1 योहान 3 - नाहाली

¹ देखू आबुक, आमरे पोररीन ओहलो प्रेम किरील हि का आमु बोगवानान सोरा केवायील; एने आमु हि पुण. ज्या कारण से जग आमूह नाह ओलकतेह, काहाकाय तो ताह पुण नाह ओळखिल.

² हे प्रियानो, ऐवी आमु बोगवानान सोरा हेते, एने एविवूर ज्यो प्रगट नाहं एय गीयो आमु काय काही लेहु! हेते होमजीह का ऐवी ते प्रगट एय तर आमु तान सारकोस एती, काहाकाय ताह तोहोलोच देखणार तोहोलोज तो हि.

³ एने जो कूण तापोर आशा मेली, तो आपणो स्वता: ला तोहोलोच पवित्र करने तोहोलोज तो पवित्र हि.

⁴ जो कूण पाप करने, तो व्यवस्थाचा विरोध करने; एने पाप तर व्यवस्था विरोध हि.

⁵ तुमूह मालूम हि कि ते तान केरता प्रगट एनो कि पाप हरिन केरावी; एने तान स्वभावोम पाप नाहं सोतो.

⁶ जो कूण तामाय बोणावीन रेणे, तो पाप नाहं केरतीन: जो कूण पाप करने, तास तर ताह देखील एणेन ताह ओलखिल.

⁷ हे सोरा, कुणीन बहकव्यात मा आवहू. जो धार्मिकतान काम करने, तोच तान सारखो नीतिमान हि.

⁸ जो कूण पाप करने तो शैताना फायरीन हि, कूण शैतान पेलुजरीन पाप केरीन आवा हि. बोगवानान सोरो तान केरता प्रगट एनो कि शैतानान काम नाश केरणेन केरता.

⁹ जो कूण बोगवाना से जन्मलेला हि, तो पाप नाहं केरतीन; काहाकाय तान बीज तान बोणावीन रेणे, एने तो पाप केरतेच नाहं काहाकाय बोगवानामाय जन्मलेला हि.

¹⁰ ज्योच फायरीन बोगवानान सोरा एने शैतानाचे सोरा समजील जातेह; जो कूण धार्मिकतान काम नाहं केरतीन तो बोगवानपूररीन नाहं, एणेन तो जो आपणो बाहाकपुर प्रेम नाहं केरतीन.

एक दिहरा से प्रेम मेलो

¹¹ काहाकाय जो समाचार तुमूह पेलूजरेन होमलेल, ते हे हि कि आमु एक दिहरापुर प्रेम केरणू;

¹² एने कैननान सारकोस बोणाविल जो ता दुष्ट एतो, एने तान केरता आपणो बायाकाह मारणे किरील एने ताह कायताहा प्रकारे मारणे किरील? आवो कारण से का तान कामे वाईट एता, एने तान बायाकान काम धार्मिक एता.

¹³ हे बायहो, जर जग तुमूह वैर मेलतांलोन रेंय तर आचर्य मा केरूह.

¹⁴ आमूह मालूम हि कि आमु मोरील तीउगी केरीन जीवनामाय पोचेल हि; कारण आमु बायहो प्रेम केरथू, जे प्रेम नाहं केरतीन ते मोरणेन देशामाय रेतेह.

¹⁵ जो कूण आपणो बायाकाहे-यो वैर मेली, तो खुनी हि; एने तुमूह मालूम हि कि कूण खुनी माय अनंत जीवन नाहं रेथे.

¹⁶ आमु प्रेम यान समजील कि तास आमरे केरता आपणो जीव आपील; एने आमूह पुण बायहो विचारोहो जीव आपील जुविकाय.

¹⁷ पुण ज्या कुणीफायरीन जगान संपती रेंय एने तो आपणो बायाक गरीब पाहून तापोर दया आवीन जुविकाय, तर तामाय बोगवानान प्रेम केवी बोणावीन रेहू शकते?

¹⁸ हे सोरा, आपु वचन एने जीभ हि से नाह, पुण काम एने सत्यान द्वारे पुण प्रेम मेलू.

बोगवानान ओगाण हियाव

¹⁹ ताजफाय आमु समजी कि आमु खेरीज हि; एने ज्या वातीमाय आमरा मोन आमूह दोषी ठेरिनणार, ता विषयी आमु तान ओगाण आपणो आपणो मोनाह ढाष्य आपुह शकणे;

²⁰ काहाकाय बोगवान आमरा मोनाह रीन मोठो हि, एने आखो काही होमजीह.

²¹ हे प्रियानो, जर आमरा मोन आमूह दोष नाय आपण्यू, तर आमूह बोगवानान ओगाण हियाव एतो;

²² एने जे काही आमु मागणे, ते आमूह ताफायरीन जोदेत, कारण आमु तान आज्ञा माणने एने जे ताह जुविकाय ते कोरथू.

²³ तान आज्ञा हि कि आमु तान सोरो यीशु मसीहान नावापुर विश्वास मेलठोन, एने जोहलो तास आमूह आज्ञा आपील हि तान नुसार आपसामाय प्रेम केरणू.

²⁴ जो तान आज्ञा माणने, तो तामाय एने तो तामाय बोणावीन रीवू: एने तासहेऱ्यो, म्हणजे ता आत्माशी जो तास आमूह आपील हि, आमूह मालूम हि कि तो आमरा माय बोणीन रेय.