1 कुरिंथीयो 9 - नाहाली

प्रेरितान अधिकार एने कर्तव्य

¹ काय मी स्वतंत्र नाह? काय मी प्रेरित नाह? काय मी यीशुह जो आमरो प्रभु हि, देखील नाह? काय तुमु प्रभु माय मारा बोणाविल नासोता?

² जर मी दिहिराकेरता प्रेरित नाहं, तेभी पुण तुमरीकेरता तेभी हि; कारण तुमूह प्रभु माय मारो प्रेरणेवर छाप हेते.

³ जे मारी चौकशी केरणू, तान केरता ज्याच मारा उत्तर हि.

⁴ काय आमूह खालोपिलो अधिकार नाहं?

⁵ काय आमूह हा अधिकार नाहं, कि कूण मसीही बोणिक वाराड केरीन तीयीरी जीवूहू, जोहलो दिहरी प्रेरित एने प्रभुन बाहाक एने कैफा केरणू?

⁶ केव्ही फक्त माहु एने बरनाबसलाच अधिकार नाहं कि कोमाडीन सोडीन आपज्यू?

⁷ कूण केवी आपणाच सोराह शिपायांन काम करने? कूण अंगूरिनाडी लागाडील फोल खाणे नाहं? कूण मेंढा राखणे केरीन तान दुध पित नाहं?

⁸ काय मी ज्यू वातू माणहान रीती पुर बोलथु वारिसनेय रेती?

⁹ काय व्यवस्था हि किथी नाहं? कारण मुसान नियामशास्त्राम लिखील हि का, “मोलने केरता बोयलाह मुहको बांधणु नाहा” काय बोगवान बोयलान चिंता करने?

¹⁰ ज्यो हाजान केरीन आमरे केरताच किथी का. एने होव, आमरे केरताच लिखील हि, कारण योग्य हि, का जुपणारान आशा से जुपणे, एने मोलने वालो भागीदार एणार आशा से मोलने जुवी.

¹¹ केरीन ताहेरया आमु तुमरीकेरता आत्मिक वस्तु पेरणे, तर काय मटली वात हि कि तुमूह शारीरिक वस्तून पिक काटू.

¹² ताहेरया दिहीराहा तुमरे पोर हा अधिकार हि, तर काय आमारो ज्यापोररीन जादा रेहू नाहं? पुण आमु हा अधिकार कामाम लावील नाहं; पुण आखा काही सहन करने कि आमरा द्वारे मसीहान सुवार्ताताह देरील कायीच रुकावट आवही मां.

¹³ काय तुमूह मालूम नाहं कि जे मंदिरामाय सेवा केरणू, ते मंदिरामाय रीन खाणु; एने जे वेदीई सेवा केरणू ते वेदीपरत भागीदार ऐतेह;

¹⁴ ज्यानप्रमाणे प्रभुने पुण ठेरायेल कि जे माणहे सुवार्ता होमेलनू, तान सेवेम कमाई रेणेन जुवी.

¹⁵ “पुण मी ज्यामायरीन काल्लीज वात कामाम देरील नाह, एने मी आवो वातू तान केरता लिखील कि मारकेरीन इही किरील जाणे, कारण ज्यान पेक्षा तर माहु मोरने हाजो हि कि कूण मारो गर्वाला वाया ठेरिनणार.

¹⁶ जर मी सुवार्ता होमबोलणार, तर मारकेरता कायीच गर्वाची वात नाहं” कारण हे तर मारकेरीन जरुरी हि. जर मी सुवार्ता होमालनारू नाहं, तर मारपुर हाय!

¹⁷ कारण जर आपणो ईच्छा हे करने तर माहु मोजरी जुडणे, एने जर आपणो ईच्छा केरतीन नाहं तेभी पुण कारभारी माहु होपील जाईल.

¹⁸ तर मारी काल्ली मोजरी हि? हे कि मी सुवार्ता होमलाडतलु मी मसीहान सुवार्ता फुकुट केरीन आपुह, न्याओर कि सुवर्तेमाय जो मारो अधिकार हि ताह पुण मी पुरो केर देनूह कामाम लीन आवूह नाहं.

¹⁹ कारण आखा फायरीन हाजो एतालून पुण मी स्वताह आखान दास बोनाडीन आपील हि कि जादा माणहाह मसीहाकडे लीन आवहू.

²⁰ मी यहूद्यांसाठी यहूदी बोणील म्हणजे मसीहाकडे लीन लावणे केरता. जे माणहे मसीहान आर्दामाय हि तान केरता मी व्यवस्था आधीनात नसताना पुण व्यवस्था अधीन एनो कि ताह जे व्यवस्था आधीनतेमाय, हि मसीहा माय लीन आवहू.

²¹ व्यवस्था वातून मानणाराकेरिन मी जे बोगवानान मानणारे नाहं पुण मसीहान व्यवस्था अधीन हेते, व्यवस्था वातून माननाराकेरता, व्यवस्थाह केनारान केरता एनो म्हणजे व्यवस्था माय मानणाराह मसीहाकडे लीन आवहू.

²² मी दुर्बळांसाठी पातलो बोणील तान केरता कि मसीहाकडे लीन आवहू. मी आखा माणहा केरता आखा काही बोणील, म्हणजे कायताहा कायताहा प्रकारे कूण एकास उद्धार मेलावीन आपुह.

²³ मी हे आखा सुवार्तान केरीन करने कि दिहराहे-यो भागीदार एईन जाहू.

मसीही दौड

²⁴ काय तुमूह मालूम नाहं कि दोवाडणे तर आखाज दोवडणे पुण बक्षीस एकुच लीन जाथू? तुमूह ता प्रकारेच दोवडू.

²⁵ प्रत्येक ताकतवालो आखा प्रकारान संयम करने ते तर एक खेतेमएणार मुकूटाला मिलवणे केरता किरील पुण आमु तर ता मुकूटाकेरीन करने जो केध्दीह नाश एय नाहं.

²⁶ तामुळे मी पुण ता प्रकारे दोवडणे; जे लक्ष्य एक हि, मी पुण ज्योच प्रकारे माणहान जुलाते लेडाणे पुण वारामाय त्यासारखो नाहं.

²⁷ पुण मी आपणो शरीराह दाबावामाय, चेदिलो एने काबुमाय लावथू, इही एणेन मां कि दिहीरा पोरचार केरीन मी खुदेन कायताहा प्रकारचा बिनकामान ठेरणार.