1 पतरस 3 - नाहाली

बायकू एने एदमी

¹ हे बायकू, तुमु आपणा एदम्यान अधीन रीवू, तान केरता का जर ज्यामारीन कूण या रेय जें वचनाह मानत रेय,

² तेभी पुण तुमरो बिणाराहे-रो पवित्र चाल-चलणूकला पाहून बिना वचनो आपणो आपणा लाडीन चालचलकान द्वारे लीईल जाणे.

³ तुमरो होबा देखानारो नाहा, म्हणजे लेव्यानहोस गुफिन, एने होनान समाने, केव्ही आलेग आलेग फाडका पेरणु,

⁴ पुण तुमरो लिकाईल एने लिकाडील माणुसकि, सौम्य एने मोनान शान्तिई अविनाशी सजविल हेचकेरीन रिजी, कारण बोगवानान नजरे माय तान बहुमुल्य हि.

⁵ पूर्वीवालो कालाम पवित्र बायकू पुण, जे बोगवानापोर पुर आशा मेलतांलोन एती, आपणो जीवाह यारीती होबडील एने आपण एदमी अधीन रेथे एती.

⁶ जीही सारा अब्राहामान आज्ञानेत रेथे एती. एने ताह मालक किथी एती. ज्यानप्रमाणे तुमूह पुण जर हाजो केरणू एने काल्लूच प्रकारान भयांनी होवो, तर तान सोरी ठेरिनणार.

⁷ तोहोलोच हे एद्म्या, तुमूह पुण बुद्धीमानी बायकू हेरी जीवन जीवू, एने बायकूह नाजूक पात्र होमजाडीन तान आदर केरू, हे होमजाडीन कि आपु दुयू जीवन रूप कृपा दान वतनदार हि, ज्याही तुमरी प्रार्थना धाबू नाहं शकणार.

⁸ शेवेट आखान आखा एक मोन एने दया एने बायहान प्रेम केरणारा, एने कायकेरथी, एने नम्र बना.

⁹ वाईटान बदली वाईट मा केरूह एणेन शिव्याच्या बदली जुलीहि दया; पुण उलटो आशीर्वाद दया, कारण तुमूह आशीर्वाद चे वारिस एणेन केरता हादील गीया हि.

¹⁰ कारण “जो कूण जीवनान ईच्छा राख्नारो, एने हाजो दिह देखहुं इच्छितो, तो आपणो जीभीह वाईटानी, एने आपणो ओठरी छळाची वात केनार से रोक मेलील.”

¹¹ ता वाईटान संगती सोडावील, एने हाजे केरणू; ता मिलिन सुळविलोओ होदणे, एने तान आज्ञा रिजी.

¹² “काहाकाय बोगवानान डोला धर्मी वर रेणू, एने तान कान तान विनंती उगे रेणू; पुण प्रभु वाईट केरणारा विमुंख रेणे.”

¹³ जर तुमूह हाजो केरणेन केरता धुन माय होयत तर तुमरो वाईट केरणार पुण कूण हि?

¹⁴ जर तुमूह धार्मिकता मुळे दुख पुण सोसले, तर धन्य हि; पुण माणहान बिवडाल्या मा बिऊ, एने मा गाब्रने,

¹⁵ पुण मसीहान प्रभु होमजाडीन आपणो आपणो मोनाम पवित्र होमजू. जी कूण तुमूह तुमरो आशान विषयातमाय काही फुसील, ताह उत्तर आपणे केरता दाडीन तियार रीवू, पुण नम्र एने बिय हेरी;

¹⁶ एने विवेक पुण शुद्ध मेलू, तान केरता कि ज्या वातू विषयी तुमरी बदनामी एती तान विषयी ते, जे मसीहान तुमरो हाजो चाल चलनुकचे अपमान केरणू, लज्जीत एने जुवी.

¹⁷ काहाकाय जर बोगवानान जिच ईच्छा रेंय कि तुमूह हाजो करीन कारण से दुख सोसावे, तर हे वाईट करीन कारण से दुख सहन केरणेन हाजो हि.

¹⁸ तान केरता कि मसीहाने पुण, म्हणजे अधर्मीन केरता धर्मीने, पाप्यान कारण से एक वेळा दुख सहन किरील, तान केरता कि आमूह बोगवानानाफाय पोचाडीने; तो देहरुपात जीवे मारील गीयो, पुण आत्मान रुपान जीवताला किरील गीयो.

¹⁹ ताणुच तान जाइन बंदी आत्माना पुण पोरचार केरील,

²⁰ तान केरता ता वातू टाइमापूर आज्ञा नाहं कियील, ताहेरया बोगवानान नोहान दिहामाय धीर देरीन रेणू, एने ते जहाज बोणावूह एता, ज्यामाय बोहीन थोडोक माणुह म्हणजे एने प्राणी पाण्यान द्वारे वोचील.

²¹ तान पाण्यान वार्ता पुण, म्हणजे बाप्तिस्मा, यीशु मसीहान जीवताला ला द्वारे, ऐवी तुमूह वोचाडणे; यान शरीरान मोयलो सेटो केरणेन अर्थ हेते हि, पुण शुद्ध विवेक बोगवानान वंशामाय एय जाणे अर्थ हि.

²² तो स्वर्गामाय जाइन बोगवानान जेवडी उगे बोहील; एने स्वर्गदूत, एने अधिकारी एने शक्तीन अधीन मिलील हेते.