1 थिस्सलुनिक्यो 4 - नाहाली

जीवन जो बोगवानाह आनंद केरी

¹ ज्यानकेरता हे बायहो, आमु तुमुहू विनंती केरतेह एने तुमुहू प्रभु यीशु माय होमजाडते का जीही तुमु आमु पेलूच रीन हाजी चाल चालील एने बोगवानाह प्रसंत्र करनेन हिकील हि, एने जोहलो तुमु चोलतेह भी, तेहलोज एने वोड़ते जावा.

² कारण तुमूह मालूम हि कि आमु प्रभु यीशु फायरीन तुमूह कुणीकुनी आज्ञा पोचाडील.

³ कारण बोगवानान ईच्छा हि कि तुमूह पवित्र बना: म्हणजे व्यभिचारा पासून सेटो रीवू,

⁴ एने तुमरे माय प्रत्येक जन पवित्रतेने एने मानणु आपणो बायकू प्राप्त केरणेन मालूम जुवी,

⁵ एने ज्यो काम अभिलाषासे नाह एने, एने नाह दिहरी जातीन होस जी बोगवानाह नाह ओल्खेत,

⁶ जी वातून कूण आपणो बायाक ठेगहू नाहा, एने तापोर गैरफायदा लेहु नाहा, कारण प्रभु आवो आखा वातून बदला लेहु हि; जोहलो कि आमु तुमूह पेलूच कियील एने होमंबालीन पुण किरील एता.

⁷ कारण बोगवानान आमूह अशुद्ध एणेन केरता नाहं, तर पवित्र एणेन केरता हादाड्या हि.

⁸ तामुळे जो ज्याह तुच्छ जाणीह, तो माणहाह नाहं पुण बोगवानान तुच्छ जाणीह, जो आपणो पवित्र आत्मा तुमूह आपथु.

⁹ पुण बाहाक प्रेमाच्या विषयातमाय हे आवश्यक नाहं कि मी तुम्हीही काय तेभी लिखू, कारण आपसामाय प्रेम केरणेन तुमूह स्वताह बोगवाना फायरीन हिकना हेते;

¹⁰ एने आखा डोडू मासेदोनियाच्या पाविले बरोबर इही केरणू. पुण हे बायहो, आमु तुमूह होमजाडणार कि उंजू वोळतेच रीवू,

¹¹ एने जीही आमु तुमूह आज्ञा आपील हि, तोहोलोच ठावको पुण रेणेन एने आप आपणा काम केरणे एने आप आपणाह आताकेरिन कोमाडनु प्रयत्न केरू;

¹² म्हणजे बाहेर्रीन फायरीन सन्मान मिळवा, एने तुमूह काल्लीच वस्तून कमीपणा नाहं.

यीशुन पोशो आवणो

¹³ हे बायहो, आमरी ओहलो ईच्छा नाहं कि तुमूह तान बारामाय जे हुविह हि, एनजांण्या रिजी; इही एणेन मां कि तुमूह दिहरांकेरीन दुख केरणू ज्याह आशा नाहं.

¹⁴ कारण जर आमु विश्वास करने कि यीशु मोरणु एने पोशो जीवतालू उठिल, तर तोहोलोच बोगवान ताह पुण जे यीशु माय मोराना हेते, ते ताहेऱ्यो लीन आवी.

¹⁵ कारण आमु प्रभुन वचनामाय तुमूह हे किथे कि आमु जे जीवतालू हि एने प्रभु चे आवेतनाहा वाचीन रेहू, मोरणेन केधीच ओगाण जाहू नाहं.

¹⁶ कारण प्रभु यीशु मसीह स्वताह स्वर्गामाय रीन उतरी; ता टाइम आज्ञा आपुह एने प्रमुख दूतांह शब्द होमलूह आवूह, एने बोगवानान तुतारी फुकल्यो जाहू; एने जे मसीह मुरील हेते, ते देखील जीवतालू उठी.

¹⁷ तेवी आमु जे जीवतालू एती ताहेऱ्यो मेघाहेर्यो उचललेले जाहू कि अंतराळात प्रभुह मीलहु; एने ज्यानप्रमाणे आपु कायम प्रभु बरोबर रेहू.

¹⁸ इही केरीन जी वचनाने एक दिहरान सांत्वना आपतेन रीवू.