1 तीमुथीयुस 2 - नाहाली

आराधनान बारामाय वातू

¹ ऐवी मी आखान देखील हि विनंती करने कि विनंती, प्रार्थना, एणेन नेवतो, धन्यवाद आखा माणहान केरीन किरील जाणे.

² राजा केरीन एने उच्च पदोवाला केरीन जानकेरता कि आमु विश्रांती एने शान्ति ने आखीच भोक्ती एने गंभीरतेने जीवन जीवणे जुवी.

³ ज्यो आमारा उद्धारकर्ता बोगवानाह हाजो लागणे एने ताह योग्य भी हि,

⁴ जो हे ईच्छा करने कि आखा माणहान उद्धार एणेन जुवी, एने ते सत्याह ओलखिन लेणेन जुवी.

⁵ काहाकाय बोगवान एकुच हि, एने बोगवान एने माणहान विचमाय पुण एकुच माणुह हि, म्हणजे मसीह यीशु जो माणुह हि.

⁶ जो स्वताह आखान केरीन मुक्तीन किमुत आपील, एने तान गवाही योग्य टाइम आपील गीयी.

⁷ मी खेरीच किथे, ठेगणे बोलीह नाहं, कि मी ज्योच उदेशान पोरचारक प्रेरित एने दिहरी जातीन माणहा केरता विश्वास एने सत्यान शिक्षक निवाड किरील गीयो.

⁸ तामुळे लागीह कि प्रत्येक जाण, किसवायल नाहं एने विवाद सोडीन पवित्र आथ विसीन प्रार्थना केरतीन रिजी.

⁹ तोहोलोच बायकू पुण स्वताह विसीन एने शंका केरता होबा आपण्यू ओहला फाडकाकेरिन स्वताह होमजाडणु; तर लेडया गुफिलो केव्ही होनाने केव्ही मोत्यान फाडकाकेरिन होमजाडणु नाहा,

¹⁰ पुण हाजो कामांन, होबाडू काहाकाय बोगवानान भोक्ती केरणारा बायकूह ज्याच योग्य हि.

¹¹ बायकू ठावकाज एने पुरो आधीनतेणे हिकणे हि.

¹² मी किथे कि बायाकू हिकाडू नाहा एने एदम्यापूर आज्ञा चालाडू नाहा, पुण ठावको रिजी.

¹³ काहाकाय आदम पेल्लो बोनाईल तान ओवतो हवा बोनाडी.

¹⁴ एने आदम फोसिगोयो नाहं तर हवा भूलात पोडीन गुन्हेगार एनी.

¹⁵ तेभी पुण बायकू आतल्यो सोरो जेल्मो आपीलताहा उद्धार पावेल, जर ती स्वताह विसीन विश्वास, प्रेम, एने पवित्र स्थिर रेणी तर.