2 कुरिंथीयो 2 - नाहाली

¹ मी आपणो मोनाम हे ठेराव्यू एता कि पोशा तुमरेहे-यो दुख आपणेन आवूह नाहं.

² काहाकाय जर मी तुमूह दुखी केरुहू, तर माहु आनंद आपणारा कूण रेहू, फक्त तोज ज्याह मी निराश किरील?

³ एने मी हि वात तान केरता लिखील कि कां इही एणेन मां कि मी आविलपोर, याफायरीन माहु आनंद जुळणे जुवी ताफायरीन मी निराश एहू; कराण माहु तुमूह आवो आखा वातून बुरहू हि कि जो मारो आनंद हि, तोच तुमूहहु आखान पुण हि.

⁴ मोठला संकटाम एने मोनान काम केरीन आहवा काडील तुमूह लेखत्लू एता, तान केरता नाहं कि तुमूह निराश एने जुवी पुण तान केरता कि तुमूह मोठला प्रेमाह होमजाडीन लेणेन जुवी जे मारा तुमरे पोर हि.

अपराधीह क्षमा

⁵ जर कूण निराश किरील हि, तर माहूच नाहं पुण (ताहेऱ्यो जादा वाईट केरुहू नाहं) काही तर तुमूहहु आखा पुण निराश किरील.

⁶ ओहला मान्हाकेरीन हे शिक्षण जे बायाक हेर्यो पुष्कळांना आपील हि, जादा हि.

⁷ तान केरता ज्यापुररीन हाजो हे हि कि तान अपराध क्षमा केरू एने शान्ति आपदिवू, एणेन मां कि ओहला व्यक्तीनी उंजू जादा नाराजमाय पोडीन जाहू.

⁸ आवो काइजाताहा मी तुमूह विनंती करने कि ताह आपणो प्रेमान खात्री दया.

⁹ काहाकाय मी तान केरता पुण लेखील एता कि तुमूह पारखिल्यु लेहु कि तुमूह मारो आखा वातू मानणु तियार हि कि नाहं.

¹⁰ ज्यान कुणान तुमूह क्षमा केरणू ताह मी पुण क्षमा करने, काहाकाय मी पुण जे काही क्षमा किरील हि, जर किरील रेंय, तर तानकेरीन मसीहाजागी एईन क्षमा किरील हि.

¹¹ कि शैतानोहो आमऱ्येपुररीन धावा चालणेन मां, काहाकाय आमु तान युक्तीपासून एजानल्यो नासोतो.

त्रोआस माय पौलुसान निराशा

¹² जेहीकाय मी मसीहान सुवार्ता केणेंन त्रोआस माय आवूह, एने प्रभुने मारकेरीन एक बायणो उगाडनो,

¹³ तर मारो मोना माय चैन जुडी नाहं, तान केरता नाहं कि मी आपणो बायाक तीतुस ला देखील नाहं; तान केरता कि ताफायरीन खोबीर लीन मी मासेदोनिया निकलीन गीयो.

मसीह माय विजय उत्सव

¹⁴ पुण बोगवान धन्यवादीत ओहलो, जो मसीहा माय आखाभूखी आमूह विजय उत्सवात लीन फिरणे, एने आपणो ज्ञानाचा हाजोगेंध आमरेफायरीन प्रत्येक जागे वेरायो.

¹⁵ काहाकाय आमु बोगवानान आहने उद्धार मिलवील एने नाश एने काय दुयजनाहेर्यो मसीहा हाजोगेंध हेते.

¹⁶ दिहिरानकेरता तर मोरणेन निमितान मोरील गेंध, एने कोलाक जान जीवनान निमित्ताने जीवनान हाजोगेंध. हाजो आवो वातून योग्य कूण हि?

¹⁷ काहाकाय आमु ता आखानहोस नासोतो, जे बोगवानान वचनामाय मिस्र केरणू; पुण मोनान खेरो पणाने एने बोगवाना फायरीन मसीहान आवगिया होमजाडीन मसीहा माय बोलेहे.