1 कुरिंथीयो 8 - नाहाली

मूर्तीह चेढाविल खाणो

¹ ऐवी मूर्ती ओगाण बलीदान वस्तून विषय माय आमूह हि का आपु आखा ज्ञान. गर्व निर्माण करने, पुण प्रेमाकेरिन उन्नती एने.

² जर कोणीही लागीह कि माहु काय तेभी मालूम हि, जर जोहलो मालूम जुवी जोहलो उंजूउर ताह मालूम नाहं.

³ जर कूण बोगवानान प्रेम करने, तर बोगवान ताह ओळखणे.

⁴ केरीन मूर्ती ओगाण बलीदान वस्तून विषयाम आमूह मालूम हि कि मूर्ती जगामाय कायीच वस्तु नाहं, एने एकास सोडीन दिहरो कूण बोगवान नाहं.

⁵ जर आकाशामाय एने पृथ्वीपोर कोलाक बोगवान कियील जातला जोहलो जादा बोगवान एने जादा प्रभु हेते.

⁶ तेभी आमरे केरता एकुच बोगवान हि: म्हणजे आबुक याफायरीन आखा वस्तु हेते, एने आमु तान केरता हेते एने एकुच प्रभु हेते, म्हणजे यीशु मसीह ज्यान उगेरीन आखा वस्तु एईल, एने आमु पुण ताणुच द्वारे हेते.

⁷ पुण आखाह ज्यो ज्ञान नाहं सोतो, पुण कोलाक ते ऐवी वोर मूर्तीह काय तेभी हि ज्यो सोमजणेन कारण से मूर्तीन ओगांण बलीदान केरील काही वस्तु काय तेभी विशेष हि केरीन खाणु, एने तान विवेक बुद्धी कोमी हि तामाय तां अशुद्ध एय जाणे.

⁸ जेवण आपुहू बोगवानान आहने लीन जात नाहं. एने जर आमु खाइल नाहं तेभी काही नुकसान एता नाहं, एने जर खाइल तर काही फायदा एता नाहं.

⁹ पुण सावधान! एहलो एणेन मां कि तुमरीओगाण हि स्वतंत्रता कां निर्बलांसाठी ठेसांचे कारण एय जाहू.

¹⁰ काहाकाय जर कुणी तुवाह ज्ञानीह मूर्तीन मंदिरामाय जेवण केरतालु देखी, एने तो निर्बल जन हि, ते कायतान विवेक बुद्धीह मूर्तीन ओगांण चेढाविल वस्तु खाणेन हिमंत नाय एय का?

¹¹ इही केरीन तारो बुध्दीपरत निर्बल बायाक तान केरता मसीह मोरणु, नाश एईन जाहू.

¹² इही केरीन बायहो विरोधामाय अपराध केरणे केरता एने तान निर्बल विवेक बुद्धीला पेलरीन पोतल्याने, तुमूह मसीहान विरोधामाय अपराध केरणू.

¹³ ओहला प्रकारे जर रोटो मारो बायाक ठोकर खावाडणेर, मी केधीच काल्लोबी प्रकारान माह खाण्यू नाहं एने एहलो एणेन मां कि मी आपणो बायाकणेकेरता पेलूच पोचावनारो कारण बोणावूहु.