1 तीमुथीयुस 3 - नाहाली

कालीसियामाय अध्यक्ष

¹ जीवात खेरो हि कि जो अध्यक्ष रेणे जुवी, तो हाजो हाजो कामान ईछा करने.

² तो आवश्यक हि कि अध्यक्ष निर्दोष, रेणेन जुवी एकुच बायकू एदमी रेणेन जुवी, स्वताह आवरणार, सुशील, सौभ्य, पाहूणचार केरणार, एने हिकाडणार निपुण रेणे जुवी.

³ पियक्कड, एने लेडाणार केरणार नाहं; पुण सौम्य एने लेढाय केरणार, नाहं एने द्रिन्य लोभी ऐन जाण्यांरेवू.

⁴ आपणो घेराम हाजी व्यवस्था केरतीन रेंय, एने आपणो सोराह सोराह आखा कठीण तेणे अधीन मेलतांलोन रेंय.

⁵ ताह-या कुणबी आपणो कोरीज व्यवस्था केरणेन मालूम निह एय, तर बोगवानान कलीसियाची देखरेख कोहली केरूह?

⁶ पोशा हे कि नोवालो चेला ऐन जाण्यांरेवू, इही एणेन मां कि गर्व केरीन शैतानाहोस शिक्षा ताह जुडणे.

⁷ बाहेर्रीन माय पुण तान निंदा एणेन मां, तान शैतानान फादु फसुस नाहा.

कलीसियान दास

⁸ तोहोलोच दासा केरीन पुण कठीण रेणेन जुवी, दुयमुया, पियक्कड, एने अधर्मचे पोशा कोमाडणेकेरिन लोभी ऐन जाण्यांरेवू;

⁹ पुण विश्वासान रहस्याला शुद्ध विवेकाने सुरक्षित मेलणेन जुवी.

¹⁰ एने हे पेल्ला परीक्षण केरणे जुवी एने जर निर्दोष निकलील तर दासाआ काम केरणू.

¹¹ इही केरीन बायकू पुण कठीण एणेन जुवी; दोष लागाड्णारी काय नाहा, पुण होमंबालीन एने आखा वातून विश्वास योग्य एने जुवी.

¹² दास एकुच बायकून एदमी रोनुजुविह एने सोराह सोराह एने आपणो घेर हाजी व्यवस्था केरणार रोनुजुविह.

¹³ काहाकाय जो दासाआ काम हाजो प्रकारे केरूह शकणे, तो आपणे केरता हाजो पद एने ता विश्वासान जो मसीह यीशु पोर हि, मोठा हिमंत मेलविल.

महान रहस्य

¹⁴ मी तुवा फाय जेल्दी आवणेन आशा मेलीपुण ज्याह वातू तान केरता लेखाडनु,

¹⁵ कि जर माहु आवणेन वार एनो, तर समजून जाणेन कि बोगवानान घेराम जी जीवतालू बोगवानान कलीसिया हि, एने जो सत्यान स्तंब एने पाया हि ताम केवी वागणू केरणे जुवी.

¹⁶ याम शंका नाहं कि भगत रहस्य कठीण हि, म्हणजे, तो जो शरीर माय प्रकट एनो, आत्मा माय खेरो ठेरेल, स्वर्गदूताह देखानो, दिहरी जातीमाय तान पोरचार एनो, जगाम तापोर विश्वास किरील गीयो, एने महिमात उपेर विशेल गीयो.