1 तीमुथीयुस 6 - नाहाली

¹ जोलाक दास तान ओझाखाली हेते, तास आप आपणाह मालक्या सन्मानान योग्य होमजणे, म्हणजे बोगवानान नाव एने हिकाडनु निंदा एहू नाह.

² ज्यान मालक विश्वासणारे हेते ताह ते बाहाक समजून तुच्छ मानू नाहा, पुण तान उंजू सेवा केरावी, काहाकाकाय ताफायरीन फायदा केरणारा विश्वासी एने प्रेमी हेते. आवो वातील लिकाडतालु आपतेन रीवू एने होमजाळीन रीवू.

झुठी शिक्षा एने धनान लोभ

³ जर कूण दिहरान प्रकारची हिकाडणे आपथु एने खेरा वातूह, म्हणजे आपणा प्रभु यीशु मसीहान वातूह एने ता हिकणे मानत नाहं जी भोक्ती प्रमाणे हि,

⁴ तर तो गर्विष्ठ एईन गीयो, एने कायीच ताह मालूम नाहं; पुण ताह वातूआत्म एने शब्दाम लेढाई केरणेन राग हि, ज्यापुररीन डाह, लेडाणे, एने निंदा वातू, एने वाईट शंका,

⁵ एने ता माणहामाय वाया लेडाणे निर्माण ऐतेह, ज्यान बुद्धी बिघाडणी गीयी, हेते एने ते सत्यापासून विहित यीन गीया हेते, जे होमोजणु भोक्ती कामान केरता बायणो हि.

⁶ पुण भोक्ती मुळे माणुह संपन्न एतो ताणुच माणुह आनंद एतो.

⁷ काहाकाय आमु जगाम काही लीन आवा नाहं एने काही लीन जाहू शकत नाहं.

⁸ जर आमुफाय खाणेन एने पीणेन हेते, तर तामाय समाधान केरणे जुवी.

⁹ पुण जे धनवान एणेन एहू, देखताला ते ओहलो परिक्षा एने डालखीम एने उपास वाया हानिकारक लालस्तलू ढेगोंन जातेह, जी माणहाह वाईट केरीन आपीह, एने नाशाच्या समुद्रा माय बुडाविन आपीह.

¹⁰ काहाकाय रुपयाह लोभ आखा प्रकारान ओगाणजाणार मूल हि, ज्याह मीडवीहे प्रयत्न केरतीन प्रत्येकाने विश्वासदेखऊ भटकून मोकता प्रकारान दुखा माय खुपित लीईल हेते.

तीमुथियुसाह कियील व्यक्तिगत वातू

¹¹ पुण हे बोगवानान जन, तू आवो वातुपुररीन पळ एने धार्मिकता, भोक्ती, विश्वास, प्रेम, धीरज, एने नम्रतेहां पाठलाग केर.

¹² विश्वासाआ हाजी कुस्ती लेडाणे; एने ता अनंत जीवनाह देरीन ले, जानकेरता तू बोलणे गीयो एने जादाच गवाहीदाराओगाण हाजो केरीन देराय गीयो एतो.

¹³ मी तुवाह बोगवानान, जो आखा जीवतालू मेली एने, यीशु मसीहान गवाहीदार मेलीन ज्यान पुन्तियुस पिलातुसा ओगाण हाजो स्वीकार किरील हि, आज्ञा आपथु.

¹⁴ का तू आमरो प्रभु यीशु मसीह प्रकट एईल आवो आज्ञा निष्कलंक एने निर्दोष मेलील,

¹⁵ जाह तो योग्य टाईमपोर देखाळी, जो परमधन्य एने एक मात्र अधिकारी एने राजांन राजा एने बोगवानान बोगवान हि,

¹⁶ एने अमरता ताणुच हि, एने तो अगम्य उजालाम रेणे, एने ताह कूण माणहाह देखील नाह एने देखहु पुण शकत. कायनाताह सन्मान एने राज्य पिडीन पिडी रेंय. आमेन.

¹⁷ ज्याह जगाच्या धनवानांना आज्ञा आप कि अभिमानी एहू नाहा एने चंचल धनावर आशा मेलहु नाहा, पुण बोगवानापोर जो आमरा हजाकोता आखा काही भरभराटीने आपथु.

¹⁸ तास हाजो केरणू, एने हाजो कामाम धनवान बोवणू, एने दिहीराहसे एने मदत केरणेम तत्पर एय,

¹⁹ ओगाण टायमाकेरिन एक हाजो पाया टाकिलो ज्यान मुळे खेरा जीवनाह विसीन लेहु.

²⁰ हे तीमुथियुस, आवो मेलील हाभालत्लू रक्षा केर; एने ज्ञानाह ज्ञान काल्लोच ठेगणे हि, तान अशुद्ध बकवाद एने विरोधान वातुपुररीन आलेग रीवू.

²¹ कोलाक आवो ज्ञानाह स्वीकारीन विश्वास मायरीन भटकून गीया हेते. तुमरे पोर कृपा एता रेय.