2 कुरिंथीयो 1 - नाहाली

अभिवादन

¹ पौलुसा फायरीन जो बोगवानान इच्छासे मसीह यीशुन प्रेरित हि, एने बाहाक तीमुथियुसाह फायरीन बोगवानान ता कलीसियान नावापुर, जी कुरिन्थियो माय हि एने आखा अखयावाला आखा पवित्र माणाहान नावापुर:

² आमारो आबुक बोगवान एने प्रभु यीशु मसीहा फायरीन तुमूह कृपा एने शान्ति जुडते रेंय.

बोगवानान धन्यवाद केरज्यो

³ आमारो प्रभु यीशु मसीह बोगवान एने आबाकने धन्यवाद ओहलो, जो दया आबुक एने आखी जातीन शान्तिन बोगवान हि.

⁴ तो आमरा संकटामाय शान्ति आपणे म्हणजे आमु तान शान्तिमुळे; जो बोगवान आमूह आपणे ताह, पुण शान्ति (सत्वना) आपुह शकुह जां काल्ला भी प्रकारान संकटामाय एती ता,

⁵ काहाकाय जोहलो मसीहान दुखा माय आपु जादा भागीदार एतो, तोहोलोच आपु खेतामाय पुण मसीहाद्वारे मोक्तास भागीदार एतो.

⁶ जर आमु संकटात सापडणे तर हि, तुमरी शान्ति एने उद्धार केरीन हि; एने जर शान्ति मिलवणे रेंय; तर तुमरो सांत्वनाकेरीन हि, ज्यान प्रभावही तुमूह बागेरीनजाहू ता कांटाळाना सहन केरीन लेनो, ताह आमु पुण सहन करने.

⁷ आमरी आशा तुमरो विषयी मजबूत हि; कारण आमूह मालूम हि तुमूह जोहलो आमरा दुखा माय, तोहोलोच शान्ति पुण भागीदार हेते.

⁸ हे बायहो, आमरी ईच्छा नाहं कि तुमूह आमरा ता संकटाविषयी तुमूह मालूम ऐन जाण्यां रेय जे आशिया माय आमऱ्येपुररीन आवा एता; आमु ओहला केठीन दाबावु दाबीन जाईल एतो जे आमरा सामर्थ्यान बाहेर एता न्याओर कि आमु जीवणेहि केव्ही मोरण्यू इही एईन गीया एता.

⁹ पुण आमु आपणो मोनाम सेमजीन लीईल एता कि आमऱ्येपुररीन मोरणेन दण्ड केरीन आपील हि, म्हणजे आमु आपणो विश्वास मारपोर मेलूह नाहा पुण बोगवानापोर जो मुरीलाह जीवतालू करने तापोर विश्वास मेल.

¹⁰ ताणुच आमूह मोरणेन ओहला मोठला संकटामाय वोचाडील, एने वोचाळू; एने तापोर पुण आमरी आशा हि कि तो ओगाण पुण वाचाडील रेंय.

¹¹ एने तुमूह भी मिलिन प्रार्थनान वजसे आमरी मदत केरू, का जो वरदान मोक्तास जाणान वजसे आमूह जुडील हि, तान कारण से खोब माणहे फायरीन उपकार स्तुती केरणू.

पौलुसान यात्रा योजनामाय बोदेल

¹² काहाकाय आमु आपणी विवेक बुद्धीन जी गवाहीपुर घमेंड केर्नु, का जगामाय एने विशेष केरीन तुमरे माय, आमरो वागणो बोगवानान योग्य इही पवित्रता एने सात्विकता हेर्यो एतो, जा शारीरक ज्ञानासे नाहं पुण बोगवानान कृपा हेर्यो हि.

¹³ आमु तुमूह उंजू काही लेखत्लू नाहं फक्त तोज जे तुमूह वाचतलो एने होमोलनु, एने माहु आशा हि कि शेवेट ताहवोर पुण मानत रेहू.

¹⁴ जोहलो तुमरे मायरीन केताहा मानीन लीईल हि कि आमु तुमरो गर्वान काहाकाय हेते, तोहोलोच तुमूह पुण प्रभु यीशु च्या एक दिह आमरे केरता गर्वाचे काहाकाय ठेरणार.

¹⁵ ज्योच भरीवसावाही मी ईच्छा केरतीन एतो कि पेल्ला तुमरेहे-यो आवहू ज्यान मुळे तुमूह उंजू एक दान जूळनू;

¹⁶ एने तुमरेफायरीन मासेदोनिया जाहू, एने ओवतो तुमरीफाय आवहू; एने तुमूह यहूदियाकडे काही ताउर पोचाडील.

¹⁷ तामुळे मी जे हि ईच्छा केरील तर काय मी उलटता देखीह, केव्ही ईच्छा केरणेन ते शरीराप्रमाणे ईच्छा केरतीन येतो केव्ही वातून होव, होव पुण केरुहू एने नाहं, नाहं, पुण केरुहू?

¹⁸ बोगवान विश्वास योग्य गवाही हि कि आमरा ता वचनामाय जे तुमूह कियील हि, एने नाहं दुयू दिसत नाहं.

¹⁹ काहाकाय बोगवानान सोरो यीशु मसीह ज्यानस आमरा द्वारे म्हणजेच मारो एने सिलवानुस एने तीमुथियुस द्वारे तुमरे माय पोरचार एनो तामाय होय, नाहं इही नाह एता, पुण तामाय होय एने होय च एय गीयो.

²⁰ काहाकाय बोगवानान जे प्रतिज्ञा हेते, ता आखा तामाय होय च्या हेर्यो हेते. तामुळे तान वजेसेपुण एय गीयो कि आमरे पोररीन बोगवानान महिमा एने.

²¹ एने जो आमूह तुवाहेर्यो मसीहा माय मजबूत करने, एने ज्यान आमारो अभिषेक किरील तोच बोगवान हि.

²² ज्यान आमुपूर छाप पुण केरीन आपील हि आत्माला आमरा मोनाम आपील हि.

²³ मी बोगवानान गवाहीदार केरीन किथे कि मी कुरिन्थियो माय एविवूर तान केरता आवूह नाहं, कि माहु तुमरे पोर दया आवील एती.

²⁴ इही नाहं कि आमु तुमरो विश्वास केरीन राज्य केरणे मागणे; पुण तुमरो आनंदम मदत केरणे हि काहाकाय तुमूह विश्वासामाय स्थिर रेतेह.