1 थिस्सलुनिक्यो 5 - नाहाली

पुनरागमनान केरता तियार रिजो

¹ पुण हे बायहो, ज्यान प्रयोजन नाहा केरता वेल एने कालान विषयाम तुमूह लेखणेन काही गेरेज नाय मिले.

² काहाकाय तुमु पाको मालूम हि कि जोहलो राती चोर आविह, तोहोलोच बोगवानान दिह आवण्यो हि.

³ जेवी माणहे किथी एती कि “शान्ति न्या हि, काही बिणेन गिरीज नाहं” तर तापोर एकाएक संकट आवीन जाण्याकेरिन पेटावालीह दुख आवी; एने तोहोलो ते तारास ऐतेह ताह सहन एय नाहं.

⁴ पुण हे बायहो, तुमूह तर आंधाराम नाहं, हि कि तो दिह तुमरे पोर चोरान होस आवीन पोळी.

⁵ कारण तुमूह पुरो उजालान सोरा एने दिहान सोरा हि पुण; आमु रातीही नाहं, एने आधाराम पुण नाहं.

⁶ तामुळे आमु दिहरान्होस निंदिमाय रेहू नाहा, एने तुमूह जागे रेयीन होमंबालीन रिजी.

⁷ कारण जे हुविलो ते रातीन हुविलो, एने जे झिंगणार ते रातीन झिंगतात.

⁸ पुण आमु ज्या दिहान हेते, विश्वास एने प्रेम ज्ञान उरस्राण कालिते एने उद्धारान एने आशा टोपी रीगाडीन होमंबालीन रीवू.

⁹ कारण बोगवानान आमूह क्रोधासाठी नाहं, पुण तान केरता नेम्युहू हि कि आमु प्रभु यीशु ख्रीस्ताद्वारे उद्धार जुडील.

¹⁰ तो आमरे केरता ज्यानकेरता मरण जूळनो कि आमु जर जागे हेते केव्ही हूवताला हे ता, आखा मिलिन ताहेऱ्यो जीवतालू रिजी.

¹¹ ज्यानकेरता तुमूह एक दिहरान सांत्वन दया एने एका दिहराफाय उन्नतीचे कारण बोणो, जेही का तुमूह केरणू भी.

कलीसियान उपदेश

¹² हे बायहो, आमु तुमूह विनंती करने कि जे तुमरे माय मेहनत केरणू, एने मसीह तुमरो मार्गदर्शन केरणारा हेते, एने तुमूह हिकाडते, तानकेरीन मान राखणे.

¹³ एने तान कामान वजसे प्रेमाकेरिन ताह जादा सन्मानाने योग्य मानू आपपेहला मिलिन बेलाइन रीवू.

¹⁴ हे बायहो, आमु तुमूह होमाजाडणे, कि जे हाजकेरीन वागणे नाहं, ताह होमाजाडील जे धीर धेरनु, जा नाराज हेते ताह धीर दया मूर्खाह हम्बालीलो, आखा पोररीन सहन शेक्ती देखाड.

¹⁵ होमंबालीन! ओहलो कूण कोणीही वाईटोबद्दल वाईट केरू नाहा; पुण कायम हाजे केरणेम तियार रीवू, आपसामाय एने आखाहेर्यो हाजो केरणेन चेष्टा केरू.

¹⁶ कायम आनंदित रीवू.

¹⁷ नित्य प्रार्थनामाय रीवू.

¹⁸ आखी वातू माय धन्यवाद केरो; कारण तुमरीकेरता मसीहा माय बोगवानान जिच ईच्छा हि.

¹⁹ आत्माह उलाडदिईल मा.

²⁰ भविष्यवाणीह तुच्छ मानू मा.

²¹ आखा वातून ओलेख केरू; जे हाजो हेते ताह देरावीन रीवू.

²² आखा प्रकारान कायनेहाजो तारीन सेटो रीवू.

आशीर्वाद

²³ शान्तिन बोगवान स्वताह तुमूह पवित्र केरूह; एने तुमरो आत्माह एने जीव एने शरीर आमारो प्रभु यीशु मसीह आवीताहुखवोर पुरो पुण निर्दोष एने सुरक्षित रीवू.

²⁴ तुमूह हादणेन विश्वास योग्य हि, एने तो ओहलाच केरूह.

²⁵ हे बायहो, आमरे केरता प्रार्थना केरू.

²⁶ आखा बायाक पवित्र चुंबनाने स्वागत केरू.

²⁷ मी तुमूह मसीहान शपथ आपथु कि हे पत्र आखा बायाक वाचीन होमलाडे.

²⁸ आपणा प्रभु यीशु मसीहान कृपा तुमरे पोर एते रेंय.