2 कुरिंथीयो 3 - नाहाली

नोवाला वायदान दास

¹ काय आपु पोशा आपणी बोडाई केरणेन बाज गीया? केव्ही आपु दिहरी मान्हाकेरीन शिफारासची पत्र तुमरीफाय लावणेन केव्ही तुमरेफायरीन नाय लागी? जोहलो काही माणहे केणु, नकीच नाहं?

² आमरी पत्र तुमुच हि, जे आमरा हृदयाम लेखीन मिलील हेते एने ताह आखा माणुह ओलकतेह एने वाचतलो.

³ हे उघड हेते कि तुमूह मसीहान पत्रे हेते, ज्याह आमु सेवाहोस लेखील, एने जे शाई वाही नाहं तर जीवतालू बोगवानान आत्मा माय, देगडान डीलपोर नाहं पुण हृदयाच्या मासरूपी पाटळापुर लेखील हि.

⁴ आमु मसीहाद्वारे बोगवानापोर बोरुहूमेली.

⁵ इही नाहं कि आमु स्वताह ज्यान लायकी हेते कि आपु कायताहा वातून विचार केरूह शकणार, पुण आमरी लायकी बोगवाना फायरीन हि.

⁶ ज्यान आमूह नोवाला वाचान दास ला लायक पुण किरील शब्दाचे दास नाहं पुण आत्मान; काहाकाय शब्द पुण आत्मा जीवतालू करने.

⁷ जर तो मोरणेन वाचा ज्यान आकडो देगडापूर लिखील गीया एता, न्याओर तेजामाय एनी कि मुसान मुया मायरीन तेज कारणाने जो थोडो एता जात एतो, इस्राएल माणहे तान मूय देखहुं सेकती नाह एता.

⁸ तर आत्मान वाचा उंजू तेजामाय काहा रेहू नाहं?

⁹ काहाकाय जेहीकाय दोषी ठोरावनारो वाचा तेजामाय एतो, तर धार्मिक ठेरावणार वाचा उंजू तेजामाय काहा नाहं रेहू?

¹⁰ आपु जे तेजामाय एता, ते पुण ता दुयहेर्यो जे उंजू जादा तेजामाय एता, काही तेजामाय ठेरना नाहं.

¹¹ काहाकाय जेहीकाय ते थोडो एता, जात एता तेवी ते ते स्थिर रेहू उंजू जादा जादा तेजामाय काहा रेहू नाहं?

¹² तामुळे ओहलो आशा मेलीन आमु हीमोत केरीन बोलेहे,

¹³ एने मुसान होस नाह, तो आपणा मुया पोर पडदु टाकील इतू म्हणजे इस्राएल ता थोडो कोम एणारा तेजाह किंवा उजालाह नाय देखी

¹⁴ पुण तान मोन केठीन एय गीयो, काहाकाय आजवोर जुनो वाचा वाचातालून आपणो हृदयावर तोच पडदु पोडीन रेणे, मसीहा माय जीव उठणे.

¹⁵ आज ताहवोर जेहीकाय केध्दीह मुसान पुस्तक वोचील जाथू, तर तान हृदयावर पडदु पोडीन रेणे.

¹⁶ पुण जेहीकाय केध्दीह तान मोन प्रभु उगे फिरणार, तेवी पडदु फाड्ल्यो जाहो.

¹⁷ प्रभु तर आत्मा हि: एने जाहारी कां प्रभुन आत्मा हि ताहारी स्वतंत्रता हि.

¹⁸ पुण जेहीकाय आमु सोबान उघडाविल आखापूर प्रभुन वैभव ज्यानप्रमाणे प्रकट एतो, ज्यपुररीन आरशात, तो प्रभुन द्वारे जो आत्मा हि आमु तान तेजस्वी रुपाम अंश अंश केरीन बदलील जातेह.