1 पतरस 4 - नाहाली

बोदलील जीवन

¹ ज्यानकेरता जेवी कि मसीहाने शरीरा माय रेयीन दुख उखीलील तर तुमु पुण ता मनो बदलीतदेल शस्त्र पेरणुकेरू, काहाकाय कि तान केरता शरीरांकेरिन दुख उखीलील पाप ने सोडी एने,

² काहाकाय कि माणहान आपणो उगरील शारीरिक माय वाला जीवन माणहान वासना प्रमाणे नाहं तर बोगवानान इच्छेकेरिन नुसार घालावे.

³ काहाकाय कि दिहरी जाती ज्यान इच्छेकेरिन नुसार काम केरणेन, एने अशुद्ध कामनशक्ती, विषयवासना, मद्यसक्ती, रंगेल पणा, बदफैली, एने नीषर्द मूर्ती पूजा माय जांबी ताहवोर आमु पेल्ला टायीमा मोकलीदेईल नाहं, जुलुम एय गीयो.

⁴ यान ते नवल केरणू कि तुमूह तोहोलो हजू बेताल पणाम ताह साथ नाहं आपतेन, एने जानकेरता ते हजो बुरो केणु,

⁵ पुण ते तान जो जीवंताचा एने मुरीलताहा न्याय केरणे तियार हि, हिशोब आपती.

⁶ काहाकाय कि मुरीलाह पुण सुवार्ता ज्ञान केरता होमलाळीन गीयी, कि शरीर आखह माय वाला तर मान्हाहेर्यो तान न्याय होवो, पुण आत्मा माय ते बोगवान नुसार जीवतालो रीवू.

बोगवानान हाजाला सुभेदार

⁷ आखी वातूह शेवेट एय हि; ज्ञान केरता मर्यादेने रीवू प्रार्थना करण्या केरता होमंबालीन रेवू.

⁸ आखामाय श्रेष्ठ वात हि कि एक दिहरापुर होवटो प्रेम केरू, कारण कि प्रेम मोकता पापोहो डापिल लेथू.

⁹ बिगेर कुरकुर केरीन एक दिहरान होगा पावणाय केरू.

¹⁰ ज्याह जे वरदान जुडील हि, ते ताह बोगवानान आंगेआगे प्रकारान कृपादाणा नुसार हाजो कारभारी प्रमाणे एक तीहरा सेवा केरू.

¹¹ जर कूण बोली, तर इही बोली होमजू बोगवानान वचन हि; जर सेवा केरी, तर ता शक्ती केरी केरू जो बोगवान आपथु; ज्यान नी आखा वातू माय यीशु मसीहान वजेसे बोगवानान महिमा प्रगट एय. महिमा एने साम्राज्य पिडीन पिडी ताणुच हि. आमेन.

मसीहान दुखाम भेलाणो

¹² हे प्रियांनो, जे दुख रूप आकठाम तुमूह पारखिल केरता तुमरे पोर आवी हि, याफायरीन हे होमजाडीन नवल मा केरूह कि एजानल्यो वात तुमरे पोर आरदज आवी हि.

¹³ पुण जोहलो जोहलो मसीहान दुखा माय भेलाईल ऐतेह, आनंद केरू, ज्यान नी तान महिमा प्रगट ला टायीमा पुण तुमूह आनंद आनंदमाय एय.

¹⁴ ओवतो जर मसीहान नाव केरता तुमरी निंदा केरील जातेह तर तुमूह धन्य हेते, कारण कि महिमान आत्मा, जो बोगवानान आत्मा हि, तुमरो उपेर आवीन रीयेल हि.

¹⁵ तुमरो मायरीन कूण माणुह खुनी केव्ही चोर किव्हां दुष्कर्मी रेंय, किव्हा दिहीरा काम माय आथ टाकणेन कारणाने दुख पालूहु नाहा.

¹⁶ जर मसीही ला कारणाने दुख जुडील, तर लज्जीत नाहं एवू, पुण आवो वातू केरता बोगवानान महिमा केरू.

¹⁷ काहाकाय कि ती टाइम आवीन गीयी हि कि पेल्ला बोगवानान घेराम रीन न्याय किरील जाऊ; एने ताहेरया यीशु नी सुरुवात आमरा तारीन एय तर तानकेरीन काय शेवेट एय जे बोगवानान सुवार्ताह मानत नाहं?

¹⁸ एने “जर खेरो माणुह पुण केठीन पणाने उद्धार पावेल, तर खोटा एने पाप्यान काय ठिकाणी?”

¹⁹ ज्यानकेरता जो बोगवानान ईच्छा अनुसार दुख विसिह, तो हाजो केरतीन, आपणा आपणा जीवाह विश्वास योग्य सृजनहारान आथाम होप देवु.