1 पतरस 1 - नाहाली

अभिवादन

¹ पतरसा उगेरीन जो यीशु मसीहान प्रेरित हि, ता दिहरा देशामाय वालान नावे जो पुन्तुस, गलतियो, काप्पदुकीया, आशिया एने बितुनियामाय तितर-बितर एयीन रेतेह,

² एने बोगवान आबुक भविष्य ज्ञानानुसार, आत्मान पवित्र केरणेन वजेसे आज्ञा माणने एने यीशु मसीहान रक्ताने हिपडणेन निवडील हि. तुमूह कृपा एने शान्ति जुडती रेय.

एक जीवताली आशा

³ आपणा प्रभु यीशु मसीहान बोगवानान एने पितान धन्यवाद एय, तान केरता मसीहान मोरील मायरीन जीवतालू उठिल द्वारे, आपणो महा दयानुसार आपुहू जीवतालो आशा नकेरिन नोवालो जेल्मो आपील,

⁴ म्हणजे एक अविनाशी, एने निर्मळ, एने अक्षय वतन मिलावनेकेरीन जे तुमरीकेरता स्वर्गामाय मिलील हि;

⁵ ज्यान राखनार बोगवानान सामर्थानी विश्वासान द्वारे ता उद्धार केरीन, जो आवूह टाईमपोर प्राप्त एय हि, कि केरील जातेह.

⁶ ता विषयी तुमूह उल्हास केरता, यधापी गर्जेन हि कि ऐवी काही दिह तारीन ओगाण ओगाण रीक्षामुळे दुख सोसले;

⁷ एने तो ज्यानकेरता हि कि तुमरो पारखणे विश्वास, जो आखठा केरीन खेतेमएणार होना पेक्षा होवटो मूल्यवान हि, यीशु मसीह प्रगट हवरा प्रशंसा एने महिमा एने मान यास कारणी भूतडो एने जुवी.

⁸ तुमु यीशुह देख्यो बिना तासे प्रेम केरतेह, एने ऐवी ताह बिना देखेल भी विश्वास केरीन इही आनंदमाय एने मग्न ऐतेह जो अनिर्वाच्या एने महिमाणी भूरील;

⁹ एने आपणो विश्वास प्रतीफळ म्हणजे आत्मान उद्धार प्राप्त केरणू.

¹⁰ ज्याच उद्धारान विषयांमाय ता संदेशष्टा खोब तापास केर्यो एने होद्यो एने जाच-पडताल केर्या, जां तां कृपान विषयामाय जो तुमरे पोर एण्यो एतो, तांन भविष्यवाणी केरील एती.

¹¹ तास आवो वातून होदणे केरील कि मसीहान आत्मा जो तान माय एतो, एने पेलूच तारीन मसीहान दुख तान ह्नारो महिमान गवाही, आपतेन एतो, तो कालो एने केवी टाईमपोर आकारो केरतीन एतो.

¹² तामारीन जो प्रगट केरील एतो कि ते आपणी नाहं पुण तुमरो सेवा केरता हि वातू किथी रेथे हि, ज्यान सुवार्ता ऐवी तुमूह तान द्वारे जुडील तान केरता पवित्र आत्मान द्वारे, जो स्वर्गाफायरीन मोकल्य गीयो, तुमूह सुवार्ता होमलाळीन; एने आवो वातूह स्वर्गदूत पुण लक्ष आपिन देखाणेम लोभ केरणू.

पवित्र जीवन जीवणेन हादणो

¹³ आवो कारण से आपणो आपणो बुद्धी कंबर बाधील, एने होमंबालीन रेयीन, ता कृपा पुरो आशा मेलू जी यीशु मसीह प्रगट एयनेण टाइम तुमूह जुळी हि.

¹⁴ आज्ञाकित सोरान होस आपणो आज्ञा नाव तानहोस आपणो पूर्वीवालो वासना नुसार वागूवर्तुक मा.

¹⁵ पुण ओहलो तुमरो हादनारो पवित्र हि, तोहोलोच तुमूह पुण आपणो आखा आचरणामाय पवित्र बोणो.

¹⁶ काहाकाय लिखील हि, “पवित्र बना, कारण मी पवित्र हि.”

¹⁷ एने जेवी कि तुमूह हे पित्या बोलीन ताह प्रार्थना केरणू, जे बिगर पक्षताप प्रत्येक जमाहा काम नुसार न्याय करने, तर आपणो पारका देशाम रेणेन काल बियीन जावाडू.

¹⁸ कारण तुमूह मालूम हि कि तुमरो निरर्थक वागणूक जी डाय डायान रुडीई चालतो आवील हि, ताकेरिन तुमरो सुटकारा चांदी-होनो म्हणजे खेतेमएणार बिडारोह नाहं आवा;

¹⁹ पुण निर्दोष एने निष्कलंक कोकर, म्हणजे मसीहान मूल्यवान रक्तान द्वारे एय गीयो.

²⁰ तान ज्ञान तर जगाच्या उत्पतिच्या पेल्ला तारीन समजील एता पुण ऐवी आवो शेवटेस युगामाय तुमरो केरता प्रगट एनो.

²¹ तान द्वारे तुमूह बोगवानानापूर विश्वास केरणू, तान केरता ताह मुरील मायरीन जीवतालू किरील एने महिमा आपील कि तुमरो विश्वास एने आशा बोगवानानारु ओहलो.

²² शेवेट: ताहेरया कि तुमूह बाहाक प्रेम केरता निर्दभ प्रेमाकेरता खाणेन निष्कपट सत्य आपणो मोनाह पवित्र किरील हि, तर तन-मन लागाडील एक दिहरापुर प्रेम केरू.

²³ कारण तुमूह खेतेमएणार नाहं पुण अविनाशी मोजादेखो, बोगवानान जीवन एने कायम टिक्नारो वचनमाय द्वारे नोवालो जेल्मो पावलेले हि.

²⁴ काहाकाय “प्रत्येक प्राणी खेडानहोस हि, एने तान पुर्ण होबाडील खेडानहोस फुलान होस हि. खेड सुखत जातेह, एने फुल गेलीन जातेह”

²⁵ पुण प्रभुन वचन कायम स्थिर रेणे. एने ज्याच सुवार्तान वचन हि जो तुमूह होबलीन जाईल एता.