1 योहान 4 - नाहालीआत्माह पारखो 1 हे प्रिय, प्रत्येक आत्मान विश्वास नाह केरू, नापून आत्मनि ओलख कि ता बोगवान उखेरणे हि कि नाह; कारण कि जुलुम ठेगणेवाला भविष्यवक्ता जगामाय निकलीन उब्रीयेल हि हेते. 2 बोगवानान आत्मा तुमूह जी रीतीमाय ओलखी सेकतेह: जी आत्मा मान लेती कि यीशु मसीह शरीराम होवोन आवा हि तो बोगवान उखररीन हि, 3 एने जी आत्मा यीशुह नाहं मानीत, ती बोगवान फायरीन नाहं; एने ती मसीह विरोधी आत्मा हि, ज्यान चर्चा तुमूह होमलीन लीईल हि कि तो आवूह हि एने ऐवी पुण जगाम हि. 4 हे सोरा, तुमूह बोगवानान हि, एने तुमूह तापोर जय मिळवणे हि; काहाकाय जां तुमरे माय हेते तापुररीन जा जगामाय हि, मोठू हि. 5 ते जगान हि, ता कारणाने ता जगान वातू केतेह, एने जग ज्यान होमलने. 6 आमु बोगवानान हेते. जा बोगवानाह ओलखतेहे, तो आमरो होमलथू; जो बोगवानान नाहं ओळखतेह तो आमरा नाहं होंबलेह. ज्याह प्रकारे आमु सत्यान आत्मा एने भ्रमान आत्माह ओलखी लेणे. बोगवानान प्रेम 7 हे प्रियांनो, आमु आपसामाय प्रेम मेलो; कारण कि प्रेम बोगवाना फायरीन हि. जो कूण प्रेम करने, तो बोगवाना फायरीन जेन्मोलेदो हि एने बोगवानान ओलखिल. 8 जो प्रेम नाहं मेलतांलोन तो बोगवानान नाहं ओळखतेह, कारण बोगवान प्रेम हि. 9 जे प्रेम बोगवान आमऱ्येपुररीन मेली, हे यान प्रगट एय गीयो कि बोगवानान आपुहू एक एकूलता एक सोरो जगोमाय मोकलना हि कि तो तान द्वारे जीवन जुडी. 10 प्रेम ज्यामाय नाहं कि आमु बोगवानापोर प्रेम किरील, पुण याम हि कि ताह आमऱ्येपुररीन प्रेम हि एने आमरा पापान क्षमा लेईन आपणो सोराह मोकलील. 11 हे प्रियांनो, जेवी बोगवानान आमऱ्येपुररीन प्रेम किरील, तर आपूहबी आपसामाय प्रेम मेलणेन जुवी. 12 पुण बोगवानान केधीच कूण नाहं देखील, केध्दीह तुमूह आपसामाय प्रेम मेलील एने, तर बोगवान तुम्रेमाय रेणे एने तान प्रेम आमरा माय सिद्ध एय गीयो हि. 13 ज्यान आमु ओळखणे कि आमु तामाय रेणे तो आमरा माय; कारण कि तान आपणो आत्मा आमूह आपील हि. 14 आमु देख भी लीईल एने गवाही आपथु कि पिता सोराह जगान उद्धार केरथू केरीन मोकलना हि. 15 जो कूण हे मानीन लेणे यीशु बोगवानान सोरो हि, बोगवान तामाय रेणे, एने तो बोगवान माय. 16 जे प्रेम बोगवान आमऱ्येपुररीन मेली, ताह आमु ओलखिन लीईल एने आमूह तान विश्वास हि. एने जो प्रेमामाय रेणे तो बोगवान माय रेणे, एने बोगवान तामाय रेणे. 17 ताजफाय प्रेम आमरा माय सिद्ध एय गीयो कि आमूह न्यायान एक दिह धेर्य रीवू; कारण कि तोहोलोज तो हि तोहोलोच जगामाय आम्हुबी हि. 18 प्रेमामाय बिय नाहं रेथे, नापून सिद्ध प्रेम भयाला सेटो केरीन आपतेन हि; कारण कि भयान संबंध डेगारी एता, एने जो बिय करने तो प्रेमामाय सिद्ध नाहं एनो. 19 आमु जानकेरता प्रेम केरथू, कि पेल्ला तास आमऱ्येपुररीन प्रेम किरील. 20 जर कूण केय, “मी बोगवानापोर प्रेम करने” एने आपणो बाहाकपुर वैर मेलील ते तो जुठा हि; काहाकाय जो आपणा बाहाकाह जाह तो देखील हि प्रेम नाह मेलीत, तर तो बोगवान से जाह तो देख्यो नाह तापोर प्रेम नाह मेल सकीत. 21 तान तारीन आमूह हि आज्ञा जुडी हि, कि जो कूण बोगवानापोर प्रेम मेली तो आपणो बाहाकपुर पुण प्रेम मेलथू. |
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation