन सबंध जोडीन विजोड एहू मा काहाकाय धार्मिकता एने अधर्म ज्याह माणहाहेरो भागीदारी कोहली एय? उजालो एने आंधारो ज्यामाय जोडीदार केरणेन केवी एय?

¹⁵ ओहलाच मसीहान शैतानाशी केवी एक एय? तोहोलोच अविश्वासी एने विश्वासी न्यान केवी जमेल?

¹⁶ एने मूर्तीन हेर्यो बोगवानान मंदिरान काय संबंध? काहाकाय आमु ते जीवतला बोगवानान मंदिर हेते; जीही बोगवान केयील, “मी तांमाय रेंह एने तांमाय चाल फिर केरूह; एने मी तान बोगवान बोणूह, एने तां मारा रेती.”

¹⁷ तान केरता प्रभु तुम्हहू किथी, तामायरीन बाहेर निकलीन जात्यांचाफायरीन स्वताह आलेग रेहू; तुमूह कायीच स्पर्श केरूह मा जे अशुद्ध हेते, ते मी तुमूह स्वीकार केरुहू;

¹⁸ “एने मी तुमरो आबोक एह, तुमूह मारा सोरा एने सोरी एहो, सर्वशक्तीमान प्रभु जे किथी हि.”