1 तीमुथीयुस 5 - नाहाली

विश्वास्यान प्रती जिम्मेदारी

¹ कूण डावाला हे-या लेडावू मा, तर ताह आबोक केरीन समजून लिवू, एने जुवान्याह बाहाक होमजाडीन;

² डावाली बायकू आहाक समजून; एने जुवान बायकू पुरो पवित्रतेने बोणिक समजून होमजाडीन आप.

³ ज्या विधवा बायकू, खेरी खेरीच विधवा हेते, तान सन्मान केर.

⁴ जर कूण विधवान सोरा केव्ही सोरानसोरो हेते, तर ती पेल्ला आपणाच परिवाराह-या भक्तीने वाघीविल, एने आपणो आहाक आबुक यान पेल्लाचने ताह हक्क आपणेन हिकाडणे जुवी, काहाकाय हे बोगवानान पोटणे.

⁵ जी खेरी खेरीच विधवा हि, एने जीन कूण नाहं, ती बोगवानापोर आशा मेलणे, एने रात दिह विनंती एने प्रार्थनाम लक्ष्य आपीह;

⁶ पुण जी भोगविलासात पोडीन जातीह, ती जीवताला हि तेभी मोर गीयी.

⁷ आवो वातील पुण आज्ञा आपतेन रीवू ज्यानकेरता ती निर्दोष रेय.

⁸ पुण जर कूण आपणो केरणार विशेष केरीन आपणो गेरल्याहेरीच चिंता केरतीन नाहं, तर तो विश्वासदेखऊ सेटो निकलीन गीयो हेते एने तो अविश्वासन मेलनारापूर पुण वाईट बोणावीन गीयो हि.

⁹ एने तान विधवा नाव लेखील जाणे, जी साठ वरह्यारीन थोडो नाहं, एने एकुच एदम्यो बायकूणी रेंय,

¹⁰ एने हाजो कामाम हाजो नाव रेंय, जिने सोरा पोहणे देखणे किरील रेंय; एने घेरिनालान सेवा केरील रेंय, पवित्र माणहान पाय धुवील रेंय, माड्वाद्या मदत केरील रेंय, प्रत्येक हाजो कामाम मोन लागाडील रेंय.

¹¹ पुण जुवान विधवा नाव लिखू नाहा, काहाकाय ज्या मसीहान विरोध केरीन हाजू हि पोडीन जातेह तर तीह वाराड केरुहू पोटणे,

¹² एने दोषी ठेरणे, काहाकाय तिने आपणो पेल्लो विश्वास सोडीन आपील हि.

¹³ ताहेऱ्यो ती घेरागेर फिरीन आळशी बोनाडनेन हिकाडते, एने फक्त आल्युहू नाहं तर बोडबोड केरतीन बुहही एने दिहीरा कामाम आथ पुण टाकणे एने कायनयहाजो वातू केरतीन रेणेन.

¹⁴ तामुळे माहु हे लागीह कि जुवान विधवांनी वाराड केरणू, एने सोराह जेल्मो आपील घेरदार होमालणे, एने कूण शत्रुह निंदा केरणेन संधी आपुह नाहा.

¹⁵ काहाकाय काहिक तर भटकून शैतानान पासाण लागिल हेत्यू.

¹⁶ जर कूण विश्वासणाऱ्यांच्या न्या विधवा ओता, तर तहाच तान मदत केरावी कि कलीसियान पुर वजन आवहू नाहा, म्हणजे कलीसिया तान मदत केरूह शकणार ज्या खेरी खेरीच विधवा हेते.

¹⁷ जे डाय डाया हाजी व्यवस्था केरणू, विशेष केरीन ते जे वचन होमेलनेमाय एने मेहनत केरणू, दुय पट्ट जुलुम सन्मानाचे योग्य समजील जाणे.

¹⁸ काहाकाय पवित्र शास्त्र किथी का, “मोलने केरता बोयलाह मुहको बांधणु नाहा” काहाकाय “मोंजऱ्या आपणी मोजरी हक्कदार हि.”

¹⁹ काल्लोच हि दोष एखादा डाय डाया लागाडणार तर दुय केव्ही तीन गवाहीदार शिवाय ताह होमलूह नाहा.

²⁰ पाप केरणारा आखानुच सुमोर होमजाडीन आप, म्हणजे उंजू माणहे भीतीह.

²¹ बोगवान, एने यीशु मसीह एने निवाडील स्वर्गदूताह उपस्थित होमजाडीन मी तुवाह चेतावणी आपथु कि तू मोन उगडीन मानत रीवू, एने काल्लोज काम पक्षपाताने केरूह नाहा.

²² कुणापोर हि जेल्दी आथ मेलहु मां, एने दिहरान पापाहाम भागीदार एहू मां; तर स्वताह पवित्र मेलील.

²³ भविष्यामाय फक्त पाईजे पिणे एरहु, पुण आपणो पेटानकेरिन एने टायमोटायमापुररीन दुखारया दोवडतीन हि ताम जारिक अंगूररस पुण पिते रीवू.

²⁴ कोलाक माणाहान पाप उघड एईन जातेह एने न्यायाकेरिन पेलूच पोचाडीन जातेह, पुण कोलाक जान पासाण आवते.

²⁵ तोहोलोच काही हाजो काम पुण प्रकट ऐतेह; एने जे इही रेथे नाहं, ते पुण निकाल शकत नाहं.