1 पतरस 2 - नाहाली

जीवतालू दिगुड एने पवित्र माणहे

¹ केरीन आखा प्रकार ने भेदभाव एने दुष्ट पणा एने कपट ढोंग एने बदनामीह सेटा केरीन,

² नोवालो जेल्मो इयील सोरा सारकोस निर्मळ आत्मिक दुधाची लोभा देरू, म्हणजे तान द्वारे उद्धार मिळवणे केरयता वोदनेन जाणे,

³ काहाकाय तुमूह प्रभुन क्रुपेनवजेसे होवाद चाक्खो हि.

⁴ तान आहने आवीन, ज्याह माणहान नाकारील पुण बोगवानान नजरेम निवाडील एने मूल्यवान जीवतालू दिगुड हि,

⁵ तुमूह पुण जीवेच जीवताला देगूडान होस आत्मिक घेर बोणावीन जातेह, ज्याहरीन याजकगणचे पवित्र समाज बोणावीन, इही आत्मिक अर्पण सडजी जे यीशु मसीहान द्वारे बोगवानानाह आवडीनार ग्राष्य हि.

⁶ आवो प्रकारे पवित्र शास्त्रामाय पुण आवा हि: “देखू, मी सियोनात कोनशील निवाडील एने मूल्यवान दिगुड धेरनु, एने जो कूण तापोर विश्वास मेली, तो काल्लूच प्रकारे फजित नाहं एय.”

⁷ शेवेट “तुमरीकेरता जे विश्वास केरणू ते तर मूल्यवान हि, पुण जे विश्वास नाहं” केरतीन तान केरता “ज्या देगडाह राजमिस्रीयांनी खेतेमएणार किरील एतो, तोच कोनशिला एनो”

⁸ एने “ठोकर लागणार दिगुड एने अलखित्लो सापूर ओहलो एनो” काहाकाय ते तर वचनामाय नाहं होमजाडीन एय गीयो एने ज्योच केरता ते ठेरना पुण गीया.

⁹ पुण तू एक निवाडील वंश, एने याजकिय याजकगण, एने पवित्र माणहे, एने बोगवानान प्रजा ओहलो, तान केरता कि तान केरता तुमूह आंधारामाय आपणो अदभूत उजालाम हादाड्या हि, तान गुण प्रगट केरू.

¹⁰ तुमूह पेल्ला तर कायीच नाहं एता पुण ऐवी बोगवानान प्रजा ओहलो; तुमरे पोर दया नाहं एनी एती पुण ऐवी तुमरे पोर दया एनी एती.

मसीही उत्तरदायीत्व

¹¹ हे प्रियजन, मी तुमूह विनंती कोरथू कि तुमूह आपणो स्वता: ला परदेशवाशी एने प्रिनासी होमजाडीन ता संसारिक चिहटालल्ली जी आत्माशी लेढाई केरणू, होमालणार रेवू.

¹² दिहरी जातीमाय तुमरो चाल-चलन हाजो रेणें जुवी; काहा का ज्यू-ज्यू वातू माय ता तुमूह दुष्कर्मी होमजणू एने बोदनाम केरणू, ता तुमरा हाजा कामाह देखीन ताजने वजसे कृपा-दृष्टीन दिहाम बोगवानान महिमा केरू

बोगवानान दास

¹³ प्रभु केरता माणहेच ठेरायेल प्रत्येक व्यवस्था च्या अधीन रीवू, राज्यान तान केरता कि तो आखा उपेर श्रेष्ठ हि,

¹⁴ एने सुभेदारान, काहाकाय ते वाईट केनाराह शिक्षा केरणेन एने हाजो केनाराह वाहवा केरता ताह मोकलील हि.

¹⁵ काहाकाय बोगवानान ईच्छा हि कि तुमूह हाजो काम करीन द्वारे निर्बुद्ध माणहान अज्ञानाच्या वातूह बंद केरीन दया.

¹⁶ आपणो जीवाह स्वंतत्र होमजू, पुण आपणो आवो स्वतंत्रेला वाईटान केरता तीवूगी मा बोणावूहु; पुण आपणो जीवाह बोगवानान दास होमजाडीन ली.

¹⁷ आखान मान केरू, बाहाकपुर प्रेम मेलू, बोगवानानाह बिणु, राज्यान मान राखणे.

मसीह आपणो आदर्श

¹⁸ हे दासो, प्रत्येक प्रकारान बियान आपणो मालख्यो अधीन रीवू, फक्त तान जे हाजो एने सौम्य ओहलो पुण तान जे कठोर ओहलो.

¹⁹ काहाकाय जर कूण बोगवानान विचार केरीन अन्यायान दुख उठाळीन क्लेश सहन केरथू तर हे उचित हि.

²⁰ काहाकाय जर तुमूह पाप केरीन ठोसकात्लू खाइल एने धीर देरू, तर याम काय मटली वात हि? पुण जर हाजो काम केरीन दुख सहन केरणू एने धीर देरहु, ते बोगवानानाह उचो हि.

²¹ एने तुमूह ज्यानकेरता हादाड्या पुण गीया हि, काहाकाय मसीह पुण तुमरीकेरता दुख सहन केरीन तुमूह एक कित्ता कालविनार आपील हि कि तुमूह पुण तान पागोपोलो चाला.

²² तर तान पाप किरील एणेन तर तान मुया केरीन छळची काल्ली वात निकलील.

²³ तो जुलीहि कोलाक जुलीहि नाहं, आपतेन एतो एने दुख सहन केरीन कोणीही पुण धमकी नाहं आपतेन एतो, पुण आपणो जीवाह खेरो न्याय केनारानया होपीन आपील.

²⁴ तो स्वताह आमरा पाप आपणो शरीरापुर लेईन क्रुसपूर चेडिन गीयो, ज्याही आमु पापान केरता मोरीन धार्मिकता केरता जीवूहू: तान मार खाइल तुमूह हजो एय गीयो.

²⁵ कारण तुमूह पेल्ला फिरनारो मेंढरा होस एता, पुण ऐवी आपणो जीवणो देखणार एने राखवाल ताफाय फिरीन आवा हि.