1 कुरिंथीयो 6 - नाहाली

मासिहीमाय पेयज

¹ काय तुमरे माय हि हिम्मत हि कि ताहेरया दिहीरा बरोबर लेडायेल एता, तर तानकेरीन निर्णय अधर्मी फाय दिहरी जाती उगे जाणेन एने पवित्र माणहाउगी जाणेन नाह?

² काय तुमूह मालूम नाहं कि पवित्र माणहे जगान न्याय केरुहू? तान केरता ताहेरया तुमूह जगान न्याय केरहू हि, तर काय तुमूह हाणाम आत्या मिठाडणे न्याय निवाडा केरणेन योग्य नाहं?

³ काय तुमूह मालूम नाहं कि आमु स्वर्गदूतान न्याय केरुहू? तर काय संसारिक वातून न्याय केरहू नाहं?

⁴ जर तुमूह संसारिक वातून न्याय निवाडा केरहू, तर काय ताणुच बोहाडीन जे कलीसिया माय कायीच समजील जात नाहं?

⁵ मी तुमूह लाजवाडणे केरणेन केरता हे, किथे काय खेरी खेरीच तुमरे माय एक पुण बुद्धिमान जुडतो नाहं, जो आपणो बाहाकान न्याय निवाडा केरूह शकेल?

⁶ तुमरे माय बाहाक बाहाकपुर चौकशी करने, ते अविश्वासी माणाहान ओगाण.

⁷ पुण खेरीच तुमरे माय मोठू दोष हा हि कि आपसामाय फिर्याद केरणू. अन्याय काहा सहन केरतीन नाहं? आपणा नुकसान काहा सहन केरतीन नाहं?

⁸ पुण तुमूह तर स्वताह अन्याय केरणू एने नुकसान केल्यो, एने ते पुण बायाकुच.

⁹ काय तुमूह मालूम नाहं कि अन्यायी माणहे बोगवानान राज्यान वारिसनेय रेती? फोसू मा; जारकर्मी व्यभिचारी, मूर्ती पूजा, बायकू सारखो सभोंग आपणार, एदमीहारखो सभोंग लेणार.

¹⁰ चोर, लोभी, साकल्यो, लुच्डो एने वित्त हरिन केरणार बोगवानान राज्यान वारिसनेय रेती.

¹¹ एने तुमरे मायरीन कोलाक जन ओहलाच एता, पुण तुमूह प्रभु यीशु मसीहान नावान एने आमरा बोगवानान आत्मा माय धुवील गेलेले, एने पवित्र इयील खेरो ठेरना.

शरीर बोगवान महिमान केरता

¹² आखा वस्तु मारकेरता योग्य तर हि, पुण आखा वस्तु फायद्याच्या नाहं; आखा वस्तु मारकेरीन योग्य तर हि, पुण मी काल्लूच वातून अधीन एय नाहं.

¹³ रूटू पेटान केरता एने पेट एनान केरीन, पुण बोगवान ज्याह एने ताह दुईजानाह नाश केरुहू. पुण शरीर व्यभिचारासाठी नाहं, पुण प्रभु केरता हि एने प्रभु शरीराकेरिन हि.

¹⁴ बोगवानान आपणो सामर्थ्यान प्रभुह जीवतालो किरील, एने आमूह पुण जीवतालू केरुहू.

¹⁵ काय तुमूह मालूम नाहं कि तुमरो शरीर मसीहान अवयव हि? तर काय मी मसीहान अवयवाह लीन ताह वेश्यांचे अवयव बणावूहू? मुळीच नाहं.

¹⁶ काय तुमूह मालूम नाहं कि जो कूण वेश्यांबरोबर संगती करने, तिहे-यो एक तन एय जाथू कारण लिखील हि, “ते दुयू एक तन एय.”

¹⁷ एने जो प्रभुन सहभागिता माय रेणे, तो ताहेऱ्यो एक आत्मा एय जाथू.

¹⁸ व्यभिचारा पासून सेटो रीवू; जोलाक दिहरा पाप माणुह करने ते शरीरान बाहेरिनाला हि पुण व्यभिचार केरणार आपणाच शरीरान विरोधामाय पाप करने.

¹⁹ कारण काय तुमूह मालूम नाहं कि तुमरो शरीर पवित्र आत्मान मंदिर हि, जो तुमरे माय बोहील हि, एने तुमूह बोगवाना फायरीन जुडना हि; एने तुमूह तुमरो नाहं?

²⁰ काहाकाय किंमत आपील वेचातो लीईल हि, तामुळे आपणो शरीर केरीन बोगवानान महिमा केरू.