1 थिस्सलुनिक्यो 1 - नाहाली

अभिवादन

¹ पौलुस एने सिलवानुस एने तीमुथियुस ने उगीरीन एने थीस्सलुनीकिन ने कलीसियान नाव, जो बोगवान पिता एने प्रिय यीशु मसीह माय हि: कृपा एने शान्ति जुडती रेय.

थीस्सलुनीकियोंन विश्वास

² आमु आपणा प्रार्थनाम तुमूह ज्यानकेरता करने एने प्रत्येक टायीमा तुमूह आखान विषयाम बोगवानान धन्यवाद आपणु,

³ एने आपणो बोगवान एने आबाकने सुमोर तुमरो विश्वासाचे काम, एने प्रेमाआ मेहनत, एने आपणा प्रभु यीशु मसीहा माय आशान धीरजला सतत इर आविह केरतीन रेणे.

⁴ हे बायहो, बोगवानान प्रिय माणहे, तुमूह मालूम हि कि तुमूह बोगवानान निवडाविले हि.

⁵ कारण आमरी सुवार्ता तुमरेहे-यो फक्त शब्दाम सामर्थ्य नाहं तर पवित्र आत्मा माय, एने मोठला खात्री केरीन पोचना हि; जोहलो तुमूह होमजील कि आमु तुमरीकेरता तुमरे माय इही बोणावीन गीया एता.

⁶ तुमूह मोठला दुखा माय, पवित्र आत्मा माय आनंदाहेर्यो, वचनामाय मानीन आमुफाय प्रभु केरता चाल चालू लागिल.

⁷ न्याओर कि मासेदोनिया एने अखयावाला आखा विश्वास मेकीलपूर तुमूह नमुना बुणील.

⁸ कारण तुमरो यारीन फक्त मासेदोनिया एने अखयामाय प्रभुन वचन कियील गीया, इही नाहं तर तुमरो विश्वास जो बोगवानापोर हि, प्रत्येक जागे ओहलो चर्चा फेयलीन गीयी हि कि आमूह केणेन आवश्यकता नाहं.

⁹ काहाकाय ता स्वताह च आमरा विषय माय केणु का तुमरे आहने आमरो आवणो कोहलो एनो; एने तुमु काहा मूर्ती से बोगवाना वूखेर फिरना काहाकाय जीवताला एने खेरा बोगवानान सेवा केरू,

¹⁰ एने तान सोरान स्वर्गामाय रीन आवणेन वाट दिखिह रीवू ज्याह तान मोरील मायरीन जीवतालू किरील, म्हणजे यीशुन जो आमूह आवणारा संकटामाय सोडविल हि.